ពិព័រណ៍ពាណិជ្ជកម្មអន្តរជាតិ ផ្តល់ផលវិជ្ជមានដល់កម្ពុជា លើវិស័យសេដ្ឋកិច្ច និងបង្កើនកិច្ចសហការល្អពីពាណិជ្ជកម្មអន្តរជាតិ

ពិព័រណ៍អន្តរជាតិស្តីពីកសិកម្ម សត្វចិញ្ចឹម វារីវប្បកម្ម សម្រស់ ឱសថ មន្ទីរពិសោធន៍ ឧបករណ៍វេជ្ជសាស្រ្ត អាហារ និងភេសជ្ជៈ និងឧស្សាហកម្មសត្វចិញ្ចឹមបានរួមចំណែកយ៉ាងសំខាន់ក្នុងការជំរុញការធ្វើពាណិជ្ជកម្មនិងសេដ្ឋកិច្ចកម្ពុជាពិសេសលើវិស័យកសិកម្ម និងសុខាភិបាលឱ្យកាន់តែប្រសើរឡើងបន្ថែមទៀត។ ហើយពិព័រណ៍នេះត្រូវបាន បើកដំណើរការជាផ្លូវការនាព្រឹកថ្ងៃទី២៨ ខែសីហា ឆ្នាំ២០២៤ នៅមជ្ឃមណ្ឌលពិព័រណ៍ និងសន្និបាតកោះពេជ្រ។

បើតាមការលើកឡើងរបស់លោក វីន នី នាយកគ្រប់គ្រងក្រុមហ៊ុន VEAS បានអោយដឹងថា ការតាំងពិព័រណ៍នេះ មានក្រុមហ៊ុនចូលរួមជាង ១៥០ ដែលមកពីជាង ១០ប្រទេសផ្សេងគ្នា រួមាន កម្ពុជា ,បេឡារូស, ចិន,កូរ៉េ , ម៉ាឡេស៊ី, ហុល្លង់, ប៉ូឡូញ, រុស្សី, តៃវ៉ាន់, ថៃ, អាមេរិកនិង វៀតណាម បានចូលរួម។ ទាំងនេះគឺជាវេទិកាមួយសម្រាប់អោយអ្នកជំនួញលើវិស័យ កសិកម្ម សម្រស់ ឱសថ មន្ទីរពិសោធន៍ ឧបករណ៍វេជ្ជសាស្រ្ត អាហារ និងភេសជ្ជៈ ឧស្សាហកម្មសត្វចិញ្ចឹមក្នុងប្រទេសកម្ពុជា និងអន្តរជាតិ។ វាក៏ជាឱកាសដើម្បីអភិវឌ្ឍន៍ជំនួញ និងបង្កើនទំនាក់ទំនងទៅកាន់ទីផ្សារអន្តរជាតិ។

លោករំពឹងថាពិព័រណ៍នេះនឹងមានភ្ញៀវចូលរួមប្រមាណជាង៤៥០០នាក់មកពីទូទាំងប្រទេសកម្ពុជា និងបណ្តាប្រទេសក្នុងតំបន់ដែលនឹងក្លាយជាវេទិកាអាជីវកម្មផ្តាច់មុខសម្រាប់សហគ្រាសកម្ពុជាក្នុងការអភិវឌ្ឍអាជីវកម្មនិងបណ្តាញអន្តរជាតិរបស់​​ពួកគេ។

ចំពោះ លោក សំហេង បូរ៉ា រដ្ឋលេខាធិការក្រសួងពាណិជ្ជកម្ម បានមានប្រសាសន៍ថា ពិព័រណ៍នេះមានសារសំខាន់ណាស់ ជាពិសេសក្នុងការជំរុញកិច្ចសហប្រតិបត្តិការសេដ្ឋកិច្ច ពាណិជ្ជកម្ម ដែលជាផ្នែកមួយនៃការលើកកម្ពស់តម្លៃនៃកិច្ចសហប្រតិបត្តិការទ្វេភាគីក្នុងស្មារតី ជំរុញទំនាក់ទំនងមិត្តភាព និងកិច្ចសហប្រតិបត្តិការស៊ីជម្រៅ។ ព្រឹត្តិការណ៍នេះនឹងនាំមកនូវឱកាសរួមគ្នាសម្រាប់ធុរកិច្ច ការវិនិយោគ និងកិច្ចសហប្រតិបត្តិការស្វែងរកផលប្រយោជន៍រួមក្នុងក្របខ័ណ្ឌនៃកិច្ចព្រមព្រៀងពាណិជ្ជកម្មសេរី ក៏ដូចជាក្របខ័ណ្ឌនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់។

សម្រាប់ លោក ឃុន សាវឿន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ថា រាជរដ្ឋាភិបាលកម្ពុជា មានចក្ខុវិស័យរយៈពេលវែង ដើម្បីប្រែក្លាយកម្ពុជា ទៅជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសដែលមានចំណូលខ្ពស់នៅឆ្នាំ២០៥០។

សូមជម្រាបថា នៅក្នុងព្រិត្តិការណ៍ពិព័រណ៍ពាណិជ្ជកម្មអន្តរជាតិប្រចាំឆ្នាំ រៀបចំឡើងដោយក្រុមហ៊ុន Minh Vi Exhibition and Advertising Services Co.,Ltd (VEAS) ដែលទទួលបានការគាំទ្រពីក្រសួងពាណិជ្ជកម្ម ក្រសួងកសិកម្ម រុក្ខាប្រមាញ់ និងនេសាទ ក្រសួងសុខាភិបាល សមាគមពាណិជ្ជកម្មកម្ពុជា សមាគមអ្នកចិញ្ចឹមសត្វកម្ពុជា (CLRA) សមាគមសហព័ន្ធកសិករកម្ពុជា (CFAP) សមាគមអ្នកចិញ្ចឹមវារីវប្បកម្មកម្ពុជា (CAA) សម្ព័ន្ធសហប្រតិបត្តិការកសិកម្មកម្ពុជា (CACA) សមាគមជាងកាត់សក់ និងកែសម្ផស្សនៅកម្ពុជា សមាគមអភិវឌ្ឍន៍មន្ទីរពិសោធន៍វេជ្ជសាស្រ្ត (AMLD) សមាគមផលិតចំណីអាហារកម្ពុជា (CFMA) និងទីភ្នាក់ងារឯកទេស និងសមាគមផ្សេងៗទៀត។