ខ្មែរ
English
សាលាអន្តរជាតិសៅប្រ៊ីដកម្ពុជា បានបង្កើតកម្មវិធីតាំងពិព័រណ៌អំពីគម្រោងនៃភាពច្នៃប្រឌិតថ្មី ដែលមានឈ្មោះថា “ការរចនាម៉ូតប្រកបដោយនិរន្តរភាព” ដើម្បីចូលរួមការលើកទឹកចិត្តដល់សិស្សានុសិស្សគ្រប់រូបបង្ហាញនូវសមត្ថភាពដ៏អស្ចារ្យទៅភាពច្នៃប្រឌិតនៃម៉ូតសម្លៀកបំពាក់តាមរយៈទេពកោសល្យផ្ទាល់ខ្លួន និងបំផុសគំនិតអំពីម៉ូតសម្លៀកបំពាក់ដែលប្រើប្រាស់នូវសម្ភារៈកែច្នៃឡើងវិញ ជាពិសេសការចេះលេងស្ទីលជាមួយសម្លៀកបំពាក់ដែលកែច្នៃឡើងវិញជាមួយសំណល់ក្រណាត់ជាដើម។
សិស្សានុសិស្សគ្រប់រូប បានលេងស្ទីលសម្លៀកបំពាក់ផ្ទាល់ខ្លួន ទៅតាមចំណង់ចំណូលចិត្ត បោះជំហានដើរបង្ហាញម៉ូតនៅលើកម្រាលព្រំពណ៌ក្រហមក្នុងសាល បង្កប់ដោយភាពក្លានហានបំផុត។ ម៉ូតនីមួយៗ មានភាពខុសប្លែកពីគ្នា និងទាក់ទាញការចាប់អារម្មណ៍យ៉ាងខ្លាំង… អ្វីដែលមិនសរសើរ មិនបាននោះ គឺពួកគេត្រឹមក្មេងជំទង់ ប៉ុន្តែមានគំនិតច្នៃប្រឌិតទៅលើសោភ័ណភាពនៃម៉ូតសម្លៀកបំពាក់ និងមានការតុបតែងខ្លួនយ៉ាងសាកសម។
ព្រឹត្តិការណ៍នេះពោរពេញទៅដោយសកម្មភាពដ៏គួរឱ្យចាប់អារម្មណ៍ជាច្រើន រាប់ចាប់តាំងពីការបង្ហាញគម្រោងច្នៃប្រឌិត រហូតដល់ការប្រកួតប្រជែងដ៏ស្វិតស្វាញ។
គួររម្លឹកផងដែរថា គោលបំណងនៃការបង្កើតកម្មវិធីនេះឡើង គឺដើម្បីអប់រំ និងលើកកម្ពស់ដល់ការស្វែងយល់អំពីផលប៉ះពាល់អវិជ្ជមាននៃសំណល់វាយនភណ្ឌនៃការច្នៃម៉ូតសម្លៀកបំពាក់នៅក្នុងបរិស្ថាន និងសង្គមជាតិ ម្យ៉ាងទៀតដើម្បីបណ្តុះគំនិត និងលើកទឹកចិត្តបន្ថែមការយល់ដឹងអំពីទម្លាប់ប្រើប្រាស់ ។
