កត្តាអ្វីដែលបណ្តាលឱ្យមានក្លិនដង្ហើមមិនល្អ? ទាំងនេះគឺជាវិធីបង្ការការពារដ៏មានប្រសិទ្ធិភាព

ក្លិនដង្ហើមមិនល្អ ឬ “Halitosis” សំដៅទៅលើក្លិនដង្ហើម និងក្លិនមាត់មិនល្អ(ស្អុយមាត់)។ ក្លិននេះអាចបង្កឲ្យមានអារម្មណ៍មិនល្អចំពោះខ្លួនឯង និងចំពោះមនុស្សជុំវិញ ហើយវាប្រៀបដូចជាជំងឺមួយដែលអ្នកចាំបាច់ត្រូវតែធ្វើការព្យាបាល។

តើមានមូលហេតុអ្វីខ្លះដែលបណ្តាលឱ្យមានក្លិនដង្ហើមមិនល្អ?

មូលហេតុចំបងដែលបណ្តាលឱ្យមានក្លិនដង្ហើមមិនល្អ អាចបង្កមកពីកំណកកំទេចនៃអាហារបន្សល់ទុកនៅក្នុងមាត់ រួមមានទាំងបាក់តេរីជាតិរំអិលដែលនៅជាប់នឹងធ្មេញ និងពេលខ្លះទៀតបង្កមកពីបញ្ហាពុកធ្មេញ ខូចធ្មេញ(ដង្កូវស៊ីធ្មេញ) ជាដើម។

ម្យ៉ាងវិញទៀត ម្ហូបអាហារដែលអ្នកបរិភោគក៏បង្កឱ្យកើតមានក្លិនអាក្រក់ដូចគ្នា រួមមានខ្ទឹមស ខ្ទឹមបារាំង ព្រមទាំងជាតិអាហាររសជាតិហឹរ មានម្ទេស ជាដើម ដែលក្លិនទាំងនោះស្ថិតនៅក្នុងមាត់បានជាយូរអង្វែង ហើយបណ្តាលឱ្យក្លិនដង្ហើមមិនល្អ។ ក្រៅពីនេះ វាក៏អាចបណ្តាលមកពីជាតិអាស៊ីដក្នុងអាហារ (Acidic foods) ឬប្រភេទគ្រឿងភេសជ្ជៈមានជាតិសុរាជាដើម។ សូម្បីតែការជក់បារី និងបញ្ហាឱសថសម្រាប់ព្យាបាលក៏សុទ្ធតែបង្កក្លិនមាត់មិនល្អ ជាពិសេសចំពោះអ្នកមានជម្ងឺក្រពះ ពោះវៀនធំ ឬពោះវៀនតូច។

• វិធីបង្ការ និងព្យាបាលបញ្ហាក្លិនមាត់មិនល្អ

ជាដំបូង ដើម្បីធានាបានក្លិនមាត់ដ៏ប្រសើរ គឺត្រូវតែមានការយកចិត្តទុកដាក់ចំពោះការថែរក្សាអនាម័យមាត់ធ្មេញ។ អ្នកត្រូវតែដុសសំអាតធ្មេញឲ្យបានយ៉ាងហោចណាស់ 2ដងក្នុងមួយថ្ងៃ ជម្រះកំទេចអាហារដែលបន្សល់ទុកនៅតាមប្រហោងជើងធ្មេញ(អាចម៍ធ្មេញ) ឱ្យបានល្អ។ លើសពីនេះ អ្នកគួរតែប្រើប្រដាប់សម្រាប់សម្អាតអណ្តាត រួមទាំងផលិតផលទឹកខ្ពុរមាត់សម្រាប់សម្លាប់មេរោគបាក់តេរីដីភ័ណូ (Germs) និងជួយធ្វើឲ្យមាត់របស់អ្នកមានក្លិនដង្ហើមប្រហើរក្រអូប។

ទឹកមាត់គឺជាមុខងារដ៏សំខាន់ ដែលវាជួយសំអាតបរិស្ថាននៅក្នុងមាត់ និងកុំឱ្យមាត់ស្ងួត ព្រោះនៅពេលដែលក្នុងមាត់ត្រូវស្ងួតដោយសារតែគ្មានទឹកមាត់នោះ ក្លិនស្អុយក៏នឹងកើតមានឡើងផងដែរ។

អ្នកគួរណាស់តែទទួលទានទឹកឱ្យបានច្រើនក្រោយពេលបរិភោគអាហារ ហើយអ្នកគប្បីតែទំពារស្ករកៅស៊ូជាជំនួយដើម្បីធ្វើឱ្យក្រពេញទឹកមាត់ផលិតទឹកមាត់ចេញមកឲ្យបានគ្រប់គ្រាន់។