គន្លឹះខ្លះៗក្នុងការថែរក្សាប្រអប់ដៃឱ្យទន់រលោងស្អាត

ប្រិយមិត្ត ជាច្រើនពុំសូវមានការចាប់អារម្មណ៌ទៅ លើការថែរក្សាប្រអប់ដៃរបស់ខ្លួនឡើយ ប្រអប់ដៃក៏ជាចំណុចដែលគួរយកចិត្តទុកដាក់ និងមានការថែទាំឱ្យបានត្រឹមត្រូវ ជាពិសេសគឺមិត្តៗនារី។

ការមើលថែទាំប្រអប់ដៃមិនបានគ្រប់គ្រាប់ និងមិនត្រឹមត្រូវតាមក្បួនខ្នាត… ការលាបលេការពារកម្តៅថ្ងៃមិនបានគ្រប់គ្រាន់ ទទួលរងនូវកម្តៅថ្ងៃក្តៅខ្លាំងលើសកម្រិត និងប៉ះពាល់សារធាតុដែលមានផ្ទុកជាតិកាត់ច្រើន វាអាចបង្កនូវការកើតមានស្នាមអុចខ្មៅ ឬស្នាមអាចម៌រុយនៅលើស្បែក ប្រអប់ដៃមានសភាពស្ងួតខ្លាំង ប្រេះស្រកា ដែលជាកត្តាពន្លឿនភាពជ្រៀវជ្រួញស្បែកប្រអប់ដៃរបស់អ្នកដែលនឹកស្មានមិនដល់។

វិធីដែលមានប្រសិទ្ធិភាពបំផុតក្នុងការមើលថែទាំគាំពារប្រអប់ដៃរបស់អ្នក អ្នកអាចប្រើប្រាស់ជាប្រភេទម៉ាសអប់ដៃផ្សំឡើងពីផលិតផលធម្មជាតិ យ៉ាងហោចណាស់ឱ្យបានចំនួន៣ដងក្នុងមួយសប្តាហ៌

រូបមន្តថែរក្សាស្បែកប្រអប់ដៃ

ការប្រើប្រាស់ក្រែមកកាវ ៖ លាយក្រែមកកាវ២ស្លាបព្រាបាយ ប្រេងអាល់ម៉ង់២ស្លាបព្រាបាយ និងទឹកត្រសក់ដែលកិនរួច។ លាយគ្រឿងផ្សំទាំងអស់ចូលគ្នា ក្លាយទៅជាល្បាយម៉ាសមួយ សឹមយកមកលាបលើប្រអប់ដៃ និងធ្វើការម៉ាស្សាថ្នមៗរយៈពេល៥នាទី ក្រោយម៉ាស្សារួចទើបលាងសម្អាតដៃរបស់អ្នកនឹងទឹកសស្អាត នោះអ្នកនឹងទទួលបាននូវប្រអប់ដៃដ៏ទន់រលោង។
ការប្រើប្រាស់ប្រេងអូលីវ ៖ ត្រដុសសម្អាតដៃរបស់អ្នកជាមួយប្រេងអូលីវក្តៅឩណ្ណៗ រួចអប់ជាតិប្រេងទុករយៈពេល៥នាទី ទើបធ្វើការលាងសម្អាតចេញដោយទឹកក្តៅឩណ្ណៗ និងសាប៊ូធម្មជាតិ។ ប្រសិនបើអ្នកមានស្បែកប្រអប់ដៃដែលគគ្រាត និង គ្រើមខ្លាំង សូមធ្វើការអប់ជាតិប្រេងទុកមួយយប់ ប៉ុន្តែត្រូវប្រាកដថាពាក់ស្រោមដៃដែលផលិតពីសាច់ក្រណាត់កប្បាស់សុទ្ធ។
ការប្រើប្រាស់ទឹកដោះគោ ៖ លាយទឹកដោះគោស្រស់ ជាមួយនឹងទឹកក្រូចឆ្មាបន្តិច។ ធ្វើការកម្តៅល្បាយនោះឱ្យក្តៅឩណ្ណៗ រួចទើបត្រាំប្រអប់ដៃរបស់អ្នកប្រមាណរយៈពេល១០នាទី។
ការប្រើប្រាស់ស្រូវសាលី ៖ អ្នកត្រូវការទឹកមួយកែវ ម្សៅស្រូវសាលី១ស្លាបព្រាបាយ ប្រេងអូលីវ និងគ្លេសេរីន លាយចូលគ្នាឱ្យទាល់តែក្លាយជាល្បាយម៉ាស់ស្អិត រួចលាបទៅលើប្រអប់ដៃរបស់អ្នកទុករយៈពេក២៥នាទី និងលាងសម្អាតចេញដោយទឹកក្តៅឩណ្ណៗ និងសាប៊ូធម្មជាតិ។ម៉ាស់ស្រូវសាលីនេះជួយបណ្តុះកោសិកាស្បែកឡើងវិញ និងកម្ចាត់ចោលនូវកោសិកាខូចខាត ដូចជា ស្បែករលាកក្រហម ឬ ស្នាមអុចខ្មៅផ្សេងៗ។
ការប្រើប្រាស់ទឹកឃ្មុំ ៖ កិនដំឡូងបារាំងឆ្អិន១ដុំឱ្យម៉ត់ រួចច្របល់ឱ្យសព្វជាមួយទឹកដោះគោ២ស្លាបព្រាបាយ និងទឹកឃ្មុំ២ស្លាបព្រាបាយ។ លាបល្បាយម៉ាស់នេះនៅលើប្រអប់ដៃ ទុកចោលរយៈពេល១៥នាទី។ ធ្វើការលាងសម្អាតចេញដោយទឹកក្តៅឩណ្ណៗ និងសាប៊ូធម្មជាតិ។

រូបមន្តនៃការថែរក្សាស្បែកប្រអប់ដៃខាងលើនេះ ជួយជម្រុះកោសិកាចាស់ៗ ជួសជុលស្បែកដែលរងការខូចខាតជាដំណំ ក៏ដូចជាបង្កើតរនាំងកោសិកាស្បែកថ្មីៗ។

សូមអនុវត្តជាប្រចាំ ដើម្បីទទួលបាននូវលទ្ធផលជាទីគាប់ចិត្ត!