មកស្វែងយល់ និងដោះស្រាយបញ្ហា ស្រ្តីងាយបាត់បង់ចំណង់ផ្លូវភេទ!

យោងតាមការសិក្សាស្រាវជ្រាវថ្មីៗនេះបានបង្ហាញឱ្យដឹងថា ស្ត្រីទំនងជាឆាប់បាត់បង់ចំណង់ផ្លូវភេទជាជាងបុរស។ អ្នកវិទ្យាសាស្រ្តក៏បានលើកឡើងថា​ បុរសមានចំណង់ផ្លូវភេទខ្លាំងក្លា និងចង់ធ្វើការរួមភេទច្រើនជាងស្ត្រីជាទូទៅ។​

ជូនចំពោះស្រ្តី

តើអ្នកធ្លាប់ចោទជាសំនួរសិចខ្លះៗមកលើខ្លួនឯងទេ? ដូចជា តើហេតុអ្វីបានជាខ្ញុំបាត់បង់ការចាប់អារម្មណ៍ខាងផ្លូវភេទ?​ ហេតុអ្វីខ្ញុំគ្មានចំណង់ពុះកញ្ច្រោលក្នុងប្រព្រឹត្តសិចដូចមុន?

ជាទូទៅចំណងផ្លូវភេទស្រ្តីធ្លាក់ចុះ អាចកើតមានក្នុងអំឡុងចន្លោះប៉ុន្មានឆ្នាំមុន និងក្រោយឈានចូលដល់វ័យអស់វដ្តរដូវ។ ការរួមភេទតិច ក៏អាចជាកត្តាប៉ះពាល់ដល់ផ្លូវចិត្តស្រ្តីគ្រប់វ័យដូចគ្នា។ ដូច្នេះ​ តើកត្តាអ្វីដែលជាមូលហេតុចម្បងបណ្តាលឱ្យអ្នកបាត់បង់ចំណង់ផ្លូវភេទ?

សូមអាននូវមូលហេតុខាងក្រោមមួយចំនួនដែលឡេឌីស៍បានធ្វើការសិក្សាស្រាវជ្រាវក្នុងគោលបំណងចែកជូនជាចំណេះដឹងផ្នែកភេទសម្ព័ន្ធ។

1. ការផ្លាស់ប្តូររបទជីវិត

ការបង្កកំណើត និងក្រោយពេលសម្រាលផ្ទៃពោះ ឬអស់វដ្តរដូវអាចជះឥទ្ធិពលលើចំណង់ផ្លូវភេទរបស់ស្ត្រីយ៉ាងខ្លាំងនៅក្រោមហេតុផលជាច្រើន។ កម្រិតអរម៉ូនរបស់ស្ត្រីបានធ្វើការប្រែប្រួលក្នុងអំឡុងពេលទាំងនោះ។ ស្ត្រីមានភាពតានតឹង ធុញធប់ ព្រោះថារបទដំណើរជីវិតរបស់គេបានធ្វើការផ្លាស់ប្តូរថ្មីភ្លាមៗ និងប្រែប្រួលលើសពីការរំពឹងរបស់ពួកគេទៅទៀត។ ស្ត្រី​ប្រហែល​ជា​មិន​មាន​អារម្មណ៍​ថា​មាន​ទំនុក​ចិត្ត ​ឬ​សុខ​ស្រួល​ក្នុង​ខ្លួននៅពេលប្រព្រឹត្តការរួមភេទឡើយ ពួកគេអាចប្រឈមនឹងការឈឺចាប់ក្នុងអំឡុងពេលរួមភេទដូចគ្នា។

2. ការប្រើប្រាស់ថ្នាំអ័រម៉ូន

ថ្នាំមួយចំនួនអាចកាត់បន្ថយចំណង់ផ្លូវភេទស្រ្តី។ ពួកគេរួមបញ្ចូលសារធាតុ SSRI និង SNRI ដូចជាប្រភេទថ្នាំព្យាបាលជំងឺបាក់ទឹកចិត្ត ឬអាចជាប្រភេទថ្នាំតាមវេជ្ជបញ្ជារបស់មន្ទីរពេទ្យសម្រាប់អ្នកជំងឺខ្សោយបេះដូង ថ្នាំឡើងសម្ពាធឈាម និងថ្នាំកាត់បន្ថយកូលេស្តេរ៉ុលខ្ពស់ក្នុងឈាម…។ដូច្នេះ ប្រសិនបើអ្នកគិតថា ចំណង់ផ្លូវភេទរបស់អ្នកធ្លាក់ចុះ បន្ទាប់ពីអ្នកចាប់ផ្តើមប្រើថ្នាំប្រភេទថ្នាំថ្មីៗ សូមពិគ្រោះជាមួយវេជ្ជបណ្ឌិតឱ្យបានច្បាស់ថា តើប្រភេទថ្នាំទាំងនោះមានផលប៉ះពាល់ និងផលរំខានដល់ចំណង់ផ្លូវភេទដែរឬទេ? ប្រសិនបើមានផលរំខាន តើអាចមានការផ្លាស់ប្តូរប្រភេទថ្នាំណាផ្សេងទៀតទេ?

