ខ្សែផ្លូវកង់ ជាជម្រើសទស្សនាទេសភាពដ៏ស្រស់ត្រកាលរបស់ភ្ញៀវទេសចរ ក្នុងរមណីយដ្ឋានអង្គរ

ក្រៅពីការធ្វើដំណើរដោយរថយន្ត ម៉ូតូ ឬមធ្យោបាយផ្សេងៗ ភ្ញៀវទេសចរអាចធ្វើដំណើរដោយមធ្យោបាយកង់នៅលើផ្លូវកៅស៊ូដ៏ធំទូលាយ អមដោយទេសភាពដ៏ស្រស់ស្អាត ដើម្បីទស្សនារមណីយដ្ឋានអង្គរ នៅក្នុងខេត្តសៀមរាប។

ការធ្វើដំណើរកម្សាន្ដនៅក្នុងរមណីយដ្ឋានអង្គរដោយការជិះកង់របស់ភ្ញៀវទេសចរបែបនេះ បានចូលរួមចំណែកជួយលើកកម្ពស់ដល់បរិស្ថាន ធ្វើឱ្យរាងកាយរឹងមាំ មានសុខភាពល្អ តាមរយៈការហាត់ប្រាណដោយជិះកង់ ដែលអាចមើលឃើញ និងទស្សនាទេសភាពប្លែកៗនៅតាមដងផ្លូវ ព្រមទាំងជួយធ្វើឱ្យអារម្មណ៍របស់ភ្ញៀវទេសចរកាន់តែស្រស់ថ្លា និងមានភាពសប្បាយរីករាយថែមទៀត។

ជាមួយគ្នានេះ អាជ្ញាធរជាតិអប្សរាបានសង្កេតឃើញថា ចាប់តាំងតែពីក្រោយស្ថានភាពជំងឺកូវីដ១៩ បានស្ងប់ស្ងាត់មក ចំនួនភ្ញៀវទេសចរដែលមកទស្សនារមណីយដ្ឋានអង្គរ និយមជិះកង់ទស្សនាប្រាសាទនានានៅវង់តូច និងវង់ធំ កើនឡើងកាន់តែច្រើនឡើងៗ។

ដូច្នេះ អាជ្ញាធរជាតិអប្សរា បានស្ថាបនាផ្លូវជិះកង់ នៅក្នុងតំបន់រមណីយដ្ឋានអង្គរ ប្រវែង២៣ គីឡូម៉ែត្រ តាំងតែពីឆ្នាំ២០១៩ ដោយផ្លូវជិះកង់នេះ មានឆ្លងកាត់ព្រៃព្រឹក្សា ស្ទឹង វាលស្រែ និងក្បែរៗប្រាសាទ ដែលជាផ្នែកមួយធ្វើឱ្យមានភាពទាក់ទាញអារម្មណ៍ទេសចរបែរមកជិះកង់ជំនួសយានយន្តផ្សេងៗ។