កម្ពុជាមានសហគមន៍ស្វាយចន្ទីចំនួនពីរបន្ថែមទៀតដើម្បីជំរុញសេដ្ឋកិច្ចកម្ពុជា

យើងដឹងបានដឹងហើយថា វិស័យកសិកម្ម ជាវិស័យមួយដ៏សំខាន់សម្រាប់ប្រទេសកម្ពុជា ហេតុដូច្នេះទើបកម្មវិធីរបស់យើង ធ្វើការលើកយកពីសហគមន៍ស្វាយចន្ទី ដើម្បីចែករំលែកទៅដល់ទស្សនិកជនទទួលជ្រាប់ជាព័ត៌មានផ្នែកកសិកម្មនៅកម្ពុជា។

ក្នុងថ្ងៃនេះ យើងនឹងបង្ហាញអំពី សហគមន៍ស្វាយចន្ទីចំនួនពីរស្ថិតនៅខេត្តកំពង់ធំ ដែលទើបតែបង្កើតឡើងដើម្បីជម្រុញផ្នែកវិស័យកសិកម្មអោយប្រើសើរឡើងបន្ថែមទៀត។

 កម្ពុជានឹងមានសហគមន៍ស្វាយចន្ទីចំនួនពីរទៀត គឺសហគមន៍កសិកម្មទំនើប«ប្រាសាទសំបូររុងរឿង» និងសហគមន៍កសិកម្មទំនើប«កំពង់ធំសាលាវិស័យ» ត្រូវបានដាក់ឱ្យដំណើរការជាផ្លូវការដំណាលគ្នាជាមួយសហគមន៍កសិកម្មទំនើប«ទំរីងកំពង់ធំ»។ នេះបើតាមការបញ្ជាក់ពី ឯកឧត្តម ឃឹម ហ្វីណង់ អនុរដ្ឋលេខាធិការក្រសួងកសិកម្មរុក្ខាប្រមាញ់ និងនេសាទ នៅល្ងាចថ្ងៃទី០៦ ខែតុលា ឆ្នាំ២០២៤ ។

ដោយក្នុងនោះ នឹងផ្ទៃដីផលិតកម្មសរុបជាង ១ពាន់ហិកតា សហគមន៍ទាំង៣នេះអាចមានសមត្ថភាពបញ្ជាទិញជីរួមគ្នា ទាំងជីសរីរាង្គនិងជីគីមី ក្នុងទំហំប្រហែល ៣៥០តោនក្នុងពេលតែមួយ ដែលជាមូលហេតុចម្បងធ្វើឱ្យសហគមន៍ទាំងនេះអាចសន្សំសំចៃលើការចំណាយថ្លៃជីសរុបក្នុងចន្លោះពី ១០០លានរៀល រហូតដល់ ១៥០លានរៀល ប្រសិនបើធៀបទៅនឹងការចំណាយលើថ្លៃជីរបស់កសិករម្នាក់ៗបូកបញ្ចូលគ្នា មុនពេលចូលរួមជាសមាជិកនៃសហគមន៍កសិកម្មទំនើប ព្រោះអ្នកខ្លះធ្លាប់តែទិញរាយម្តងបន្តិចៗ ឬទិញជំពាក់រហូតដល់ពេលប្រមូលផលទើបទូទាត់សង។

អ្វីដែលរឹតតែប្រសើរជាងនេះទៅទៀតនោះគឺ សមាជិកម្នាក់ៗមិនគ្រាន់តែអាចទិញជីចូលក្នុងតម្លៃទាបជាងការទិញរៀងៗខ្លួននោះទេ តែពួកគាត់ក៏មិនចាំបាច់ចំណាយដើមទុនផ្ទាល់ខ្លួនក្នុងការដាំដុះដែរ ក្រោយពេលចូលរួមនៅក្នុងសហគមន៍កសិកម្មទំនើប ។

គិតត្រឹមឆ្នាំ២០២៣ នេះ កម្ពុជាមានចំនួនសហគមន៍កសិកម្មនៅតាមបណ្តារាជធានីទាំង២៥ បានកើនឡើងដល់ចំនួន ១២៥១សហគមន៍ ក្រោមដើមទុនវិនិយោគសរុបជាង ២៦លានដុល្លារ។ នេះបើតាមពិធីបិទសន្និបាតការងារសហគមន៍កសិកម្មឆ្នាំ២០២២ និងលើកទិសដៅឆ្នាំ២០២៣ កាលពីថ្ងៃទី១៤ ខែមីនា ឆ្នាំ២០២៣។

សហគមន៍ទាំងអស់នេះ មានសមាជិកសរុប ១៧០.២០៨នាក់ ក្នុងនោះស្រ្តីមាន ១០៧.៣៨០នាក់ ហើយមានភាគហ៊ុនសរុបប្រមាណ ១២.៨លានដុល្លារ។

បន្ថែមពីនេះ សហគមន៍កសិកម្មទាំងនេះ មានមុខរបរសំខាន់ៗ រួមមាន​ ការធ្វើផលិតកម្មកសិកម្ម ការធ្វើកសិ-ពាណិជ្ជកម្ម កសិ-ឧស្សាហកម្ម និងការផ្តល់សេវាកម្មគាំទ្រដល់ផលិតកម្មកសិកម្ម ដោយក្នុងនោះមានមុខដំណាំសំខាន់ៗ ដូចជា​ដំណាំស្រូវ និងការផលិតស្រូវពូជ បន្លែ ស្វាយកែវរមៀត  ម្រេច មៀនប៉ៃលិន ពោត ស្វាយចន្ទី និងដំឡូងមីជាដើម​។

លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានថ្លែងក្នុងសនិ្នសីទស្វាយចន្ទីពិភពលោក កាលពីថ្ងៃទី១ ខែកុម្ភៈឆ្នាំ២០២៤នៅខេត្តសៀមរាបថា ការនាំចេញគ្រាប់ស្វាយចន្ទីឆៅទៅទីផ្សារអន្តជាតិបានចំនួនប្រមាណ ៦៥៦ ០០០ តោន ទៅក្នុងនោះរួមមានប្រទេស ចិន ជប៉ុន បង់ក្លាដែស ឥណ្ឌា វៀតណាម និងថៃ និងគ្រាប់ស្វាយចន្ទីកែច្នៃទៅកាន់ប្រទេស ចិន សាធារណរដ្ឋឆែក ជប៉ុន កូរ៉េខាងត្បូង ហូឡង់ វៀតណាម និងសហរដ្ឋអាមេរិក។ កម្ពុជាមានផ្ទៃដីដាំដុះស្វាយចន្ទីប្រមាណ៤៧២ ៩៤៦ ហិកតា និងទទួលបានទិន្នផលសរុបចំនួន៧០៩ ៤១៩តោន ផងដែរ៕