កម្ពុជា មាន​គោលដៅទេសចរណ៍ ស្ថិតនៅជុំវិញបឹងទន្លេសាប ច្រើន​ដែល​ភ្ញៀវទេសចរមិនគួរ​មើល​រំលង

វិស័យទេសចរណ៍នៅកម្ពុជា គឺជាវិស័យដ៏សំខាន់បំផុតមួយ​ក្នុង​ការ​ជួយរុញដោល​នាវាសេដ្ឋកិច្ចរបស់កម្ពុជា ហើយ​នៅ​ក្នុង​នោះ តំបន់ទេសចរណ៍សក្ដានុពលរបស់កម្ពុជា​មាន​ទាំង​តំបន់ទេសចរណ៍វប្បធម៌ តំបន់ទេសចរណ៍ប្រវត្តិសាស្ត្រ តំបន់ទេសចរណ៍កែច្នៃ និងតំបន់ទេសចរណ៍ធម្មជាតិ។ និយាយពីតំបន់ទេសចរណ៍ធម្មជាតិ​ កម្ពុជា​ក៏​មាន​ជា​ច្រើន​កន្លែង​សុទ្ធ​ជា​កន្លែង​សក្ដានុពល ក្នុង​សូម្បី​តែ​តាម​តំបន់ជុំវិញបឹងទន្លេសាប ក៏​មាន​ជាច្រើន​តំបន់ ដែល​ភ្ញៀវ​ទេសចរមិនគួរ​មើល​រំលង។

តើ​តំបន់​ទេសចរណ៍​ជុំវិញបឹងទន្លេសាប​ទាំង​នោះ មាន​តំបន់​អ្វីខ្លះ សូមតាមដានទាំងអស់គ្នា ។

១) ​សហគមន៍ទេសចរណ៍ធម្មជាតិកំពង់ឃ្លាំង ជាតំបន់រមណីយដ្ឋានទេសចរណ៍បែបធម្ម​ជាតិ និងវប្បធម៌ ដ៏ស្រស់ត្រកាលមួយ សម្រាប់អ្នកមកលេងខេត្តសៀមរាបមិនគួរមើលរំលង នោះគឺសហគមន៍ទេសចរណ៍ធម្មជាតិកំពង់ឃ្លាំង ដែលមានទីតាំងស្ថិតនៅក្នុង ភូមិកំពង់ឃ្លាំង ឃុំកំពង់ឃ្លាំង ស្រុកសូទ្រនិគម ខេត្តសៀមរាប។

២)​ កំពង់ផែចុងឃ្នៀស ដែលជាកំពង់ផែដ៏មានសក្តានុពល ក្នុងការស្រូបទាញភ្ញៀវទេសចរធ្វើដំណើរទស្សនាសម្រស់ធម្មជាតិ នៃបឹងទន្លេសាប។ កំពង់ផែចុងឃ្នៀស នឹងត្រូវអភិវឌ្ឍន៍ឱ្យស្របតាមស្តង់ដាកំពង់ផែទេសចរណ៍ ដោយត្រូវបំពាក់សម្បទាទ្រទ្រង់សេវាកម្មពេញលេញ នាថ្ងៃអនាគត។ តំបន់ចុងឃ្នៀស ត្រូវតែរៀបចំឱ្យបានល្អប្រសើរ សន្តិសុខ សណ្តាប់សាធារណៈ ជាពិសេសនោះ គឺត្រូវបានកំណត់ច្បាស់លាស់ បែងចែកឲ្យមានជាតំបន់បដិសណ្ឋារកិច្ច តំបន់ប្រជាជនរស់នៅ និងតំបន់ផ្សារត្រីជាដើម។កំពង់ផែចុងឃ្នៀស ស្ថិតនៅក្នុងតំបន់បឹងទន្លេសាប នៃសង្កាត់ចុងឃ្នៀស ក្រុងសៀមរាប ខេត្តសៀមរាប។​

៣)​ សហគមន៍ទេសចរណ៍ធម្មជាតិ កំពង់ភ្លុក គឺជាតំបន់ទេសចរណ៍ធម្មជាតិមួយកន្លែងដែលមានចម្ងាយប្រមាណ ៣២គីឡូម៉ែត្រពីក្រុងសៀមរាប។​ ភ្ញៀវទេសចរ ជិះទូក កាណូត ទស្សនាកំសាន្ត និងផ្តិតយកទេសភាពគួរជាទីគយគន់នៃសម្រស់ធម្មជាតិព្រៃលិចទឹក និងទន្លេសាប ដ៏ធំល្វឹងល្វើយ។ លើសពីនេះ លោកអ្នកនឹងទទួលបានការយល់ដឹងពីការរស់នៅ នៅក្នុងសហគមន៍កំពង់ភ្លុកបានផងដែរ។សហគមន៍ទេសចរណ៍ធម្មជាតិ កំពង់ភ្លុកនេះ ស្ថិតនៅឃុំកំពង់ភ្លុក ស្រុកប្រាសាទបាគង ខេត្តសៀមរាប។

