កម្ពុជាបង្កើនការទាក់ទាញទេសចរមូស្លីម តាមរយៈការពង្រីកការតភ្ជាប់ជើងហោះហើរ និងពិព័រណ៍ទេសចរណ៍

របាយការណ៍របស់ក្រសួងទេសចរណ៍បានបង្ហាញថា ក្នុងឆ្នាំ ២០២៤ កម្ពុជាទទួលបានទេសចរបរទេសមកកម្សាន្តមានចំនួន ៦.៧ លាននាក់ ហើយក្នុងរយៈពេល ៨ ខែឆ្នាំ ២០២៥ ទេសចរបរទេសមកកម្សាន្តមានចំនួន ៤ លាននាក់។ ដើម្បីជំរុញទីផ្សារទេសចរណ៍មូស្លីមបន្ថែមទៀត នៅក្នុងឆ្នាំ ២០២៥ នេះ ក្រសួងទេសចរណ៍ក៏បានរៀបចំពិព័រណ៍ទេសចរណ៍មូស្លីមកម្ពុជាដែលធ្វើឡើងរយៈពេល ៣ ថ្ងៃ ចាប់ពីថ្ងៃទី៩ រហូតដល់ថ្ងៃទី១១ ខែតុលា ឆ្នាំ២០២៥ ដោយមានការតាំងបង្ហាញផលិតផលពីសហគ្រាសក្នុងស្រុកនិងក្រៅស្រុក ក្រុមហ៊ុនទេសចរណ៍ តំណាងស្ថានទូតមួយចំនួនក្នុងប្រទេសកម្ពុជា ក៏ដូចជាក្រុមហ៊ុនឯកជនដែលធ្វើការពាក់ព័ន្ធវិស័យទេសចរណ៍ជាច្រើនផងដែរ។

សម្រង់សុន្ទរកថា ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍៖ “ទេសចរមូស្លីមជាទីផ្សារគោលដៅដ៏ចម្បងមួយ ដែលជួយរុញកំណើនទេសចរបរទេសមកកម្សាន្តប្រទេសកម្ពុជា។ ក្រសួងទេសចរណ៍បានរៀបចំវេទិកាទេសចរណ៍មូស្លីមនេះឡើង មានគោលបំណងប្រមូលផ្ដុំអ្នកជំនាញមានបទពិសោធន៍ល្អៗជាច្រើនពីស្ថាប័នរាជរដ្ឋាភិបាល វិស័យឯកជន ប្រតិបត្តិករទេសចរណ៍ និងថ្នាក់ដឹកនាំសហគមន៍មូស្លីម ស្វែងយល់ពីលទ្ធភាព បញ្ហាប្រឈម និងកាលានុវត្តភាពនានា ក្នុងការទទួល និងចាប់យកចំណែកនៃទីផ្សារទេសចរណ៍មូស្លីម។”

ចំណែក លោក គឹម មិនា នាយកប្រតិបត្តិនៃក្រុមប្រឹក្សាអភិបាលសិក្សាទីផ្សារ និងផ្សព្វផ្សាយទេសចរណ៍កម្ពុជា ក៏បានបង្ហាញការមើលឃើញពីសក្ដានុពលដ៏ធំធេងរបស់កម្ពុជាក្នុងការទាក់ទាញទេសចរមូស្លីមឲ្យមកកម្សាន្តកាន់តែច្រើនឡើងនាពេលអនាគត។ លោកបានសង្កត់ធ្ងន់ថា ការពង្រីកការតភ្ជាប់ជើងហោះហើរត្រង់ជាមួយបណ្តាប្រទេសមូស្លីម គឺជាកត្តាសំខាន់មួយដែលនឹងជួយសម្រួលដល់ការសម្រេចចិត្តរបស់ទេសចរមូស្លីមក្នុងការជ្រើសរើសកម្ពុជាជាគោលដៅទេសចរណ៍។

បច្ចុប្បន្នមានកម្ពុជាបានតភ្ជាប់ជើងហោះហើរជាមួយប្រទេសមូស្លីមមួយចំនួនដូចជា៖

• ក្រុមហ៊ុនអាកាសចរណ៍ Emirates ដែលហោះមកពីទីក្រុងឌូបៃ ប្រទេសអារ៉ាប់រួម
• ក្រុមហ៊ុនអាកាសចរណ៍ Qatar ហោះមកពីទីក្រុងដូហាប្រទេសកាតា
• ក្រុមហ៊ុនអាកាសចរណ៍ Malaysia ហោះពីទីក្រុងកូឡាឡាំពួប្រទេសម៉ាឡេស៊ី
• ក្រុមហ៊ុនអាកាសចរណ៍ Etihad airline ហោះពីទីក្រុងអាប៊ូដាប៊ីប្រទេសអារ៉ាប់រួម

ជាពិសេសទៅទៀតនៅក្នុងអំឡុងខែធ្នូ ចុងឆ្នាំ ២០២៥ នឹងមានជើងហោះហើរត្រង់មកពីប្រទេសអឺរ៉ុបតាមរយៈក្រុមហ៊ុនអាកាសចរណ៍ Turkey ដែលនឹងភ្ជាប់ការហោះហើរត្រង់ពីប្រទេសតួកគី មកប្រទេសកម្ពុជាផងដែរ។

វេទិកានិងពិព័រណ៍ទេសចរណ៍មូស្លីមកម្ពុជាឆ្នាំ ២០២៥ រៀបចំឡើងក្នុងគោលបំណង៖

(១) សូមស្វាគមន៍មកកាន់ព្រះរាជាណាចក្រកម្ពុជា ដែលជាគោលដៅទេសចរណ៍ ប្រកបដោយសុវត្ថិភាព ភាពកក់ក្តៅ និងទំនុកចិត្តសម្រាប់ទេសចរគ្រប់ជាតិសាសន៍មកពីគ្រប់ទិសទី
(២) ដើម្បីបង្ហាញពីភាពសម្បូរបែបនៃសក្តានុពលទេសចរណ៍កម្ពុជា ដែលសមស្របជាមួយទីផ្សារទេសចរណ៍មូស្លីម និងស្តង់ដាមូស្លីមហ្វ្រេនលីកម្ពុជា និង
(៣) ការត្រៀមលក្ខណៈសម្បត្តិក្នុងការទទួលបដិសណ្ឋារកិច្ចទេសចរមូស្លីម ឱ្យស្របតាមនិន្នាការ និងតម្រូវការទីផ្សារទេសចរណ៍មូស្លីមជាតិ-អន្តរជាតិ ប្រកបដោយបរិយាបន្ន និងនវានុវត្តន៍។