ការញុំាខុសប្រក្រតីក្នុងវ័យជំទង់

ការញ៉ាំខុសប្រក្រតី គឺជាបញ្ហាដែលក្មេងវ័យជំទង់បច្ចុប្បន្នជួបប្រទះជារឿយៗ ហើយវាត្រូវបានសម្គាល់ដោយអាកប្បកិរិយានៃការញ៉ាំច្រើនលើសលប់​ពេក​ ឬមិនញ៉ាំអ្វីទាល់តែសោះ រហូតដល់ខ្វះអាហាររូបត្ថម្ភសម្រាប់ចិញ្ចឹមរាងកាយ។

បញ្ហានេះត្រូវបានរាប់ចូលជាជំងឺនៃការបរិភោគមិនប្រក្រតី ដែលជាជំងឺធ្ងន់ធ្ងរមួយ ហើយជំងឺនេះមានពីរប្រភេទដែលត្រូវបានគេរកឃើញថាកើតឡើងញឹកញាប់ នោះគឺ ជំងឺ Bulimia Nervosa និង ជំងឺ Anorexia Nervosa ហើយគេរកឃើញថាកើតជាញឹកញាប់បំផុតលើក្មេងជំទង់ស្រីៗ ប៉ុន្តែក្មេងជំទង់ប្រុសក៏ប្រឈមមុខខ្ពស់ផងដែរ។ ជំងឺនេះវាបណ្តាលឱ្យពួកគេពិបាកក្នុងការទទួលស្គាល់លើ របបអាហារផ្ទាល់ខ្លួន ចាញ់ច្រាបសង្គម អត់ទំនុកចិត្តលើខ្លួនឯង និងមានការព្រួយបារម្ភហួសហេតុពេកចំពោះរឿងដែលមិនទាន់កើតឡើង ហើយពេលខ្លះក៏ប្រឈមនឹងបញ្ហាសុខភាពដែលអាចគំរាមកំហែងដល់អាយុជីវិតផងដែរ។

ជំងឺបរិភោគខុសប្រក្រតី៖ ជំងឺនេះត្រូវបានកំណត់សម្គាល់លើទម្លាប់ទទួលទានអាហារនៅក្នុងបរិមាណច្រើនខុសធម្មតាក្នុងរយៈពេលដ៏ខ្លី និងពិបាកក្នុងការគ្រប់គ្រងចំណង់អាហារ។

ជាទូទៅ អ្នកជំងឺប្រភេទនេះតែងមានអារម្មណ៍ខ្មាស់អៀន ពេលទទួលទានអាហារជាមួយអ្នកដទៃ និងពិបាកទទួលទានរបបអាហារធម្មតា មានចំណង់តែចំពោះប្រភេទអាហារ Fast Food ឬ Junk Food ដែលបណ្តាលឱ្យកើនទម្ងន់ខ្លាំង។

រោគ​សញ្ញា​នៃជំងឺ រួម​មាន ទទួលទាន​អាហារ​លឿនៗ​ នឹងញ៉ាំចិបចុបរហូតបើទោះ​បី​ជា​មិន​ឃ្លាន មានអារម្មណ៍ចង់តែលាក់បំពួន​អាហាររបស់ខ្លួន និងមាន​អារម្មណ៍​​ខ្មាស់អៀន​ក្រោយ​ពេល​ញ៉ាំ។

រីឯហានិភ័យចំពោះសុខភាព រួមមាន ប្រឈមបញ្ហាលើសទម្ងន់ខ្លាំង កើតមានជំងឺបេះដូង ជំងឺទឹកនោមផ្អែម ជំងឺលើសឈាម បញ្ហាតម្រងនោម បញ្ហាមាត់ធ្មេញ បញ្ហាក្រពោះវៀន ជាតិស្ករ និងកូលេស្តេរ៉ុលឡើងខ្ពស់ នឹងអាចបណ្តាលឲ្យស្លាប់បាន ក្នុងករណីធ្ងន់ធ្ងរ។។

