កម្ពុជារកចំណូលបាន ១២៥លានដុល្លារពីការនាំចេញកៅស៊ូក្នុងរយៈពេល ៤ខែដំបូងឆ្នាំនេះ

នៅក្នុងទំហំនៃការនាំចេញកៅស៊ូ ក្នុងរយៈពេល ៤ខែ ដើមឆ្នាំ២០២៤ នេះ កម្ពុជាបានទទួលប្រាក់ចំណូលចំនួន ១២៥លានដុល្លារអាមេរិក ដោយបាននាំចេញកៅស៊ូស្ងួតចំនួន ៨៥,៤២៨តោន កើនឡើង ៣,៧% ពីចំនួន ៨២,៣៥៨ តោន ក្នុងរយៈពេលដូចគ្នាកាលពីឆ្នាំមុន នេះបើយោងតាមរបាយការ៍របស់អគ្គនាយកដ្ឋានកៅស៊ូ នៃក្រសួងរុក្ខាប្រមាញ់ និងនេសាទកម្ពុជា។

 បើគិតត្រឹមខែមេសា ឆ្នាំ២០២៤ ជ័រកៅស៊ូមានតម្លៃ ១,៥៣២ដុល្លារ ក្នុង១តោន កើនឡើងចំនួន២ដុល្លារ ក្នុង១តោន ស្មើនឹង១.១៣% ធៀបនឹងខែមុន និងបានកើនឡើងចំនួន៩៤ដុល្លារ ក្នុងមួយតោន ស្មើនឹង៧% ធៀបនឹងរយៈពេលដូចគ្នា នៃឆ្នាំមុន។ ចំណែកតម្លៃ នៃការនាំចេញឈើកៅស៊ូ ជាមធ្យមក្នុងខែមេសា ឆ្នាំ២០២៤ មានតម្លៃ១២៦ដុល្លារ ក្នុងមួយម៉ែត្រគីប។

សម្រាប់ កៅស៊ូស្ងួតរបស់កម្ពុជា គឺត្រូវបាននាំចេញជាចម្បងទៅកាន់ប្រទេសម៉ាឡេស៊ី វៀតណាម សិង្ហបុរី និង ចិន។ រហូតមកដល់ពេលនេះ កម្ពុជាបានដាំដើមកៅស៊ូលើផ្ទៃដីសរុបចំនួន ៤០៧,១៧២ហិកតា ក្នុងនោះដើមឈើនៅលើផ្ទៃដី ៣២០,១៨៤ហិកតា ស្មើនឹង៧៨,៦ភាគរយ មានអាយុកាលល្មមអាចប្រមូលផលបាន។