ខ្មែរ
English
Microsoft នឹងបើកមណ្ឌលរក្សាទិន្នន័យ Data Centre នៅក្នុងប្រទេសថៃ។ នេះបើតាមការបញ្ជាក់ពីក្រុមហ៊ុនបច្ចេកវិទ្យាយក្សរបស់អាមេររិក កាលពីពេលថ្មីៗនេះ ដោយគោលដៅសំខាន់ខ្លួនចង់ពង្រឹង ផ្តោតទៅលើសេវាកម្ម cloud services។ មណ្ឌលផ្ទុកទិន្នន័យ នៅក្នុងប្រទេសថៃ នឹងក្លាយជា Data Centre ដំបូងគេប្រចាំតំបន់របស់ក្រុមហ៊ុនបច្ចេកវិទ្យាអាមេរិក។
គួរឱ្យដឹងថា ដំណឹងនៃការបើកមណ្ឌលទិន្នន័យរបស់ Microsoft នៅថៃ កើតឡើងមួយថ្ងៃប៉ុណ្ណោះ ក្រោយពីនាយកប្រតិបត្តិ Satya Nadella បានប្រកាសអំពីការវិនិយោគទៅលើបច្ចេកវិទ្យា Ai និង សេវាកម្ម cloud នៅក្នុងប្រទេសឥណ្ឌូនេស៊ី ដែលត្រូវចំណាយទុនប្រមាណ ១,៧ ពាន់លានដុល្លារ។ ភ្លាមៗនោះ ក្រុមហ៊ុនបច្ចេកវិទ្យាអាមេរិកនេះ បានចេញសេចក្តីប្រកាសមួយថា “មណ្ឌលទិន្នន័យ នៅថៃ នឹងជួយពង្រីកវិសាលភាពនៃការផ្គត់ផ្គង់សេវាកម្ម cloud របស់ខ្លួន”។
ស្របពេលជាមួយគ្នានេះ នាយករដ្ឋមន្រ្តីថៃ លោក ស្រេតថា ថាវីស៊ីន បានឱ្យដឹងថា គម្រោងមណ្ឌលរក្សាទិន្នន័យរបស់ Microsoft គឺកើតឡើងទន្ទឹមគ្នាជាមួយចក្ខុវិស័យរបស់ថៃ ក្នុងការប្រែក្លាយទៅជាប្រទេស ដែលជាមជ្ឍមណ្ឌលសេដ្ឋកិច្ចឌីជីថល។ នាយករដ្ឋមន្រ្តីថៃរូបនេះ បន្ថែមថា ការវិនិយោគរបស់ក្រុមហ៊ុនបច្ចេកវិទ្យាយក្សរបស់អាមេរិក នៅក្នុងប្រទេសខ្លួន គឺពិតជាមានសារៈសំខាន់ណាស់នៅក្នុងបរិបទនៃការកសាងសេដ្ឋកិច្ចឌីជីថល ហើយនឹងធ្វើឱ្យកាន់តែមានការប្រកួតប្រជែងខ្លាំងឡើងថែមមួយកម្រិតទៀត។
ក្នុងនាមជាក្រុមហ៊ុនបច្ចេកវិទ្យាធំជាងគេមួយនៅលើពិភពលោក Microsoft បានដាក់គោលដៅដើម្បី បង្រៀនមនុស្ស ២,៥ លាននាក់ នៅក្នុងតំបន់អាស៊ីអាគ្នេយ៍ឱ្យចេះប្រើ បច្ចេកវិទ្យាបញ្ញាសប្បនិមិត្ត Ai នៅត្រឹមឆ្នាំ ២០២៥៕
