កម្ពុជាទទួលបានគម្រោងវិនិយោគថ្មីចំនួន ២៤ ក្នុងទំហំទឹកប្រាក់ជាង ២៤៦លានដុល្លារ នៅខែឧសភា

យោងតាមការចេញផ្សាយរបស់ ក្រុមប្រឹក្សាអភិវឌ្ឍន៍កម្ពុជា (CDC) កាលពីថ្ងៃចន្ទ បានបង្ហាញថា  នៅក្នុងខែឧសភា ឆ្នាំ២០២៤ នេះ ប្រទេសកម្ពុជាបានអនុម័តគម្រោងថ្មីចំនួន ២៤គម្រោង និងគម្រោងពង្រីកផលិតកម្មចំនួន ១គម្រោង ដែលមានទុនវិនិយោគសរុបប្រមាណជាង ២៤៦លានដុល្លារអាម៉េរិក និងអាចបង្កើតការងារបានប្រមាណ ១៥ពាន់កន្លែង។

នៅក្នុងចំណោមគម្រោងវិនិយោគទាំង២៥ គម្រោងវិនិយោគដែលមានទីតាំងស្ថិតនៅក្រៅតំបន់សេដ្ឋកិច្ចពិសេសមានចំនួន ១៧គម្រោង និងគម្រោងវិនិយោគដែលមានទីតាំងស្ថិតនៅក្នុងតំបន់សេដ្ឋកិច្ចពិសេសមានចំនួន ៨គម្រោង។

សម្រាប់គម្រោងវិនិយោគទាំងនោះរួមមានដូចជា គម្រោងវិនិយោគអផវឌ្ឍន៍ស្ថានីយអគ្គីសនីដើរដោយថាមពលព្រះអាទិត្យ , គម្រោងវិនិយោគបង្កើតរោងចក្រស្ល និងកែច្នៃលោហធាតុ , គម្រោងវិនិយោគបង្កើតរោងចក្រផលិតបំពង់ទីបដែក និង គម្រោងវិនិយោគបង្កើតរោងចក្រកែច្នៃអាលុយពីញ៉ូម។

គួរបញ្ជាក់ផងដែរថា ក្នុងខែឧសភា ឆ្នាំ២០២៤ នេះ ការវិនិយោគមកពីប្រទេសចិនស្ថិតនៅលំដាប់លេខរៀងទី១ ដោយរួមចំណែកជិត ៥០% នៃទុនវិនិយោគសរុប ខណៈពេលដែលការវិនិយោគក្នុងស្រុកគ្របដណ្តប់ប្រមាណជិត ៣១% នៃទុនវិនិយោគសរុបផងដែរ៕