ចង់បានអាហាររូបករណ៍សិក្សានៅបរទេស គួរត្រៀមអ្វីខ្លះ?

ដូចដែលយើងបានដឹងហើយថា យុវវ័យសម័យបច្ចុប្បន្ននេះ ហាក់កំពុងស្វែងរកនូវអាហារូបករណ៍សម្រាប់សិក្សាបន្តនៅបរទេស ក៏ដូចជាជួបនឹងសិស្សានុសិស្សអន្តរជាតិមកពីបណ្តាប្រទេសផ្សេងៗ ដែលមានជាតិសាសន៍ ពណ៌សម្បុរ វប្បធម៌ និងសាសនាខុសៗគ្នា។

អត្ថប្រយោជន៍នៃការជួបប្រាស្រ័យទាក់ទងនេះ អាចផ្តល់នូវបទពិសោធន៍ស្វែងយល់ដឹងអំពី របៀប និងវិធីសាស្ត្រនៃការរស់នៅរបស់មនុស្សម្នាក់ៗ ដែលបានបោះជំហានចេញពីភាពសុខស្រួល ដើម្បីដើរឆ្ពោះទៅរកក្តីស្រមៃរបស់ខ្លួន។
ដើម្បីទទួលបានអាហារូបករណ៍សមប្រកបតាមបំណង តើត្រូវត្រៀមខ្លួនដូចម្តេចខ្លះ?

• ការស្រាវជ្រាវ

ស្រាវជ្រាវរកអាហារូបករណ៍ណាដែលសាកសមជាមួយប្រវត្តិ គោលដៅ និងប្រកបដោយសមិទ្ធភាពសម្រាប់ខ្លួន ព្រោះថាមិនមែនគ្រប់ប្រភេទអាហារូបករណ៍ទាំងអស់ បង្កើតឡើងមានលក្ខណៈដូចគ្នានោះទេ។ ម្យ៉ាងទៀត ការដាក់ពាក្យតែមួយកន្លែង ក៏មិនមែនជាវិធីសាស្ត្រល្អដែរ។ ហេតុដូច្នេះហើយ យើងត្រូវស្វែងរកយ៉ាងហោចណាស់ ឱ្យបាន ២ ទៅ ៣ អាហារូបករណ៍។

នៅពេលដែលសម្រេចចិត្តជ្រើសរួចហើយ អ្នកគួរតែកត់ចំណាំ និងយកចិត្តទុកដាក់ក្នុងការអានព័ត៌មានឱ្យបានលម្អិតបំផុត ដូចជាឯកសារដែលត្រូវភ្ជាប់ក្នុងការស្នើរសុំ របៀបនៃការសរសេរអត្ថបទ និងរយៈពេលនៃការផុតកំណត់ក្នុងការដាក់ពាក្យស្នើរសុំជាដើម។

• សុំជំនួយ ប្រសិនបើចាំបាច់

ត្រូវចាំថា ការដាក់ពាក្យសុំអាហារូបករណ៍ប្រៀបដូចជាការប្រឡងប្រកួតប្រជែងមួយផងដែរ ព្រោះមិនមែនមានតែអ្នកម្នាក់ទេដែលកំពុងដាក់ពាក្យស្នើរសុំ រួមមានមានទាំងសិស្សានុសិស្សដទៃទៀតកំពុងដាក់ស្នើរផងដែរ។

ដូច្នេះ សូមកុំស្ទាក់ស្ទើក្នុងការស្វែងរកជំនួយ អ្នកអាចសួរ លោកគ្រូ អ្នកគ្រូ រៀមច្បង ឬអ្នកដែលធ្លាប់មានបទពិសោធន៍ដាក់ពាក្យស្នើរសុំ ដើម្បីអាចឱ្យពួកគេជួយចង្អុលបង្ហាញយើងអំពីការស្វែងរកអាហារូបករណ៍ រហូតដល់ការពិនិត្យមើលអាហារូបករណ៍របស់អ្នក។

