ខ្មែរ
English
ដោយគិតត្រឹមឆមាសទី១ ឆ្នាំ២០២៤នេះ ធនាគារអភិវឌ្ឍន៍ជនបទ និងកសិកម្ម (ARDB) បានផ្តល់ឥណទានប្រមាណ ៤៤០លានដុល្លារ ទៅដល់វិស័យកសិកម្ម ដើម្បីជំរុញការដាំដុះ ផលិត និងកែច្នៃ សម្រាប់ផ្គត់ផ្គង់ក្នុងស្រុក និងនាំចេញ។ នេះបើយោងតាមការចុះផ្សាយរបស់ Fresh News នាថ្ងៃទី២៦ ខែកក្កដា ឆ្នាំ២០២៣។
លោកបណ្ឌិត កៅ ថាច ប្រតិភូរាជរដ្ឋាភិបាល ទទួលបន្ទុកជាអគ្គនាយកធនាគារ ARDB បានឱ្យដឹងថា ការផ្តល់ឥណទានដល់កសិករ និងអ្នកកែច្នៃក្នុងទំហំទឹកប្រាក់ប្រមាណ៤៤០ លានដុល្លារនេះ ដោយមើលឃើញពីតម្រូវការផ្នែកហិរញ្ញវត្ថុលើវិស័យកសិកម្ម ហេតុនេះហើយទើបរាជរដ្ឋាភិបាល តាមរយៈក្រសួងសេដ្ឋកិច្ចនិងហិរញ្ញវត្ថុ បានផ្តល់នូវកញ្ចប់ហិរញ្ញប្បទានជាបន្តបន្ទាប់ដល់ធនាគារអភិវឌ្ឍន៍ជនបទ និងកសិកម្ម ក្នុងការផ្តល់ឥណទានទៅលើវិស័យកសិកម្ម ដើម្បីបង្កើនផលិតកម្ម ការកែច្នៃ សំដៅដល់ការជំរុញនាំចេញផលិតផលកសិផលទៅកាន់ទីផ្សារអន្តរជាតិឱ្យបានកាន់តែច្រើន។
លោកបន្តថា រាជរដ្ឋាភិបាលតាមរយៈធនាគារកសិកម្មនិងអភិវឌ្ឍន៍ជនបទ តែងតែយកចិត្តទុកដាក់ក្នុងការផ្តល់លទ្ធភាពផ្នែកឥណទានដល់កសិករ និងអ្នកកែច្នៃ ដើម្បីជំរុញការដាំដុះ ការចិញ្ចឹមសត្វ ជាពិសេសដើម្បីលើកកម្ពស់ផលិតភាពក្នុងវិស័យនេះ ឱ្យមានការនាំចេញកាន់តែច្រើនឡើង។
ជាមួយគ្នានេះ លោកបានឱ្យដឹងទៀតថា កាលពីពេលថ្មីៗធនាគារ ARDB ក៏បានចុះហត្ថលេខាលើអនុស្សរណៈយោគយល់គ្នា ជាមួយសាជីវកម្មធានារឥណទាន ដើម្បីបង្កើនការផ្តល់ឥណទាន ឱ្យបានច្រើនដល់អ្នកផលិត ដាំដុះ កែច្នៃ ព្រោះ អ្នកផលិតខ្លះពុំមានទ្រព្យគ្រប់គ្រាន់ ដើម្បីដាក់បញ្ចាំក្នុងការទទួលបានឥណទាននោះទេ។
យោងតាមរបាយការណ៍របស់ក្រសួងកសិកម្ម ក្នុងឆមាសទី១ ឆ្នាំ២០២៤ កម្ពុជាបាននាំចេញកសិផលជាង៦លានតោនទៅកាន់ទីផ្សារ គោលដៅចំនួន ៧៧ ប្រទេសទូទាំងពិភពលោក កើនឡើងជិត ៦០ភាគរយ ធៀបនឹងឆមាសទី១ ក្នុងឆ្នាំ២០២៣ ដែលជាកំណើនមិនធ្លាប់មានពីមុនមក ក្នុងរយៈពេល ៥ឆ្នាំចុងក្រោយនេះ៕
