មុនជ្រើសរើសផលិតផលថែរក្សាស្បែក… អ្នកគួរស្វែងយល់អំពីសារធាតុផ្សំ និងប្រសិទ្ធិភាពជាមុនសិន!

ប្រាកដណាស់ ស្បែកមុខ និងស្បែកខ្លួនរបស់អ្នកចាំបាច់គឺត្រូវការផលិតផលថែរក្សាបន្ថែម ដើម្បីជាជំនួយការថែទាំស្បែក ក៏ដូចជាការពារស្បែកពីការរងឥទ្ធិពលផ្សេងៗដែលបណ្តាលមកពីបរិស្ថានជុំវិញខ្លួន រួមមាន កម្តៅព្រះអាទិត្យ ខ្យល់អាកាសកង្វក់ ទម្លាប់មិនល្អប្រចាំថ្ងៃ និងការទទួលទានរបបអាហារដែលមិនមានសុខភាពល្អ។ លើសពីនេះនៅពេលដែលវ័យរបស់អ្នកកាន់តែជ្រេទៅរកភាពចាស់ អ្នកគឺត្រូវការផលិតផលទាំងនោះក្នុងការទប់ស្កាត់ការវិវត្តន៍នៃស្បែកជ្រួញ ស្ងួត ស្រអាប់ ជាពិសេសស្បែកយារធ្លាក់។

វាជារឿងសំខាន់ដែលអ្នកត្រូវស្វែងយល់អំពីសារធាតុផ្សំនៅក្នុងផលិតផលថែរក្សាស្បែកដែលបានជ្រើសរើសយកមកប្រើប្រាស់នៅលើស្បែករបស់អ្នក។ មានផលិតផលនៅលើទីផ្សារជាច្រើនបានឈរជើងដាក់លក់ពាសពេញ ប៉ុន្តែសំណួរសួរថា តើផលិតផលទាំងនោះពិតជាមានប្រសិទ្ធិភាពពិតប្រាកដ ឬគ្រាន់ជាការបំផ្លើស?

វេជ្ជបណ្ឌិតជំនាញខាងសើស្បែកបានធ្វើការសិក្សាស្រាវជ្រាវទៅលើសារធាតុផ្សំទាំងប៉ុន្មានខាងក្រោនេះ ដែលគេឧស្សាហ៍ឃើញមាននៅក្នុងផលិតផលថែរក្សាស្បែកជាញឹកញាប់ ហើយបើកបង្ហាញថា តើវាមានប្រសិទ្ធិភាពថែទាំស្បែករបស់អ្នកដែរឬទេ?

Alpha-Lipoic Acid
រាងកាយរបស់អ្នកបង្កើតសារធាតុគីមីធម្មជាតិនេះដោយខ្លួនឯង ហើយវាមាននៅក្នុងគ្រប់ទម្រង់កោសិកាទាំងអស់នៃរូបរាងកាយ។ វាជាសារធាតុប្រឆាំងអុកស៊ីតកម្ម ដែលឆ្លើយតបទៅនឹងរ៉ាឌីកាល់សេរីទាំងអស់នៃរាងកាយ ហើយនៅក្នុងផលិតផលថែរក្សាស្បែក វាត្រូវបានគេចាត់ទុកថាជាសារធាតុម្យ៉ាងដែលអាចជួយលុបបំបាត់ស្នាមជ្រួញ បង្រួមរន្ធញើស និងធ្វើឱ្យស្បែកភ្លឺថ្លា។

Green Tea Extract
វាមានផ្ទុកនូវសារធាតុចិញ្ចឹមម្យ៉ាងដែលហៅថា Polyphenols ហើយសារធាតុនេះត្រូវបានអ្នកវិទ្យាសាស្រ្តរកឃើញថា នៅពេលដែលដាក់ផ្សំចូលទៅក្នុងផលិតផលថែរក្សាស្បែក វាមានតួនាទីការពារស្បែកអ្នកពីការដុតកម្លោចស្បែកដោយពន្លឺព្រះអាទិត្យ កាត់បន្ថយស្បែរយារធ្លាក់ និងភាពចាស់នៃស្បែក។

