សក់គឺជាមន្តស្នេហ៍របស់មនុស្សស្រី

ស្ត្រី ប្រមាណ ៩០% ទូទាំងពិភពបានចាត់ទុកសក់របស់ខ្លួនសំខាន់ប្រៀបដូចជាកូនស្រីបង្កើត។ ពួកគេបានរិះរកគ្រប់វិធីដើម្បីថែរក្សាសក់ឱ្យទទួលបានសុខភាពល្អ​ ក្រាស់ឃ្មឹក មិនបែកចុង ឬសំពោង និងមានទម្ងន់ធ្ងន់ប្រកបដោយភាពរលើបរលោងគួរឱ្យចង់ប៉ះ។ ប៉ុន្តែ ក៏មានស្រ្តីមួយចំនួនមិនបានស្វែងយល់លម្អិតទៅលើវិធីដែលត្រឹមត្រូវតាមក្បួនខ្នាត មិនថាជាការថែរក្សាសរសៃសក់ពីស្រទាប់ខាងក្រៅ ឬការទទួលសារជាតិល្អៗពីរបបអាហារដែលអ្នកបរិភោគចូលក្នុងប្រព័ន្ធរាងកាយ ពួកគេនៅតែមានចម្ងល់ថា ហេតុអ្វីបានជាខ្ញុំមិនទទួលបានសក់ដែលមានសុខភាពល្អ ស្រស់ស្អាតតាមបែបធម្មជាតិ? តើមានវិអីអ្វីផ្សេងដើម្បីទទួលបានផលយ៉ាងពិតប្រាកដដែរទេ?

នេះប្រហែលជាចម្លើយដែលអ្នកត្រូវការ ឡេឌីស៍សូមធ្វើការបង្ហាញនូវគន្លឹះខ្លះៗ ដែលបានសិក្សាស្រាវជ្រាវជូនជាប្រយោជន៍ដល់សុភាពនារីៗដែលស្រឡាញ់សក់ និងចង់ឱ្យសក់ទទួលបាននូវភាពស្រស់ស្អាតយ៉ាងពិតប្រាកដនៅខាងក្រោមនេះ។

ទទួលទានអាហារសម្បូរជីវជាតិចិញ្ចឹមសរសៃសក់    

យោងតាម លោក ​​Michelle Blaisure -វេជ្ជបណ្ឌិតឯកទេសខាងផលិតផលសម្រាប់ថែរក្សាសក់ និងអ្នកជំនាញ Trichologist ដែលទទួលបានវិញ្ញាបនបត្រទៅលើ Bosley Professional Strength បានបង្ហាញថា ការទទួលទានរបបអាហារដែលផ្ទុកនូវជាតិខ្លាញ់ពីធម្មជាតិ ដូចជាប្រេងអូលីវ និងអូមេហ្គា-3s គឺមានសារៈសំខាន់ចំពោះសរសៃសក់ និងស្បែកក្បាលរបស់អ្នក ដោយវាបានផ្ទុកនូវជីវជាតិចាំបាច់សម្រាប់សក់។ សូមប្រាកដថាអ្នកទទួលបាននូវប្រូតេអ៊ីនដែលមានគុណភាពល្អ ក្នុងនោះរួមមាន ត្រីសាម៉ុង ផ្លែបឺរ គ្រាប់ធញ្ញជាតិ បន្លែ និងផ្លែឈើ ដើម្បីទទួលបានសារធាតុចិញ្ចឹមសំខាន់ៗទាំងអស់ដែលត្រូវការសម្រាប់ការលូតលាស់សរសៃសក់ឱ្យកាន់តែរឹងមាំ។

ជ្រើសរើសសាប៊ូកក់សក់ និងក្រែមបន្ទន់សក់ឱ្យសមស្របនឹងប្រភេទស្បែកក្បាល

ការជ្រើសរើសសាប៊ូកក់សក់ និងក្រែមបន្ទន់សក់ឱ្យបានត្រឹមត្រូវជាមួយស្បែកក្បាលរបស់អ្នក គឺពិតជាសំខាន់ណាស់ ព្រោះថាសារធាតុនៅក្នុងផលិតផលទាំងនោះដើរតួនាទីក្នុងការថែរក្សាសរសៃសក់តាមប្រភេទស្បែកក្បាលផ្សេងៗគ្នា ដើម្បីបង្កើនសរសៃសក់ឱ្យកាន់តែមានរូបរាងក្រាស់ និងបន្ថែមពន្លឺចែងចាំងមិននឹកស្មានដល់។

កាត់បន្ថយស្រ្តេស  

ស្ត្រេស អាចជាកត្តាសំខាន់ដែលធ្វើឱ្យអ្នកមានបញ្ហាជ្រុះសក់ និងឡើងអង្កែជាញឹកញាប់។ វាអាចរអាចបណ្តាលឱ្យមានការរលាកទៅលើឬសគល់សរសៃសក់ ដែលអាចរំខានដល់ដំណើរការលូតលាស់សរសៃសក់តាមរយៈសារធាតុ Endocrine និង Neuroimmune ដូចជា Cortisol និងអរម៉ូនដែលបញ្ចេញ Corticotropin ។

ការលូតលាស់នៃសក់មានបីដំណាក់កាល៖

1. Anagen: ដំណាក់កាលសកម្មដែលសក់ដុះចេញពីឬសគល់នៅស្បែកក្បាល

2. Catagen: ដំណាក់កាលដែលពាក់ព័ន្ធនឹងការខូច ឬឆេះសរសៃសក់ (Apoptosis) នៅគល់សក់

3. Telogen៖ ដំណាក់កាល​សម្រាក​ដែល​ឬស​សក់លែងមានការវិវត្តន៌ ហើយ​មិន​មាន​ការលូតលាស់បន្តទៀត។