សាលាអន្តរជាតិសៅប្រ៊ីដកម្ពុជា បានរៀបចំកម្មវិធីតាំងពិព័រណ៌គម្រោងនៃភាពច្នៃប្រឌិតថ្មី ក្រោមប្រធានបទ “ការរចនាម៉ូតប្រកបដោយនិរន្តរភាព” ដើម្បីចូលរួមលើកទឹកចិត្តដល់សិស្សានុសិស្ស ដែលបានបង្ហាញនូវសមត្ថភាពដ៏អស្ចារ្យទៅលើភាពច្នៃប្រឌិតនៃម៉ូតសម្លៀកបំពាក់ តាមរយៈទេពកោសល្យផ្ទាល់ខ្លួន និងបំផុសគំនិតអំពីម៉ូតសម្លៀកបំពាក់ដែលប្រើប្រាស់នូវសម្ភារៈដែលអាចកែច្នៃឡើងវិញ ជាពិសេសការចេះលេងម៉ូតជាមួយសំណល់ក្រណាត់ដែលអាចកែច្នៃឡើងវិញបានជាដើម។
សិស្សានុសិស្ស បានបង្កើតម៉ូតសម្លៀកបំពាក់ផ្ទាល់ខ្លួន ទៅតាមចំណង់ចំណូលចិត្តរបស់ខ្លួន និងបានបោះជំហានដើរបង្ហាញម៉ូតនៅលើកម្រាលព្រំពណ៌ក្រហមក្នុងសាលរបស់សាលា ប្រកបដោយភាពក្លាហានបំផុត។ ម៉ូតសម្លៀកបំពាក់នីមួយៗ មានភាពខុសប្លែកពីគ្នា និងទាក់ទាញការចាប់អារម្មណ៍យ៉ាងខ្លាំង។ អ្វីដែលយើងមិនស្ងើចសរសើរមិនបាននោះ គឺពួកគេត្រឹមជាក្មេងជំទង់ប៉ុណ្ណោះ ប៉ុន្តែមានគំនិតច្នៃប្រឌិតខ្ពស់ទៅលើសោភ័ណភាពនៃម៉ូតសម្លៀកបំពាក់ និងមានការតុបតែងខ្លួនយ៉ាងសាកសម។
ព្រឹត្តិការណ៍នេះពោរពេញទៅដោយសកម្មភាពដែលគួរឱ្យចាប់អារម្មណ៍ជាច្រើន រាប់ចាប់តាំងពីការបង្ហាញគម្រោងច្នៃប្រឌិត រហូតដល់ការប្រកួតប្រជែងដ៏ស្វិតស្វាញ។

គួររម្លឹកផងដែរថា គោលបំណងនៃការរៀបចំកម្មវិធីនេះឡើង គឺដើម្បីអប់រំ និងលើកកម្ពស់ដល់ការស្វែងយល់អំពីផលប៉ះពាល់អវិជ្ជមាននៃសំណល់វាយនភណ្ឌនៃការច្នៃម៉ូតសម្លៀកបំពាក់ចំពោះបរិស្ថាន និងសង្គមជាតិ។ ម្យ៉ាងទៀត យើងក៏ចង់បណ្តុះគំនិត និងលើកទឹកចិត្តបន្ថែមទៅលើការយល់ដឹងអំពីទម្លាប់នៃការប្រើប្រាស់។