La Plantation ចម្ការម្រេចស្តង់ដារអន្តរជាតិ ដ៏ល្បីល្បាញ នៅក្នុងខេត្តកំពត

La Plantation ជាចម្ការម្រេច ដ៏ល្បីល្បាញមួយ ដែលមានទីតាំងស្ថិតនៅ ខេត្តកំពត​ ប្រទេសកម្ពុជា។ ចម្ការម្រេចនេះ ក៏ជាគោលដៅទាក់ទាញភ្ញៀវទេសចរជាតិ និង​ អន្តរជាតិ ជួយដល់វិស័យសេដ្ឋកិច្ច និង លើកតម្កើនជីវភាពរបស់ប្រជាជននៅតំបន់នោះ។ ថ្វីត្បិតតែមានចម្ការម្រេចមានច្រើននៅក្នុងខេត្តកំពត ប៉ុន្តែ La Plantation មានចំណុចពិសេសរៀបចំក្លាយទៅជាចម្ការបែបស្តង់ដារអន្តរជាតិ។

រឿងរ៉ាវកកើតឡើងនៃចម្ការម្រេច La Plantation ចាប់ផ្តើមនៅវេលាមួយ ដែលមានប្តីប្រពន្ធមួយគូ ជនជាតិប៊ែលហ្សិក បុរសជាប្តីមានឈ្មោះថា Guy និងស្រ្តីជាប្រពន្ធឈ្មោះ Nathalie បានសម្រេចមករស់នៅក្នុងប្រទេសកម្ពុជា បន្ទាប់ពីចូលនិវត្តន៍​ពីអាជីពការងារជាអ្នក IT។ នៅក្នុងឆ្នាំ 2013 ពួកគេបានបង្កើត project ចម្ការម្រេចនេះឡើង នៅលើដីទំនេរមួយកន្លែងក្នុងខេត្តកំពត។

ប្តីប្រពន្ធមួយគូនេះ បានចាប់ចិត្តស្រលាញ់ប្រទេសកម្ពុជាកាន់តែខ្លាំង ហើយបានផ្តួចផ្តើមបង្កើតគម្រោង សម្រាប់ការអភិវឌ្ឍន៍តំបន់ជនបទ និង ដើម្បីលើកស្ទួយជីវភាពប្រជាជននៅក្នុងសហគមន៍។​ Project បង្កើតចម្ការម្រេចមួយលេចចេញជាផ្លែផ្កា នោះគឺ La Plantation ដើម្បីផ្សព្វផ្សាយដំណាំកសិកម្មរបស់ខ្មែរ ទៅកាន់ឆាកអន្តរជាតិ ក៏ដូចជាចូលរួមលើកតម្កើងកសិផល ម្រេចកំពត ឱ្យកាន់តែមានទីផ្សារខ្លាំងឡើងថែមទៀត។

សព្វថ្ងៃ La Plantation មិនត្រឹមតែជាចម្ការម្រេច ប៉ុណ្ណោះទេ ប៉ុន្តែវាបានក្លាយទៅជាទីតាំងសម្រាប់ទាក់ទាញភ្ញៀវទេសចរដ៏ពេញនិយម នៅក្នុងខេត្តកំពត។​ ចម្ការនេះ ផលិតបាននូវម្រេចកំពត ប្រកបដោយគុណភាពខ្ពស់ ស្របតាមស្តង់ដារអន្តរជាតិ។ ពួកគេបានច្នៃគ្រាប់ម្រេចស្រស់ លាយជាមួយនឹងអំបិល​កំពត ចេញទៅជាផលិតផលកសិកម្មថ្មីមួយ ហៅថា “Fresh Salted Kampot Pepper”។

ដោយសារតែមានការគាំទ្រ និង មានអ្នកចង់ដឹងអំពីរសជាតិរបស់ម្រេចកំពតដ៏ល្បីល្បាញមួយនេះ La Plantation បានសម្រេចបើកជាហាងមួយនៅក្នុងទីក្រុងភ្នំពេញ សម្រាប់តាំងបង្ហាញនូវផលិតផលរបស់ពួកគេ ទៅដល់ភ្ញៀវទេសចរផងដែរ៕