គ្រោះថ្នាក់នៃជាតិស្ករ ចំពោះសុខភាព

ស្ករ គឺជាកាបូអ៊ីដ្រាតសាមញ្ញ ដែលផ្តល់ថាមពលដល់រាងកាយ។ ស្ករ ត្រូវបានគេបែងចេញជាពីរប្រភេទសំខាន់ៗ គឺ ៖ ស្ករធម្មជាតិ និងស្ករបន្ថែមររសជាតិ។

ស្ករធម្មជាតិ ៖ ត្រូវបានរកឃើញនៅក្នុងប្រភេទអាហារស្រស់ៗ រួមមាន ផ្លែឈើ (ត្រូវបានគេស្គាល់ថា Fructose) និងក្នុងទឹកដោះគោ (ដែលគេហៅថា Lactose) ជាស្ករដែលមាននៅក្នុងអាមីដុង ត្រូវការបំប្លែង រំលាយខ្លួនសិន នឹងត្រូវឆ្លងកាត់ពោះវៀនក្រពះ មុននឹងត្រូវស្រូបបញ្ចេញជាតិស្ករតាមក្រោយទៅចិញ្ចឹមរាងកាយ ដូច្នេះគ្មានផលប៉ះពាល់លើអត្រាជាតិស្ករក្នុងឈាម ផ្តល់គ្រោះថ្នាក់ទាន់ហន់ភ្លាមៗឡើយ។។

ស្ករបន្ថែមរសជាតិ (ដែលមានសមត្ថភាពជ្រាតលឿនចូលក្នុងឈាម) ៖ គឺជា ជាតិស្ករ ដែលមានកាឡូរី ត្រូវបានបន្ថែមទៅក្នុងពពួកអាហារកែច្នៃ ដើម្បីបង្កើនរសជាតិ រួមមាន ភេសជ្ជៈផ្អែមគ្រឿងកំប៉ុង គ្រឿងទេសផ្សំសម្រាប់ម្ហូប ប្រភេទបង្អែម (នំដុត ការ៉េម ទឹកស៊ីរ៉ូ ស្ករគ្រាប់…។ល។)។

អ្នកជំនាញថែទាំសុខភាពជុំវិញពិភពលោក បានណែនាំជាពិសេសអំពីការទទួលទាន “ជាតិស្ករបន្ថែមរសជាតិ” ដោយទទូចឲ្យអ្នកទទួលទានធ្វើការកំណត់ ក្នុងបរិមាណមិនឲ្យលើសពី ១០ភាគរយ នៃកាឡូរី ទទួលបានប្រចាំថ្ងៃនោះទេ។ ឧទាហរណ៍ ៖ កាឡូរីនៃរបបអាហាររបស់អ្នក មានបរិមាណ ២,000 កាឡូរី ដូច្នេះកម្រិតទទួលទានជាតិស្ករបន្ថែមរសជាតិ បានតែ 50ក្រាម ប្រមាណជា ២00កាឡូរី បានហើយ។

ការទទួលទានជាតិស្ករបន្ថែមរសជាតិច្រើនពេក អាចបង្កគ្រោះថ្នាក់ដល់សុខភាពយ៉ាងខ្លាំង មានដូចជា បង្កជាជំងឺទឹកនោមផ្អែមប្រភេទទី ២ ជំងឺបេះដូង ជំងឺពុកធ្មេញ សម្ពាធឈាមមិនប្រក្រតី និងកូឡេស្តេរ៉ូលឡើងខ្ពស់ បង្កការរលាក ពន្លឿនភាពចាស់ ធាត់លើសទម្ងន់ និងឡើងមុនលើផ្ទៃមុខ។

ការទទួលទានប្រភេទស្ករបន្ថែមរសជាតិ អាចផ្តល់ថាមពលដល់រាងកាយបានឆាប់រហ័សក៏ពិតមែន ក៏ប៉ុន្តែអ្នកមិនទទួលបានសារធាតុចិញ្ចឹម ពីប្រភេទអាហារកែច្នៃទាំងអស់នោះទេ ផ្ទុយទៅវិញវានឹងបង្កើនហានិភ័យនៃការវិវត្តទៅជាជំងឺរ៉ាំរ៉ៃផ្សេងៗនៅថ្ងៃអនាគត។

ឧទាហរណ៍ ៖ ប្រភេទភេសជ្ជៈកែច្នៃផ្អែមៗ បានត្រឹមតែផ្តល់ កាឡូរី (ថាមពល) តែប៉ុណ្ណុះ តែវាមិនបានផ្តល់នូវសារធាតុចិញ្ចឹមសំខាន់ៗឡើយ… ខណៈដែលទឹកដោះគោ អាចផ្គត់ផ្គង់ជាតិកាល់ស្យូម ប្រូតេអ៊ីន និងវីតាមីនដល់រូបរាងកាយ។

ដូច្នេះហើយ សូមជ្រើសរើសរបបអាហារដែលមានតុល្យភាព និងផ្តោតសំខាន់លើសារធាតុចិញ្ចឹមសម្រាប់សុខភាពរាងកាយទាំងមូល។ ទទួលទានបន្លែ ផ្លែឈើធម្មជាតិ ប្រូតេអ៊ីនដែលគ្មានខ្លាញ់ និងគ្រាប់ធុញ្ញជាតិ ចៀសវាងទទួលទាន ភេសជ្ជៈកែច្នៃកំប៉ុង ឬបង្អែម និងអាហារកែច្នៃផ្សេងៗច្រើនពេក ត្រូវចាំថា ទឹកផ្លែឈើ មិនអាចជំនួសផ្លែឈើស្រស់បាននោះទេ។

ចូរអានតារាងពិពណ៌នាអំពីការវាយតម្លៃចំនួនកាឡូរីរបស់ផលិតផលកំប៉ុងដោយប្រុងប្រយ័ត្ន។ គួរកត់សម្គាល់ដែរថា ជាតិស្ករមួយក្រាម ស្មើនឹង 4 កាឡូរី ហើយ 4 ក្រាម ស្មើនឹង ស្ករសុទ្ធ ចំនួនមួយស្លាបព្រាកាហ្វេ។
ការទទួលទានជាតិស្ករច្រើនហួសប្រមាណ អាចនាំឱ្យមានរោគសញ្ញាក្នុងរយៈពេលខ្លី ឬវែង អាស្រ័យលើប្រព័ន្ធភាពស៊ាំរាងកាយរបស់មនុស្សម្នាក់ៗ។​​ ប៉ុន្តែអ្នកអាចសំគាល់ពីអាការៈមួយចំនួនដែលរាងកាយនឹងបង្ហាញពីការលើសជាតិស្ករ រួមមាន ៖

• ស្រេកទឹកខ្លាំង
• ឧស្សាហ៍ឈឺក្បាល ឬវិលមុខ
• មានបញ្ហាស្បែក
• ប្រព័ន្ធរំលាយអាហារដំណើរការមិនប្រក្រតី
• ពិបាកក្នុងការផ្តោតអារម្មណ៍ និងមិនរហ័សរហួន
• មានអារម្មណ៍ រញីរញ័រ
• ចេះតែឃ្លានមិនឈប់ ជាពិសេស នឹកឃើញចង់ទទួលទានតែអាហារផ្អែម ឬអាហារដែលមានជាតិកាបូអ៊ីដ្រាតខ្ពស់
• ងាយឆ្លងមេរោគ និងឧស្សាហ៍ឈឺ
• បើមានរបួស មិនងាយសះ
• អស់កម្លាំង ល្ហិតល្ហៃ