Retinol
សារធាតុនេះផលិតចេញពីវីតាមីន A ហើយវាគឺជាគ្រឿងផ្សំដ៏សំខាន់មួយនៅក្នុងផលិតផលថែរក្សាស្បែក។ Retinol ដើរតួនាទីយ៉ាងសំខាន់ក្នុងការជួយបង្កើនបរិមាណកូឡាជែននៃរាងកាយរបស់អ្នក ព្រមទាំងបង្រួមស្បែក កាត់បន្ថយស្នាមជ្រួញ និងរក្សាសំណើមនៅលើផ្ទៃមុខ។ វិធីល្អ អ្នកគយរប្រើប្រាស់វានៅពេលយប់ និងប្រើប្រាស់ឡេការពារកម្តៅថ្ងៃនៅពេលថ្ងៃ។

វីតាមីន C
នៅពេលវ័យរបស់អ្នកកាន់តែចាស់ ការបង្កើតកូឡាជែន និងអេឡាស្ទីននៅក្នុងរាងកាយកាន់តែកាត់បន្ថយបន្តិចម្តងៗ ប៉ុន្តែជាដំណឹងល្អសារធាតុប្រឆាំងអុកស៊ីតកម្មនៅក្នុងវីតាមីន C អាចជួយបង្កើនបរិមាណកូឡាជែនឡើងវិញ និងកាត់បន្ថយស្នាមជ្រីវជ្រួញនៃស្បែកវ័យចំណាស់។

Alpha-hydroxy Acids (AHAs)
នៅក្នុងក្រុមនេះ រួមមានសារធាតុដូចជា Glycolic, Lactic, Citric និង Tartaric Acids ។ ពួកវាគឺជាប្រភពនៃសារធាតុសម្រាប់ជម្រុះកោសិកាចាស់ៗ ឬកោសិកាខូចខាត ស្នាមអុចខ្មៅៗ និងសភាពពណ៌សាច់មិនស្មើគ្នា។ សារធាតុនេះអាចធ្វើឱ្យស្បែករបស់អ្នករលាក និងស្ងួតនៅពេលដែលអ្នកប្រើប្រាស់ច្រើនលើសកម្រិតនៃការណែនាំរបស់អ្នកជំនាញសើស្បែក ដូច្នេះសូមប្រើប្រាស់ AHAs យូរៗម្តងបានហើយ កម្រិតរយៈពេលឱ្យបានត្រឹមត្រូវ។

Salicylic Acid
សារធាតុនេះមានប្រសិទ្ធិភាពជ្រាបចូលទៅក្នុងរន្ធញើស ហើយកាត់បន្ថយមុនក្បាលខ្មៅ និងមុនខ្ទុះធំៗដែលកើតឡើងដោយសារការរលាក វាប្រៀបដូចទៅនឹង AHAs បានចូលរួមជម្រុះកោសិកាស្បែកចាស់ៗ កាត់បន្ថយភាពចាស់នៃស្បែក។ ប្រសិនបើអ្នកមានប្រតិកម្មជាមួយថ្នាំអាំស្ពីរីន ឬអ្នកកំពុងមានផ្ទៃពោះ និងបំបៅទារក សូមចៀសវាងការប្រើប្រាស់សារធាតុមួយនេះ។

Hyaluronic Acid
ចំពោះផលិតផលដែលមានផ្ទុក Hyaluronic Acid អាចជួយឱ្យស្បែករបស់អ្នករលោង ភ្លឺថ្លា និងមានសំណើម បន្ថែមពីលើនេះពួកវានឹងមានប្រសិទ្ធភាពទ្វេដង នៅពេលអ្នកប្រើប្រាស់ជាមួយវីតាមីន C ។

​