3. ទម្លាប់នៃការរស់នៅប្រចាំថ្ងៃ

ការ​គេង​មិន​លក់​រ៉ាំរ៉ៃអាច​បំផ្លាញ​ចំណង់​ផ្លូវ​ភេទរបស់ស្ត្រី។ ការទទួលរងភាពហត់នឿយ ពីការមើលថែកុមារតូចៗ ឬឪពុកម្តាយដែលមានវ័យចំណាស់ ការចុះខ្សោយកម្លាំងដោយសារជំងឺផ្សេងៗ ឬធ្លាប់ទទួលរងការវះកាត់លើរូបរាងកាយ។ ខណៈពេលដែលស្ត្រីបរិភោគស្រាមួយកែវដើម្បីបន្ធូរអារម្មណ៍តានតឹង និងធ្វើឱ្យមានអារម្មណ៍ល្អប្រសើរឡើងនោះ ស្រ្តីមួយចំនួនពុំទាន់បានស្វែងយល់ថា ការបរិភោគស្រាច្រើនពេកអាចប៉ះពាល់យ៉ាងធ្ងន់ធ្ងរដល់ចំណង់ផ្លូវភេទដូចគ្នា ។

 4. កង្វះភាពរំភើប និងភាពស្និទ្ធិស្នាលក្នុងទំនាក់ទំនងស្នេហា

នៅក្នុងទំនាក់ទំនងស្នេហាមួយគូ ដែលខ្វះភាពស្និទ្ធិស្នាល និងភាពរំជើបរំជួល គឺអាចកាត់បន្ថយចំណង់ផ្លូវភេទប្រមាណជាង 90% ចំពោះស្រ្តី។ ស្រ្តីដែលមិនសូវទទួលបានក្តីស្រឡាញ់ និងការយកចិត្តទុកដាក់ ឬការលួងលោមថ្នាក់ថ្នមពីបុរសដែលជាដៃគូរួមរស់ រមែងគិតថាខ្លួនមិនល្អគ្រប់គ្រាន់ មានការគិតអវិជ្ជមានជាច្រើនដែលជាហេតុប៉ះពាល់ចំណង់ផ្លូវភេទយ៉ាងខ្លាំង។ ដូច្នេះ សូមបង្ហាញសេចក្តីស្រឡាញ់ឱ្យបានពេញលេញទៅកាន់ដៃគូរួមរស់ទាំងសងខាង ដើម្បីពង្រឹងចំណងផ្លូវភេទដៃគូប្តីប្រពន្ធឱ្យកាន់តែមានសេចក្តីសុខទ្វេដង។​

5. ភាពមិនសុខស្រួលផ្លូវភេទ

ប្រសិនបើអ្នកមានការឈឺចាប់អំឡុងពេលរួមភេទ ឬមិនអាចឈានដល់ចំណុចកំពូលបាន វាក៏អាចជាមូលហេតុក្នុងការកាត់បន្ថយចំណង់ផ្លូវភេទបានដែរ។

តើមានវិធីអ្វីខ្លះក្នុងការបង្កើនចំណង់ផ្លូវភេទឡើងវិញ? 

.       សូមធ្វើការពិគ្រោះជាមួយអ្នកផ្តល់សេវាថែទាំសុខភាព ដើម្បីបដិសេធពីមូលហេតុផ្នែកវេជ្ជសាស្រ្តដែលអ្នកបានប្រើប្រាស់ក្នុងការព្យាបាលជំងឺផ្សេងៗ។ ដំណោះស្រាយទាំងនោះអាចពាក់ព័ន្ធនឹងការផ្លាស់ប្តូរថ្នាំដែលអ្នកកំពុងលេបព្យាបាលជំងឺ។

·       គ្រប់គ្រងភាពតានតឹងក្នុងជីវិតរបស់អ្នកដោយបង្កើតទម្លាប់់រស់នៅល្អៗ រួមមានការសម្រាកឱ្យបានគ្រប់គ្រាន់ ធ្វើលំហាត់ប្រាណ ស្វែងរកពេលវេលាស្ងប់ស្ងាត់ដើម្បីធ្វើការសម្មាធិសម្រួលអារម្មណ៍ និងទទួលបានការគាំទ្រផ្នែកផ្លូវចិត្តពីមនុស្សជុំវិញខ្លួនដែលអ្នកទុកចិត្ត។

·       ដោះស្រាយបញ្ហាអវិជ្ជមានដែលមាននៅក្នុងទំនាក់ទំនងដៃគូរបស់អ្នក និងបង្កើនអារម្មណ៍ល្អៗឱ្យគ្នាទៅវិញទៅមកដើម្បីពង្រឹងចំណង់ផ្លូវភេទឱ្យកាន់តែមានសេចក្តីសុខ។

ប្រសិនបើអ្នកអនុវត្តវិធីខាងលើរួចរាល់  អ្នកពុំទទួលបានប្រសិទ្ធិភាព សូមស្វែងរកជំនួយបន្ថែមនៅមណ្ឌលប្រឹក្សាអំពីសុខភាពផ្លូវភេទរបស់ស្រ្តី។