៤) តំបន់​ទេសចរណ៍ធម្មជាតិ​បឹង​ពារាំង ស្ថិតនៅក្នុង​សង្កាត់​ជ្រាវ ក្រុង​សៀមរាប ខេត្ដ​សៀមរាប ដែលជា​បឹង​អភិរក្ស​ត្រី​ដ៏​សម្បូរបែប និង​កែលំអរ​ទៅជា​កន្លែង​ទេសចរណ៍​ដ៏​ស្រស់ស្អាត សម្រាប់​ទាក់ទាញ​អ្នក​ទេសចរណ៍​បន្ថែម។​ បឹង​ធម្មជាតិ​មួយ​នេះ មាន​មច្ឆា​ជាតិ និង​សត្វ​ស្លាប​រាប់រយ​ប្រភេទ បាន​នឹង​កំពុង​រស់នៅក្នុង​បឹង​នោះ។ ​តំបន់​ទេសចរណ៍​ដ៏​ទាក់ទាញ​បំផុត តាមរយ​:​ទេសភាព​ព្រៃ លិច​ទឹក ហ្វូង​ត្រី​ចម្រុះ ពិសេស​ជាងនេះទៅទៀត​នោះ គឺ​សត្វ​ស្លាប​ទឹក​គ្រប់​ប្រភេទ ដែល​វា​ហែល​ទឹក​ហោះហើរ​ប្រឡែង​គ្នា​លែង​យ៉ាងរ​ហង្ស​នៅក្នុង​ទឹក​បឹង​នេះ​។ បឹង​នេះ មាន​ចម្ងាយ​ពី​ទីប្រជុំជន នៃ​សង្កាត់​ជ្រាវ​ប្រមាណ​ជាង ៦​គីឡូម៉ែត្រ ។

៥) សហគមន៍អេកូទេសចរណ៍ព្រែកទាល់ ជាគឺជាតំបន់ជីវៈចម្រុះមួយក្នុងចំណោមបីរបស់បឹងទន្លេសាប ស្ថិតនៅក្នុងភូមិព្រែកទាល់ ឃុំកោះជីវាំង ស្រុកឯកភ្នំ ខេត្តបាត់ដំបង ជាមួយនឹងជម្រកសត្វស្លាបដ៏ធំ និងគួរឲ្យទាក់ទាញ ។ ព្រែកទាល់បានក្លាយទៅជាតំបន់មួយដែលទទួលបានភ្ញៀវទេសចរជាច្រើនរៀងរាល់ឆ្នាំ ព្រោះតំបន់នេះជាកន្លែងមួយ ដែលប្រមូលផ្តុំនូវសត្វស្លាបដ៏កម្រជាច្រើនប្រភេទមករស់នៅយ៉ាងច្រើនសម្បើម និងបង្កើតជាសំបុករស់នៅយ៉ាងគួរឲ្យចង់ទស្សនា ។

៦) ផាត់សណ្តាយ ជាសហគមន៍អេកូទេសចរណ៍ធម្មជាតិ ស្ថិតក្នុងខេត្តកំពង់ធំ មានសក្តានុពលទេសចរណ៍ពីធម្មជាតិសំខាន់ៗជាច្រើន ដើម្បីស្វាគមន៍ភ្ញៀវទេសចរចូលមកលេងកម្សាន្ត។​ សហគមន៍អេកូទេស ចរណ៍ធម្មជាតិផាត់សណ្តាយ មានទីតាំងស្ថិតនៅឃុំផាត់សណ្តាយ ស្រុកកំពង់ស្វាយ ខេត្តកំពុងធំ ត្រូវបានបង្កើតឡើងតាំងពីឆ្នាំ២០១៩ ដែលមានទំហំផ្ទៃដីប្រមាណ ២៣,០០០ហិកតា។