• អនុវត្តសម្រាប់ការសម្ភាសន៍ 

ក្នុងករណីបើអ្នកទទួលបានការយល់ព្រមសម្រាប់វគ្គស្នើសុំឯកសារ ដាក់អាហារូបករណ៍ជាប់ហើយ ជំហានបន្ទាប់ អ្នកនឹងត្រូវបន្តទៅវគ្គ “ការសម្ភាសន៍”។

ដំណាក់កាលនេះ អាចជាដំណាក់កាលដ៏គួរឱ្យភ័យខ្លាចសម្រាប់បេក្ខជនគ្រប់រូប ប៉ុន្តែសូមកុំបារម្ភ មានគន្លឹះខ្លះៗដែលអាចឱ្យ អ្នកបានត្រៀមខ្លួនទាន់ រួមមាន ការស្វែងរកសំណួរសម្ភាសន៍ទូទៅ រួចអនុវត្តការឆ្លើយនូវសំណួរទាំងនោះ និងរៀបចំសំណួរមួយចំនួន ដើម្បីសួរត្រឡប់ទៅកាន់អ្នកសម្ភាសន៍វិញ។ បន្ទាប់មក អនុវត្តការនិយាយដោយទំនុកចិត្ត ដើម្បីបង្ហាញពួកគេថា អ្នកពិតជាសាកសមនឹងទទួលបានអាហារូបករណ៍ពិតប្រាកដ។

ម្យ៉ាងទៀត អ្នកត្រូវចេះរៀបចំខ្លួនក្នុងការស្លៀកពាក់ឱ្យបានសមរម្យ ព្រោះវាអាចបង្កើនភាពជឿជាក់ ឈានទៅរកភាពជោគជ័យ។ កុំភ្លេចណា ចូរធ្វើជាខ្លួនអ្នក!

• កុំរងចាំរហូតដល់នាទីចុងក្រោយ 

តាមរយៈការដាក់ពាក្យមុនពេលផុតកំណត់ អ្នកអាចនឹងមានពេលវេលាច្រើនក្នុងការទទួលបាននូវដំបូន្មានល្អ មតិកែលម្អ ពី លោកគ្រូ អ្នកគ្រូ អំពីអត្ថបទ សេចក្តីថ្លែងការណ៍ផ្ទាល់ខ្លួន និងឯកសារចាំបាច់នានា។ ការធ្វើបែបនេះ បានផ្តល់ឱកាសដល់អ្នកជាពិសេស ក្នុងការកែប្រែ ក៏ដូចជាកែលម្អនូវពាក្យស្នើមុនពេលវេលាយឺតពេល។

ជាងនេះទៅទៀត យើងកាន់តែមិនអាចទាយដឹងបានថាប្រព័ន្ធបច្ចេកវិទ្យានឹងមិនមានបញ្ញារអាក់រអួល ណាមួយកើតឡើងបានមុននោះទេ។ គេហទំព័រ វេបសាយ អាចគាំង ឯកសារ PDF នឹងមិនអាចផ្ញើចេញបាន ឬកើតមានបញ្ហាអ៊ីនធឺណិតជាដើម។ ដូច្នេះ ការដាក់ពាក្យស្នើមុនថ្ងៃកំណត់ អាចជួយយើងជៀសផុតពីភាពតានតឹងនៅនាទីចុងក្រោយ។

ការដាក់ពាក្យស្នើសុំអាហារូបករណ៍ ត្រូវការពេលវេលា បូករួមទាំងការខិតខំប្រឹងប្រែងយ៉ាងខ្លាំង នោះអ្នកនឹងទទួលលទ្ធផលមានតម្លៃជាទីកាប់ចិត្ត។

ចូរចាប់ផ្តើមមុន ររៀបចំឱ្យបានល្អ មានភាពប្រាកដប្រជានៅគ្រប់ជំហាននៃដំណើរការ។ មិនថាអ្នកទទួលបានលទ្ធផលបែបណា សូមបើកចិត្តទទួលយក រួចគិតថាការដាក់ពាក្យនីមួយៗគឺជាបទពិសោធន៍។