ដៃគូអភិវឌ្ឍន៍បារាំងសន្យាបន្តផ្តល់ជំនួយ ២០០លានអឺរ៉ូ ដល់កម្ពុជារៀងរាល់ឆ្នាំ និង ចុះហត្ថលេខាលើកិច្ចព្រមព្រៀងចំនួន២

នៅក្នុងជំនួបរវាង រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និង អគ្គនាយករងប្រតិបត្តិនៃទីភ្នាក់បារាំងសម្រាប់ការអភិវឌ្ឍ (AFD) នៅក្នុងនោះបារាំងនឹងបន្តគាំទ្រកម្ពុជា ដោយផ្តល់ជំនួយចំនួន ២០០ លានអឺរ៉ូជារៀងរាល់ឆ្នាំ។

ឯកឧត្តមគ្គបណ្ឌិតសភាចារ្យ ឧបនាយករដ្ឋមន្ត្រី ក្រសួងសេដ្ចកិច្ច និងហិរញ្ញវត្ថុ  បានទទួលស្វាគមន៍យ៉ាងកក់ក្តៅចំពោះវត្តមានលោកជំទាវ Marie-Helene LOISON ដែលជាអគ្គនាយករងប្រតិបត្តិនៃទីភ្នាក់បារាំងសម្រាប់ការអភិវឌ្ឍ និងបានថ្លែងអំណរគុណដល់រដ្ឋាភិបាល និងប្រជាជនបារាំង តាមរយៈ AFD ចំពោះការគាំទ្រយ៉ាងពេញទំហឹងដល់ការស្តារ និងការអភិវឌ្ឍនៅកម្ពុជា។

ជាក់ស្តែងគិតចាប់ពីឆ្នាំ ១៩៩៣ មកដល់បច្ចុប្បន្ន នេះ ទីភ្នាក់ងារបារាំងសម្រាប់ការអភិវឌ្ឍ បានផ្តល់ហិរញ្ញប្បទានសហប្រតិបត្តិការ ចំនួនប្រមាណ ១ ១៥០ លានអឺរ៉ូ ក្នុងនោះ រួមមានហិរញ្ញប្បទានឥតសំណង ចំនួន ២១៧ លានអឺរ៉ូ និងឥណទានសម្បទានសម្រាប់រយៈពេល ១១ឆ្នាំ ប្រមាណជិត ៨០០ លានអឺរ៉ូ ។

ចំពោះ រាជរដ្ឋាភិបាលនិតិកាលទី៧ បានផ្តល់អាទិភាពគន្លឹះដល់៖ មនុស្ស (ការបណ្តុះបណ្តាល ជំនាញវិជ្ជាជីវៈបច្ចេកទេស និងជំនាញទេសចរណ៍), ផ្លូវ (ការអភិវឌ្ឍប្រព័ន្ធផ្លូវនៅតាមបណ្តាខេត្ត), ទឹក (ការអភិវឌ្ឍប្រព័ន្ធធារាសាស្ត្រ និងរោងច្រកផលិតទឹកស្អាត), ភ្លើង (ការអភិវឌ្ឍបណ្តាញខ្សែ បញ្ជូនអគ្គិសនី), និង បច្ចេកវិទ្យាឌីជីថល។

AFD បានលើកឡើងអំពីកិច្ចសហប្រតិបត្តិការហិរញ្ញសប្បទានទ្វេភាគី កម្ពុជា-បារាំង ដែលមានការរីកម្រើនជាលំដាប់ ព្រមទាំងបានកោតសរសើរ និងវាយតម្លៃខ្ពស់ ចំពោះក្រសួងសេដ្ឋកិច្ច និងហិរញ្ញវត្ថុ ដែលបានផ្តល់កិច្ចសហការយ៉ាងល្អ ក្នុងការរៀបចំកិច្ចពិគ្រោះយោបល់គោលនយោបាយលើកទី៧ ដោយជោគជ័យ និងទទួលបានផ្លែផ្កាគួរឲ្យកត់សម្គាល់ កាលពីថ្ងៃទី១៣ ខែឧសភា ឆ្នាំ២០២៤។

ទន្ទឹមនេះ AFD បានបញ្ជាក់ថា​ បារាំងនឹងនៅតែបន្តគាំទ្រដល់កិច្ចសហប្រតិបត្តិការលើគ្រប់វិស័យរបស់កម្ពុជា ដោយនៅតែរក្សាទំហំឥណទានសម្បទាន ចំនួន ២០០ លានអឺរ៉ូ ក្នុងមួយឆ្នាំ ព្រមទាំងនឹងបន្តជួយកៀរគរជំនួយបច្ចេកទេសពី Expertise France, ហិរញ្ញប្បទាន់ឥតសំណងពីសហគមអឺរ៉ុប និង សហហិរញ្ញប្បទានពីប្រភពផ្សេងទៀត សម្រាប់រួមចំណែកក្នុងការអភិវឌ្ឍ និងស្តារសង្គម-សេដ្ឋកិច្ចកម្ពុជា សម្របតាមគោលនយោបាយ និងយុទ្ធសាស្រ្តអភិវឌ្ឍន៍ជាតិរបស់កម្ពុជា។

នៅក្នុងកិច្ចពិគ្រោះយោបល់នេះ បានផ្តល់ឱកាសដល់ភាគីទាំងពីរ ធ្វើការត្រួតពិនិត្យរួមគ្នា និងឯកភាពលើទិសដៅគោលនយោបាយ និងយុទ្ធសាស្រ្តអភិវឌ្ឍន៍ ក្នុងវិស័យអាទិភាព ក៏ដូចជា បញ្ជីគម្រោងសម្រាប់បណ្តាឆ្នាំខាងមុខ ដោយកំណត់យកអាទិភាព៥ រួមមាន៖ មនុស្ស ផ្លូវ ទឹក ភ្លើង និង បច្ចេកវិទ្យា ក្នុងគោលដៅចម្បងដើម្បីរក្សាចលនការនៃសុខសន្តិភាព កំណើនសេដ្ឋកិច្ច និងការអភិវឌ្ឍជារួម ព្រមទាំងដើម្បីកសាង និងពង្រឹងមូលដ្ឋានគ្រឹះសម្រាប់ជំរុញសន្ទុះនៃការអភិវឌ្ឍជាតិ តាមរយៈការកសាងភាពធន់នៃវិស័យទាំង៥ រួមមាន៖ វិស័យសាធារណៈ, វិស័យសេដ្ឋកិច្ច, វិស័យហិរញ្ញវត្ថុ, វិស័យធនធានមនុស្ស និងសង្គម, វិស័យបរិស្ថាន ,និងការឆ្លើយតបនឹងការប្រែប្រួលអាកាសធាតុ។

រួមជាមួយនោះ ភាគីទាំងពីរ បានចុះហត្ថលេខាលើ ២ចំណុច (១). កិច្ចព្រមព្រៀងឥណទានសម្បទានបន្ថែមចំនួន ២៥ លានអឺរ៉ូ សម្រាប់កម្មវិធីអភិវឌ្ឍន៍ហេដ្ឋារចនាសម្ព័ន្ធជនបទសម្រាប់កម្ពុជា(Top up for Rural Infrastructure Development for Cambodia Program-RID4CAM), និង (២). អនុស្សារណៈស្តីពីក្របខណ្ឌ ២០៥០ ដំណាក់កាលទី២ (Facility 2050 Phase 2) ផងដែរ។