ខ្មែរ
English
កាលព្រឹកថ្ងទី២៩ ខែធ្នូ ឆ្នាំ២០២៣ បានចេញសេចក្តីប្រកាសព័ត៌មានស្តីពីការរកឃើញវីរុសកូវីដ-១៩ បំប្លែងថ្មីប្រភេទ Omicron JN1។ ក្រសួងសុខាភិបាលក៏បានគូសបញ្ជាក់ដោយធានាដែរថា វីរុសបំប្លែងថ្មីនេះមិនសូវមានសភាពធ្ងន់ធ្ងរនោះទេ ព្រោះតែវាមិនមែនជាប្រភេទព្រួយបារម្ភ ឬ VOC (Varaint of Concern) ។
កម្ពុជាបានរកឃើញ Omicron JN.1នេះ ចំនួន៤ករណី តែក៏ត្រូវបានព្យាបាលជាសះស្បើយវិញអស់ហើយ។ តែក្នុងពេលជាមួយគ្នានោះដែរ ក្រសួងសុខាភិបាលបានកត់សម្គាល់ឃើញពីកំណើននៃការឆ្លងវីរុសកូវីដ-១៩ ជារួម ក្នុងចំណោមអ្នកជំងឺមកព្យាបាលនៅមន្ទីរពេទ្យនាពេលបច្ចុប្បន្ន។ ហេតុដូចនេះហើយទើបក្រសួងសុខាភិបាល បានអំពាវនាវឲ្យប្រជាពលរដ្ឋកុំបីមាន មានការធ្វេសប្រហែសនឹងវីរុសកូវីដ-១៩នេះឲ្យសោះ ជាពិសេសក្នុងឱកាសប្រមូលផ្ដុំនានា។ ក្រសួងសុខាភិបាលក៏បានអំពាវនាវឲ្យមានការប្រុងប្រយ័ត្នខ្ពស់សម្រាប់ក្រុមមនុស្សងាយឆ្លងជំងឺ មានដូចជាអ្នកមានជំងឺប្រចាំកាយ កុមារ ចាស់ជរា ស្រ្តីមានផ្ទៃពោះ ត្រូវរក្សាគម្លាត និងអនុវត្តវិធានការការពារខ្លួនឲ្យបានត្រឹមត្រូវ ដោយត្រូវមានអ្នកជួយមើលការខុសត្រូវផងដែរ។
គួរបញ្ជាក់ថា យោងតាមអង្គការសុខភាពពិភពលោក(WHO) កន្លងមក JN.1 ត្រូវបានគេរកឃើញថាជាវីរុសមួយដែលបែកចេញពីវីរុសបំប្លែងខ្លួនកូវីដប្រភេទមួយផ្សេងទៀត ដែលមានឈ្មោះថា BA.2.86។ ក្រោយមក ដោយវីរុសនេះបានរីករាលដាលយ៉ាងឆាប់រហ័សក្នុងប្រទេសជាច្រើន WHOក៏បានចាត់ថ្នាក់វីរុសនេះ ជាប្រភេទវីរុសបំប្លែងថ្មីដាច់ដោយឡែកមួយផ្សេងទៀតពីវីរុសBA.2.86។ ដោយឡែកតាម WHO ហានិភ័យចំពោះសុខភាពសាធារណៈបង្កឡើងដោយវីរុសប្រភេទJN.1នេះ ត្រូវបានគេវាយតម្លៃថាស្ថិតនៅក្នុងកម្រិតទាបនៅឡើយគិតត្រឹមខែធ្នូឆ្នាំ២០២៣។
សូមរំលឹកថា ប្រសិនបើអ្នកមានអាការក្តៅខ្លួន ក្អក ឬពិបាកដកដង្ហើម ឬមានបញ្ហាសុខភាព ត្រូវអញ្ជើញទៅពិនិត្យព្យាបាលជំងឺនៅមន្ទីពេទ្យ ឬមណ្ឌលសុខភាពឲ្យបានទាន់ពេលសមស្រប។
