ខ្មែរ
English
ឥណ្ឌា ជាប្រទេសមួយស្ថិតនៅក្នុងទ្វីបអាស៊ី មានវប្បធម៌ និង អរិយធម៌យូរលង់ ដែលជាទីចាប់អារម្មណ៍សម្រាប់ភ្ញៀវទេសចរ ដែលចង់ដឹងចង់ឃើញនូវទិដ្ឋភាពពិតរបស់ប្រទេសនេះ។ ភាកខាងត្បូងប្រទេសឥណ្ឌា សម្បូរទៅដោយព្រៃភ្នំ ហើយភ្នំដែលពិសេសជាងគេគឺភ្នំ ហិមាល័យ។ ប្រទេសនេះមានឆ្នេរសមុទ្រស្រស់ស្អាត គួរជាទីកម្សាន្តសម្រាប់ទេសចរ។ ចំពោះម្ហូបវិញ Indian Cuisine មានភាពល្បីល្បាញនៅជុំវិញពិភពលោក ដូច្នេះប្រសិនបើលោកអ្នកបានទៅលេង កុំភ្លេចសាកម្ហូបរសជាតិដើមរបស់ឥណ្ឌា។
CHENNAI
Chennai ស្ថិតនៅតំបន់ឆ្នេរភាគខាងកើតនៃឈូងសមុទ្រ Bengal និង ជាទីកន្លែងដែលទទួលបានការពេញនិយមយ៉ាងខ្លាំងពីសំណាក់ទេសចរបរទេសដែលបានទៅលេង។ ទីក្រុង Chennai ជាទីក្រុងធំជាងគេទី ៤ នៅក្នុងប្រទេសឥណ្ឌា ហើយក៏ជាទីកន្លែងដែលប្រមូលផ្តុំទៅដោយទីតាំងផ្សាភ្ជាប់វប្បធម៌ និង ប្រវត្តិសាស្រ្ត។ គោលដៅល្បីៗ មានដូចជាប្រាសាទ Kapaleeshwarar និងតំបន់ឆ្នេរ Marina។
HAMPI
ស្ថិតនៅក្នុងរដ្ឋ Karnataka តំបន់ Hampi ជាទីតាំងប្រវត្តិសាស្រ្ត មានប្រាសាទបុរាណគួរជាទីចាប់អារម្មណ៍។ ទៅដល់ទីនោះ លោកអ្នកកុំភ្លេចចូលទស្សនាកន្លែងដែលបានចុះក្នុងបញ្ជីបេតិកភណ្ឌរបស់អង្គការយូណេស្កូ ដែលមានដូចជា Narasimha, Krishna, Ganesa និង ប្រាសាទ Pattabhirama។ អ្នកក៏អាចឡើងទៅលើកំពូលភ្នំ Matanga ដើម្បីទស្សនាទេសភាពដ៏ស្រស់ស្អាតរបស់តំបន់ Hampi និង ទស្សនាថ្ងៃលិចជាដើម។
HYDERABAD
Hyderabad ជាទីក្រុងរបស់រដ្ឋ Telangana នៅក្នុងប្រទេសឥណ្ឌា។ កន្លែងពិសេសដែលមិនគួររំលង នៅពេលអ្នកបានទៅដល់ទីក្រុងមួយនេះ គឺ Golconda Fort ដែលត្រូវបានសាងសង់កាលពីសត្សវត្សន៍ទី ១១ សម័យគ្រប់គ្រងដោយអាណាចក្រ Kakatiya។ ទន្ទឹមនឹងនេះ ប្រាសាទ Birla Mandir និង សារមន្ទីរ Salar Jung Museum ក៏ជាទីស្ថានប្រវត្តិសាស្រ្តគួរឱ្យចាប់អារម្មណ៍ខ្លាំងផងដែរ។
GOA
ស្ថិតនៅតំបន់ឈូងសមុទ្រភាគខាងលិចប្រទេសឥណ្ឌា Goa ជាឆ្នេរដ៏ស្រស់ស្អាតនិងល្បីល្បាញមួយ។ ប្រសិនបើលោកអ្នកមានបំណងចង់រកកន្លែងសម្រាប់សម្រាកកម្សាន្ត មានសមុទ្រ និង ឆ្នេរខ្សាច់ នោះតំបន់ដែលបានរៀបរាប់ខាងលើនេះ នឹងមិនធ្វើឱ្យអ្នកខកបំណងឡើយ។ មិនទាន់អស់នៅឡើយទេ ឆ្នេរផ្សេងៗ រួមមាន Palolem, Baga និង Benaulim ក៏ស្អាតមិនធម្មតាដែរ។ មិនតែប៉ុណ្ណោះ Goa នៅមានទឹកធ្លាក់ Dudhsagar Falls ដែលមានកម្ពស់រហូតដល់ទៅ ៣០០ ម៉ែត្រ និងព្រះវិហារគ្រីស្ទៀន Basilicas of Bom Jesus កសាងឡើងក្នុងអំឡុងឆ្នាំ ១៦០០ ដែលសព្វថ្ងៃជាសម្បត្តិបេតិកភណ្ឌរបស់អង្គការយូណេស្កូ៕
