គន្លឹះថែទាំគាំពារតាមវីធីសាស្រ្ត ចិនបុរាណទាំង 3 នឹងផ្លាស់ប្តូរការរស់នៅរបស់អ្នក

វេជ្ជបណ្ឌិត Laurel Liu បានបញ្ចប់ការសិក្សាពីសកលវិទ្យាល័យល្បីៗ ទាំងនៅក្នុងប្រទេសចិន និងប្រទេសកាណាដា លើមុខជំនាញខាងកាយសម្ព័ន្ធ និងឱសថបុរាណចិន បានចែករំលែកនូវ គន្លឹះក្នុងការថែទាំគាំពារតាមវីធីសាស្រ្ត ចិនបុរាណទាំង ៣ ដែលនាំមកនូវសុខភាពល្អ ក៏ដូចជា ផ្លាស់ប្តូរនូវការរស់នៅប្រកបដោយសុខុមាលភាពល្អ។

គន្លឹះទាំង 3 នោះ រួមមាន ៖

ទី 1. យកចិត្តទុកដាក់ថែទាំសរសៃសក់ និងស្បែកក្បាលរបស់អ្នកឱ្យបានខ្ជាប់ខ្ជួន

Laurel បាននិយាយថា ស្បែកមុខរបស់យើងមានទំនាក់ទំនងយ៉ាងជិតស្និទ្ធជាមួយនឹងស្បែកក្បាល ព្រមទាំងសរសៃសក់ ព្រោះវាស្ថិតនៅផ្នែកជិតគ្នាបំផុត ដូច្នេះ អ្នកគួរតែបន្ថែមការយកចិត្តទុកដាក់លើ សុខភាពស្បែកក្បាល ដោយជៀសវាងការចងសក់តឹងខ្លាំងពេក ឬចងជាញឹកញាប់ពេក។ សូមចងសក់ក្នុងកម្រិតរលុងល្មម និងទទួលបានអារម្មណ៍ផាសុកភាពសម្រាប់ខ្លួនឯង។
មួយវិញទៀត អ្នកគួរតែម៉ាស្សាស្បែកក្បាលថ្នមៗ… បន្ធូរភាពតានតឹង ជាពិសេសធ្វើឱ្យចរន្តឈាមរត់ មានភាពប្រក្រតី។

ទី 2. កាត់បន្ថយ អាការហើម នៃដងខ្លួនទាំងមូល

អាការហើម ច្រើនតែកើតចេញពីក្នុងខ្លួនមានជាតិសំណើមខ្ពស់ និងទឹករអិលច្រើនពេក។ កាលណាបរិមាណសារធាតុទាងពីរនេះ កាន់តែកើនឡើង វានឹងជះឥទ្ធិពលអាក្រក់ដល់សុខុមាលភាពរបស់អ្នក។

វិធីសាស្រ្តកាត់បន្ថយ ៖
• ធ្វើលំហាត់ប្រាណស្រាលៗ
• ត្រាំជើងក្នុងទឹកក្តៅឧណ្ហៗ ដោយមានគ្រឿងផ្សំបន្ថែមដូចជាអំបិល ប្រេងឱសថ ឬប្រេងថ្នាំចិនបុរាណ
• ម៉ាស្សាបាតជើងតាមរយៈ GuaSha
• ចាក់ម្ជុលវិទ្យាសាស្ត្រ

អាហារទ្រទ្រង់តុល្យភាព រួមមាន ៖
• សណ្តែកក្រហម
• ស្រូវសាឡី
• គ្រាប់ Gorgon
• ឫសមើមចិន Poria

ទី 3. យកចិត្តទុកដាក់លើសុខភាពលំពែង និងក្រពះ

លំពែង និងក្រពះ ដែលមានសុខភាពល្អ មិនត្រឹមជួយសម្រួលដល់ប្រព័ន្ធរំលាយអាហារតែប៉ុណ្ណោះទេ វាក៏ផ្តល់នូវសុខភាពស្បែកភ្លឺថ្លាចេញពីខាងក្នុងបែបធម្មជាតិផងដែរ។
ទទួលទានអាហារមានរសជាតិល្មម មិនប្រៃពេក ឬផ្អែមពេក និងចៀសវាង អាហារឆៅ ត្រជាក់ ឬមានរសជាតិហឹរខ្លាំងពេក។
លើសពីនេះ សូមកាត់បន្ថយទឹកដោះគោគ្រីមខ្លាំង បង្អែមផ្អែមៗ និងអាហារបំពងចៀន។

ជំហានតូចៗ ទាំងអស់នេះ ប្រៀបដូចជាអំណោយដ៏វិសេសវិសាលចំពោះរូបរាងកាយរបស់អ្នក។ ចាំកាល ចាប់ផ្តើមបង្កើតទម្លាប់ដែលមានតុល្យភាពតាមបែបធម្មជាតិ ដើម្បីសុខភាពល្អ។