ជំងឺ Bulimia Nervosa ​ មានរោគសញ្ញាដែលអាចកត់សម្គាល់ តាមរយៈអ្នកជំងឺមានអារម្មណ៍ ស្តាយក្រោយក្រោយពេលទទួលទានអាហាររួច មានអាការៈចង់ក្អួតដែលបណ្ដាលមកផ្លូវអារម្មណ៍ផ្ទាល់ខ្លួន ចូលចិត្តប្រើប្រាស់ថ្នាំបញ្ចុះលាមក តមអាហារជ្រុល ឬការធ្វើលំហាត់ប្រាណច្រើនពេកដើម្បីការពារការឡើងទម្ងន់។

បុគ្គលដែល មាន ជំងឺ Bulimia Nervosa ជាធម្មតាមានទម្ងន់ថេ ក៏ប៉ុន្តែអាកប្បកិរិយាពួកគេនឹងមាន ការប្រែប្រួល ពោលគឺ ពួកគេតែង​លួចញុំា​អាហារ បដិសេធ​ចំពោះអាហារដែលគេផ្តល់ឱ្យ ឬមិន​ញ៉ាំ​នៅ​មុខអ្នកដទៃ ​ទទួលទានអាហារក្នុងបរិមាណ​តិច​បំផុត។

ជំងឺ Anorexia Nervosa គឺជាប្រភេទជំងឹសម្គាល់តាមរយៈអ្នកជំងឺផ្ទាល់មានភាពភ័យខ្លាចនៃការឡើងទម្ងន់ ឬអាចមានការរឹតបន្តឹងចំពោះការទទួលទានអាហារក្នុងកម្រិតមួយតឹងតែងបំផុត និងផ្តោតលើការសម្រកទម្ងន់។ អ្នកជំងឺអាចប្រើប្រាស់ថ្នាំសម្រកទម្ងន់ ថ្នាំបញ្ចុះលាមក​ ប្រើប្រាស់ថ្នាំ​ជំនួយ​ក្នុងការទប់ទល់ចំណង់​អាហារ ឬធ្វើលំហាត់ប្រាណច្រើនលើសលប់ផងដែរ។

ពួកគេច្រើនតែទទួលអារម្មណ៍ខុសធម្មតា ដោយមើលឃើញរូបរាងកាយរបស់ខ្លួនមានសភាពធាត់ខ្លាំង បើទោះបីស្គមខ្លាំងក៏ដោយ។

ហានិភ័យសុខភាពរួមមាន អសមត្ថភាពក្នុងការផ្តោតអារម្មណ៍ បញ្ហាក្រពះពោះវៀន បេះដូង និងតម្រងនោម ជំងឺពុកឆ្អឹង ស្បែកស្ងួត និងសក់ជ្រុះ រាងកាយមានសភាពទន់ខ្សោយ និងប្រឈមការស្លាប់ប្រសិនបើស្ថានភាពធ្ងន់ធ្ងរ។

វិធីបង្ការ៖

ប្រសិនបើអ្នកសង្ស័យថា កូនៗរបស់អ្នកកំពុងមានបញ្ហាក្នុងការទទួលទានអាហារ សូមនាំពួកគេទៅពិគ្រោះជាមួយគ្រូពេទ្យជំនាញ ដើម្បីស្វែងរកដំណោះស្រាយផ្នែកវេជ្ជសាស្រ្ត។

ការព្យាបាលអាចពាក់ព័ន្ធជាមួយ ការប្រើប្រាស់ថ្នាំវេជ្ជសាស្រ្ត ពិគ្រោះផ្នែកបញ្ហាផ្លូវចិត្ត និងត្រួតពិនិត្យរាងកាយ ដោយរួមបញ្ចូលការស្វែងយល់បន្ថែមទៅលើអាហារូបត្ថម្ភ ដើម្បីបង្កើតទម្លាប់ទទួលទានអាហារដែលមានតុល្យភាព។

បន្ថែមពីនេះ ការគាំទ្រពីសំណាក់គ្រួសារ គឺជារឿងដ៏សំខាន់ដើម្បីដំណើរការព្យាបាល ឱ្យមានប្រសិទ្ធិភាពខ្ពស់ នឹងឆាប់ជាសះស្បើយ។ សូមចូលរួមលើកទឹកចិត្ត ប្រើភាសាដ៏សមរម្យ និងមិនរិះគន់លើរូបរាងកាយរបស់ពួកគេ ជាពិសេសធ្វើជាគំរូល្អមួយដែលអ្នកជំងឺអាចយកតម្រាប់តាម។