តារាម៉ូដែល គឹមចេង ទទួលការចាប់អារម្មណ៍ខ្លាំងក្រោយគ្រងឈុត “អប្សរាមេ”

តារាម៉ូដែល ទាន គឹមចេង ដែលបានធ្វើដំណើរទៅចូលរួមមហោស្រពភាពយន្តទីក្រុងកានលើកទី៧៧ ជាមួយ អូលីវ៉ា គង់ ផ្សព្វផ្សាយពីសិល្បៈវប្បធម៌ដែរ។យុវតីមានរាងខ្ពស់ស្រឡះរូប​នេះ បានបង្ហាញខ្លួន​នៅ​ថ្ងៃម្សិលមិញ ជាមួយឈុត​បង្ហាញអត្តសញ្ញាណខ្មែរ​មួយឈុត ដែលធ្វើអោយ​មាន​ការចាប់អារម្មណ៍ខ្លាំង​។

ដោយ​នៅ​ក្នុងវីដេអូខ្លីមួយ នាងត្រូវ​បានអ្នកថតរូបមួយក្រុម បានតាម​មក​ថតនាង​ដល់​ខាងក្រៅមហោស្រព​ទៀត។

 

តាម​លោក អូលីវ៉ា គង់ ដែល​ដឹកនាំនាង និង​ម៉ាដាម ដា ទៅ​បានប្រាប់ ឡេឌីស៍ ដោយដឹងថា នាង​មានឈ្មោះ​ថា ទាន គឹមចេង ជា​តារាម៉ូដែលអាជីព​មួយរូប ដែលមានបទពិសោធន៍ជាច្រើន​នៅ​ក្នុង​អាជីព​ទាំង​នៅ​ក្នុងស្រុក និងនៅអន្តរជាតិ។

 

អូលីវ៉ា ប្រាប់​ថា គឹមចេង ធ្លាប់​មាន​បទពិសោធន៍​ដើរ​ម៉ូតនៅក្នុងប្រទេស​ជា​ច្រើន មាន​ដូច​ជា អ៊ីតាលី ម៉ាឡេស៊ី និងវៀតណាមជាដើម។

 

គឹមចេង និងអូលីវ៉ា បានចាកចេញពីកម្ពុជា​ឆ្ពោះ​ទៅប្រទេសបារាំងកាលពីចុងសប្ដាហ៍មុន ក្នុងបេសកកម្ម​ទៅផ្សព្វផ្សាយអំពីសិល្បៈវប្បធម៌របស់កម្ពុជាទៅកាន់ពិភពលោកដូចនឹងសិល្បករ សិល្បការិនីផ្សេងទៀតរបស់កម្ពុជាដែរ។

នៅលើកម្រាលព្រំក្រហមដ៏មានកិត្តិយស គឹមចេង បានលេចវត្តមានជាមួយឈុត “អប្សរាមេ”ដ៏ស្រស់ស្អាតមួយឈុត ពណ៌ទឹកក្រូច ផ្គូរជាម៉ូដសក់អប្សរាពណ៌ស បង្កើតបានជាភាពទាក់ទាញមួយ។

 

តាម អូលីវ៉ា នេះជា​ឈុតសម្រាប់រំលឹកគុណ ដឹងគុណដល់ លោកគ្រូ អ្នកគ្រូរបាំបុរាណ ដែលគាត់មាន​វ័យចំណាស់រហូតដល់សក់ស សក់ស្កូវ តែមិនបោះបង់ការងារជាអ្នកទ្រទ្រង់សិល្បៈវប្បធម៌ខ្មែរ។

 

គឹមចេង អូលីវ៉ា គង់ រួមជាមួយ​សិល្បករខ្មែរ អ្នកជំនួញផ្សេងទៀត ដូច​ជា មាន សូនីតា យូប៊ីន ជេននី ម៉ានិត ឡូរ៉ាម៉ម រ៉េត សារីតា ជាដើម បាន​ធ្វើរឿងអស្ចារ្យរៀងខ្លួន ទាញពិភព​លោក​អោយក្រឡេកមកកម្ពុជា ថា​នេះ​ហើយ សិល្បៈវប្បធម៌របស់កម្ពុជា ដ៏ល្អ​ផូរផង់ ដែល​អ្នកមិនគួរ​មើល​រំលង៕