រូបចម្លាក់ ប្រាសាទបុរាណ និង វប្បធម៌ដ៏ល្អផូរផង់របស់កម្ពុជា លេចមុខលេចមាត់ នៅ Gardens by the Bay ប្រទេសសិង្ហបុរី

រូបចម្លាក់ ប្រាសាទបុរាណ និង វប្បធម៌ដ៏ល្អផូរផង់របស់កម្ពុជា ត្រូវបានដាក់តាំងបង្ហាញឱ្យមហាជនទស្សនានៅ សួនឧទ្យានល្បីល្បាញ Gardens by the Bay ក្នុងប្រទេសសិង្ហបុរី។ ដោយការដាក់ទាំងបង្ហាញសម្បត្តិវប្បធម៌របស់កម្ពុជានេះ ត្រូវបានគេដាក់ឈ្មោះថា “Orchids of Angkor Wat”។

“Orchids of Angkor Wat” ជាការសហការគ្នារវាង Gardens by the Bay និងស្ថានទូតកម្ពុជាប្រចាំសិង្ហបុរី ក្នុងគោលបំណងផ្សព្វផ្សាយវប្បធម៌កម្ពុជា ទៅកាន់ឆាកអន្តរជាតិ ក៏ដូចជាពិភពលោក។ ស្ថិតនៅតំបន់ Could Forest នៃឧទ្យាន Gardens by the Bay រូបចម្លាក់ ប្រាសាទបុរាណ និង វប្បធម៌របស់កម្ពុជា បានទាក់ទាញចំណាប់អារម្មណ៍យ៉ាងខ្លាំងពីសំណាក់ប្រជាជនសិង្ហបុរី និង ភ្ញៀវទេសចរអន្តរជាតិ ដែលទៅដើរកម្សាន្តនៅទីនោះ។

នេះជារឿងដែលគួរសាទរ និង មានមោទកភាពដែល សម្បត្តិវប្បធម៌ និង ប្រពៃណីកម្ពុជា ត្រូវបានបង្ហាញនៅក្នុងប្រទេសសិង្ហបុរី ដែលជាប្រទេសគោលដៅទេសចរល្បីល្បាញនៅលើពិភពលោក។ ព្រឹត្តិការណ៍ “Orchids of Angkor Wat” ប្រព្រឹត្តទៅចាប់ពីថ្ងៃទី ១៧ ខែឧសភា ដល់ ថ្ងៃទី៨ ខែកញ្ញា ឆ្នាំ ២០២៤ នៅ Orchid Haven, Cloud Forest ឧទ្យាន Gardens by the Bay ប្រទេសសិង្ហបុរី៕