ស្វាគមន៍ជើងហោះហើរត្រង់របស់ Etihad Airways មកដល់អាកាសយានដ្ឋានអន្តរជាតិតេជោ

នាព្រឹកថ្ងៃទី ០៤ ខែតុលា ឆ្នាំ ២០២៥ កម្ពុជា បានទទួលស្វាគមន៍ការមកដល់ជើងហោះហើរត្រង់លើកដំបូងរបស់ និងជាប្រវត្តិសាស្ត្ររបស់ក្រុមហ៊ុនអាកាសចរណ៍ Etihad Airways លំដាប់ពិភពលោកពីទីក្រុងអាប៊ូដាប៊ី ប្រទេសអារ៉ាប់រួម មកកាន់ព្រលានយន្តហោះអន្តរជាតិតេជោ។

ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានថ្លែងថា៖ ការតភ្ជាប់ជើងហោះកម្រិតពិភពលោកនេះ ពិតជាបានឆ្លើយតបទៅនឹងតម្រូវការចាំបាច់នូវកំណើនភ្ញៀវទេសចរមកកាន់កម្ពុជា ជាពិសេស គឺឆ្លើយតបទៅនឹងការជឿនលឿនយ៉ាងឆាប់រហ័សក្នុងវិស័យអាកាសចរណ៍របស់កម្ពុជានាប៉ុន្មានឆ្នាំចុងក្រោយនេះ។

បើតាមការបញ្ជាក់របស់ក្រុមហ៊ុន Etihad Airways (Cambodia) ជើងហោះហើរត្រង់ជាលើកដំបូងពីទីក្រុងអាប៊ូដាប៊ី មកកាន់រាជធានីភ្នំពេញរបស់ក្រុមហ៊ុនអាកាសចរណ៍កម្រិតពិភពលោក Etihad Airways នាពេលនេះទទួលបានអ្នកដំណើរសរុបចំនួន ១៥៤នាក់ និងអ្នកដំណើរដែលត្រូវអញ្ជើញត្រឡប់ទៅវិញមានចំនួន ៩០នាក់ ដោយចំណាយពេលក្នុងការហោះហើរជាង ៧ម៉ោងមិនឈប់។ ជើងហោះហើរនេះមានចំនួន ៤ជើង ក្នុង១សប្តាហ៍។

សូមជម្រាបជូនថា Etihad Airways គឺជាក្រុមហ៊ុនអាកាសចរណ៍អន្តរជាតិមួយ របស់ប្រទេសអារ៉ាប់រួម (United Arab Emirates) ដែលមានមូលដ្ឋាននៅទីក្រុង Abu Dhabi។ ក្រុមហ៊ុននេះ ត្រូវបានបង្កើតឡើងនៅឆ្នាំ២០០៣ និងក្លាយជាផ្នែកសំខាន់ក្នុងការផ្លាស់ប្តូរទីក្រុង Abu Dhabi ឱ្យក្លាយជាមជ្ឈមណ្ឌលអាកាសចរណ៍អន្តរជាតិ។