៧) បឹងទន្លេឆ្មារ ជាបឹងមួយដ៏ធំហុំព័ទ្ធជុំវិញដោយព្រៃលិចទឹក ដែលស្ថិតនៅកណ្ដាលតំបន់រ៉ាមសារបឹងទន្លេឆ្មារ ហើយជាប្រភពចំណីដល់សត្វស្លាបទឹក និងការប្រកបរបរចិញ្ចឹមជីវិតប្រជានេសាទមូលដ្ឋានផងដែរ ជាពិសេសក្នុងចន្លោះខែមិនា រហូតដល់ខែមិថុនា ដែលជារយៈពេលទឹកបឹងទន្លេឆ្មារចាប់ផ្ដើមស្រកខ្លាំង។ សត្វស្លាបសំខាន់ៗដែលកត់ត្រាដោយក្រុមការងារយើងមានដូចជា ខ្លែងសមុទ្រកន្ទុយខ្មៅ (Black-tailed godwit), ត្រយ៉ងខ្លួនរលោង (Glossy Ibis), ត្រយ៉ងខ្លួនស (Black-head Ibis), រនាលពណ៌ (Painted Stork), ចង្កៀលខ្យង (Asian Openbill), ទាកាបព្រៃ (Spot-billed Duck), ជើង ទៀន (Black-winged Stilt) ជាដើម។ ដោយឡែកចង្កៀលខ្យង មានចំនួនច្រើនជាងគេរហូតដល់រាប់ពាន់ក្បាល។ ក្រុមការងារក៏សង្កេតឃើញផងដែរថា ចំនួនអ្នកនេសាទលៀសក្នុងបឹងនេះ ក៏មានការកើនឡើងផងដែរ។

៨) កំពង់ហ្លួង គឺជារមណីយដ្ឋាន ធម្មជាតិ មួយក្នុងចំណោមរមណីយដ្ឋាន ធម្មជាតិ ជាច្រើន ទៀតដែលមានចម្ងាយ ៣៧ គីឡូម៉ែត្រ ពីទីរួមខេត្តពោធិ៍សាត់ នៅលើផ្ទៃទឹកបឹងទន្លេសាបស្ថិតក្នុង ឃុំកំពង់ហ្លួង ស្រុកក្រគរ។ ខេត្តពោធិ៍សាត់ ជាខេត្តមួយសម្បូរដោយព្រៃភ្នំក្រំថ្មជ្រោះជ្រងជ្រលងដងអូរសត្វព្រៃមច្ឆជាតិ និង បូជនីយដ្ឋានប្រវត្តិសាស្ត្រជាច្រើន សុទ្ធសឹងតែមានប្រវត្តិរឿងព្រេង និទាន និង ខ្លះទៀតមានក្នុងប្រវត្តិ ពង្សាវតារ ខ្មែរ ។

៩) ​ភ្នំកង្រី គឺជាភ្នំមួយបង្កប់រឿង ព្រេងនិទានប្រវត្តិសាស្ត្ររបស់ខ្មែរគឺ «រឿងពុទ្ធិសែននាងកង្រី» ដែលភ្នំមួយនេះមានទំហំរាប់ពាន់ហិកតា ស្ថិតនៅក្នុងឃុំត្រងិល និងឃុំពោធិ៍ ស្រុកកំពង់លែង ខេត្តកំពង់ឆ្នាំង និងមានចម្ងាយប្រមាណ ៧គីឡូម៉ែត្រពីទីរួមខេត្តកំពង់ឆ្នាំង ដោយត្រូវធ្វើដំណើរឆ្លងកាត់ទន្លេចំនួន ៣ទើបទៅដល់ភ្នំនេះ។​ភ្នំនាងកង្រីនេះបើគេសំឡឹងមើល ពីមាត់ទន្លេផ្សារក្រោមក្នុងទីរួមខេត្តកំពង់ឆ្នាំងទៅ គេនឹងឃើញតួភ្នំនាងកង្រីដូចរូបរាងមនុស្សស្រីដេកផ្កាប់មុខ មានសក់ក្បាល ចង្កេះ គូថ និងជើង ដែលនៅក្នុងរឿងព្រេងនិទានបុរាណ បាននិយាយថា សពនាងកង្រីស្លាប់ទៅ បានកើតទៅជាភ្នំមួយនេះ។

១០) ជំរំសត្វស្លាប បឹងព្រះពន្លៃ គឺជាជំរំសត្វស្លាប ធម្មជាតិមួយកន្លែង ស្ថិតនៅភូមិផ្ទះរុង ឃុំផ្ទះរុង ស្រុកភ្នំក្រវាញ ខេត្តពោធិ៍សាត់ ។ បឹងព្រះពន្លៃ មានចម្ងាយប្រហែល ៣០ គ.ម ពីក្រុងពោធិ៍សាត់ ដែលអ្នកទេសចរអាចធ្វើដំណើរទៅបានយ៉ាងស្រួល ដោយមិនមានការធ្វើដំណើរ ដោយថ្មើរជើង រឺឆ្លងទឹកឡើយ។