ខ្មែរ
English
Samsung ដែលជាក្រុមហ៊ុនផលិតស្មាតហ្វូនធំបំផុតមួយនៅលើពិភពលោក កំពុងកាន់កាប់តំណែងជាអធិរាជស្មាតហ្វូន Android អស់រយៈពេលប្រមាណ ១០ ឆ្នាំចុងក្រោយនេះ។ ភាពជោគជ័យនៃទូរស័ព្ទ Android របស់ Samsung នោះគឺចាប់ផ្តើមពីម៉ូដែលដំបូង ដែលមានឈ្មោះថា i7500 Galaxy។
Samsung បានបញ្ចេញទូរស័ព្ទ i7500 Galaxy ដែលជាស្មាតហ្វូន Android ដំបូងបំផុតរបស់ខ្លួននៅក្នុងខែ មេសា ឆ្នាំ ២០០៩ ពោលបើគិតមកដល់ក្នុងឆ្នាំ ២០២៤ នេះ វាមានអាយុកាល ១៥ឆ្នាំ។ ម៉ូដែល ទូរស័ព្ទ Android មុនគេរបស់ Samsung នេះ គឺត្រូវបានក្រុមហ៊ុនបច្ចេកវិទ្យាយក្សរបស់កូរ៉េខាងត្បូង បញ្ចេញដាក់លក់នៅលើទីផ្សារ រយៈពេល ៦ ខែ បន្ទាប់ពីមានការចាប់កំណើតនៃទូរស័ព្ទ Android ដំបូងគេ នៅលើពិភពលោក T-Mobile G1 (ផលិតដោយ HTC) ។
Samsung i7500 Galaxy បំពាក់ដោយអេក្រង់ប្រភេទ OLED និងថ្មដែលមានទំហំធំ។ អ្វីដែលកាន់តែគួរឱ្យចាប់អារម្មណ៍នោះ គឺស្មាតហ្វូន Android ដំបូងគេរបស់ Samsung នេះ ដំណើរការដោយ Operation System ស្តុកដើមរបស់ Google តែម្តង ដោយភ្ជាប់មកជាមួយ Qualcomm processor (MSM7200A) ដែលវាស្រដៀងគ្នាទៅនឹង ទូរស័ព្ទរបស់ HTC ដែលបានបញ្ចេញលក់នៅអំឡុងពេលនោះ។
ទូរស័ព្ទនេះ ដំណើរការដោយ Ram ទំហំ ១២៨ MB និងអង្គផ្ទុកទិន្នន័យនៅក្នុងម៉ាស៊ីន ទំហំ ៨ GB ដោយមានរន្ធសម្រាប់បន្ថែម memory ខាងក្រៅផងដែរ។ វាមានកាមេរ៉ាខាងក្រោយទំហំ ៥ Megapixels ជាមួយមុខងារថត autofocus ប៉ុន្តែមិនមានកាមេរ៉ាខាងមុខនោះទេ។ មួយឆ្នាំក្រោយមក នៅក្នុងឆ្នាំ ២០១០ Samsung បានបញ្ចេញ ស្មាតហ្វូនលំដាប់កំពូល ដែលត្រូវបានគេស្គាល់នៅជុំវិញពិភពលោកថាជា Samsung Galaxy S ស្មាតហ្វូនដែលបានត្រួសត្រាយផ្លូវសម្រាប់ភាពជោគជ័យរបស់ក្រុមហ៊ុនបច្ចេកវិទ្យាកូរ៉េខាងត្បូងនៅក្នុងទីផ្សារទូរស័ព្ទ៕
