ខ្មែរ
English
Gomi Hayakawa ជាសហគ្រិនស្រ្តីជនជាតិជប៉ុន ដែលបានបង្កើតម៉ាកយីហោ “feast” ជាប្រ៊េនខោទ្រនាប់ និង អាវទ្រនាប់ បង្កើតឡើងសម្រាប់នារីមានសុដន់តូច និង ត្រគៀកតូច ឱ្យមានភាពជឿជាក់លើរូបរាងកាយរបស់ខ្លួនជាងមុន។ នៅក្នុងប្រទេសជប៉ុន នាងជាសហគ្រិនស្រ្តីទី១ ហើយដែលនឹកឃើញគំនិត ក្នុងការបង្កើតខោអាវក្នុង ដែលគិតគូដល់នារី ផ្តល់ភាពជឿជាក់ដល់ពួកគេជាងមុន។
Gomi Haayakwa កើតនៅក្នុងទីក្រុងតូក្យូ ប្រទេសជប៉ុន ឆ្នាំ ១៩៩៥។ នាងមានគំនិតរកស៊ី តាំងពីនៅរៀនថ្នាក់វិទ្យាល័យ ដោយបានច្នៃម៉ូតស្រោមបា លក់។ ដឹងថាខ្លួន ស្រលាញ់ផ្នែកហ្វេស្សិន ធ្វើឱ្យនាងលង់កាន់តែខ្លាំង ផុងកាន់តែជ្រៅលើវិស័យរចនាម៉ូត។ នៅអំឡុងពេលចូលរៀនជំនាញ Graphic Design នៅ Tama Art University នាងបានបង្កើតប្រ៊េនផ្ទាល់ខ្លួន ឈ្មោះថា “feast” នៅឆ្នាំ ២០១៤។
ខោអាវក្នុងនារីដែល Gomi Hayakawa បង្កើតឡើងក្រោមឈ្មោះមួយពិសេសថា “Cinderella busts”។ ហើយគំនិតក្នុងការបង្កើតឡើងនូវប្រ៊េននេះឡើង គឺមកពីស្ថាបនិកស្រ្តីរូបនេះ ជួបប្រទះនូវបញ្ហាខ្លួនឯងផ្ទាល់។ CEO ស្រីរូបនេះ និយាយថា ៖ “ហេតុអ្វីខ្ញុំចាំបាច់ខ្វល់ខ្វាយច្រើនម៉្លេះ អំពីសុដន់របស់ខ្ញុំដែលមានទំហំតូច? ហេតុអ្វី ខ្ញុំមិនអាចធ្វើការជ្រើសរើសអាវទ្រនាប់ cute cute ដូចនារីដទៃ?” នាងបន្តថា “វាជាការពិតហើយ ប្រសិនបើអ្នកមានសុដន់តូច នោះអ្នកនឹងមានគេប្រាប់ឱ្យទិញ អាវទ្រនាប់ ដែលមានទំហំធំជាងខ្លួនមួយលេខ។ ហើយបើទោះបីជាអ្នករកបានទំហំដែលត្រូវជាមួយសុដន់អ្នកក៏ដោយ ក៏ម៉ូតទាំងអស់នោះត្រូវបានរចនាមកដើម្បីកល់ឱ្យឃើញដើមទ្រូងធំ ហើយនៅចុងបញ្ចប់ អ្នកនឹងមិនមើលមកឃើញស្អាតទេ លុះត្រាណាតែដើមទ្រូងរបស់អ្នកមានទំហំធំដែរ”។
ក្រោយអង្គុយគិត គេងគិត និង សូម្បីពេលដើរក៏គិត ទីបំផុត CEO វ័យក្មេងរូបនេះ បានរកឃើញមធ្យោបាយមួយដើម្បីជួយស្រ្តីទាំងអស់ដែលមានសុដន់តូច និង មិនសូវមានដើមទ្រូង ឱ្យមានភាពជឿជាក់មកលើខ្លួនឯងជាងមុន។ Gomi Hayakawa បានបង្កើតប្រ៊េនមួយឈ្មោះ feast ជាខោអាវក្នុង ផលិតជាពិសេសយកចិត្តទៅដាក់ទៅលើនារីមានសុដន់តូច។ ក្នុងនាមជាអ្នកហ៊ានបង្កើតគម្រោងនេះឡើង នាងបាននិយាយថា “មិនថាអ្នកមានសុដន់តូច ឫ ធំទេ វាមិនមែនជាបញ្ហាធំ ក្នុងការកំណត់ថារូបរាងរបស់អ្នកស្អាត ឫ មិនស្អាតឡើយ។ អ្វីដែលសំខាន់ គឺស្រ្តីត្រូវមានភាពជឿជាក់មកលើរូបរាងធម្មជាតិរបស់ពួកគេ និងពេញចិត្តនូវអ្វីដែលធម្មជាតិបានបង្កើតមក”។
ក្នុងនាមជាអ្នកប្រឡូក រកស៊ីនៅក្នុងវិស័យហ្វេស្សិន មួយរូប Gomi Hayakawa មានជំនឿចិត្តយ៉ាងមុតមាំទៅលើអ្វីដែលនាងកំពុងធ្វើ និង ប្រើយុទ្ធសាស្រ្តវាយលុកទីផ្សារតាមរបៀប ផ្លាស់ប្តូរការគិតរបស់មនុស្ស។ ក្រៅពីខោទ្រនាប់ និង អាវទ្រាប់ នាងមានគម្រោងបង្កើតសម្លៀកបំពាក់សម្រាប់ស្រ្តី ដែលមានលក្ខណៈមួយ ធ្វើឱ្យពួកគេទិញពាក់ទៅមានអារម្មណ៍ពិសេស ហើយេគិតថាខោអាវនេះគឺផលិតមកសម្រាប់តម្រូវពួកគេតែម្នាក់គត់ ពោលគឺ “គ្មាននរណាម្នាក់ពាក់ ឈុតនេះ សមស្អាតជាងខ្ញុំទេ”។ នេះហើយជាគំនិត concept បែបចិត្តសាស្រ្ត និង ផ្លាស់ប្តូរការគិតរបស់នារីមកលើរូបរាងពីធម្មជាតិរបស់ពួកគេ។ ចាប់តាំងពីបង្កើតឡើងនៅឆ្នាំ ២០១៤ បើគិតមកទល់ពេលបច្ចុប្បន្នមានរយៈពេល ១០ឆ្នាំគត់ ប្រ៊េន feast របស់ Gomi Hayakawa ទទួលបានការគាំទ្រខ្លាំងពីអតិថិជននារីនៅក្នុងប្រទេសជប៉ុន៕
feast.Tokyo collection by Gomi Hayakawa
