ខ្មែរ
English
ស្បែកក្បាលមានសារៈសំខាន់ណាស់សម្រាប់សុខភាពសក់។ ការមិនសម្អាត ឬម៉ាស្សាស្បែកក្បាលមិនបានត្រឹមត្រូវនឹងធ្វើឲ្យអ្នកជួបបញ្ហាសក់ស្ងួត សក់បែកចុង សក់ឡើងប្រេង និងជ្រុះសក់ជាដើម។ ការប្រើប្រាស់ប្រេងធម្មជាតិ និងម៉ាស្សាស្បែកក្បាលជាប្រចាំ អាចជួយសក់អ្នកមានសុខភាពល្អ ។
ខាងក្រោមនេះជាកំហុសទូទៅដែលអ្នកគួរប្រយ័ត្ន៖
1. គេងទាំងសក់សើម ៖ ប្រសិនបើសក់អ្នកសើម គួរតែចំណោយពេលដើម្បីសម្ងួតសក់ជាមុនសិន។ កាលណាយើងចូលគេងទាំងសក់សើមវាអាចនឹងផ្ដល់ផលរំខានដល់ដំណេករបស់អ្នក ហើយសក់អ្នកនឹងមានសភាពស្ងួត ឆាប់ខូច ឡើងអង្កេ ឡើងប្រេងជាដើម។
2. ជ្រើសរើសសាប៊ូមិនបានត្រឹមត្រូវ ៖ អ្នកត្រូវកំណត់ចំណាំមើលខ្លួនឯងនៅពេលដែលអ្នកកក់សក់ហើយ ប្រសិនបើអ្នកជួបបញ្ហាដូចជាជ្រុះសក់ច្រើន ឬក៏ឆាប់ស្ងួតសក់ អ្នកគួរតែផ្លាស់ប្ដូរផលិតផលថែរក្សាសក់ និងជ្រើសរើសផលិតផលណាដែលត្រឹមត្រូវជាមួយនឹងប្រភេទស្បែកក្បាល។
3. ការប្រើប្រាស់ក្រេមបន្ទន់សក់ ៖ អ្នកណាក៏ចង់ទទួលបានសក់ស្អាតរលាស់រលោង ដោយប្រើប្រាស់ក្រេមបន្ទន់សក់ ស្រ្ពេបាញ់សក់ ។ ការប្រើក្រេមបន្ទន់សក់នឹងជួយអ្នកងាយស្រួលក្នុងការសិតសក់ មិនធ្វើឲ្យសំពោងសក់ជាដើម។ ទោះជាយ៉ាងណា កុំប្រើក្រេមបន្ទន់សក់ច្រើនពេក ឬក៏ប្រើហួសចូលដល់ស្បែកក្បាល វាអាចធ្វើឲ្យស្បែកក្បាលក្ដៅងាយនឹងជួបបញ្ហាជ្រុះសក់។
4. ការបរិភោគអាហារមិនត្រឹមត្រូវ ៖ ប្រសិនបើអ្នកបរិភោគរបស់ដែលមានជាតិផ្អែមខ្លាំង និងប្រៃខ្លាំងក៏ជាបញ្ហាពាក់ព័ន្ធទៅនឹងស្បែកក្បាលដូចគ្នាដែរ។ រាល់ការបរិភោគអាហារដែលមិនល្អ មិនមានផាសុខភាព អាចធ្វើឲ្យប្រព័ន្ធការពាររាងកាយរបស់មនុស្សយើងមានការថយចុះ នេះក៏ជាបញ្ហាមួយដែលបណ្ដាលឲ្យមានបញ្ហាក្នុងចំណោមបញ្ហាទាំងអស់។
5. ចងសក់តឹងពេក ៖ ពេលដែលអ្នកចងសក់តឹងពេក នឹងធ្វើឲ្យឈឺដល់ស្បែកក្បាល ពិបាកក្នុងការបត់បែន ដែលបណ្ដាលឲ្យឆាប់ឡើងប្រេង។
6. សិតសក់ញឹកញាប់ពេក ៖ សិតសក់ញឹកញាប់ពេកនឹងធ្វើរីករាលដល់ប្រេងនៅលើស្បែកក្បាល ។ពេលនោះអ្នកអាចនឹងគិតថាវាជាភាពរលោងនៃសក់ ក៏ប៉ុន្តែវាមិនមែនទាំងស្រុងនោះទេវាបូកបញ្ចូលជាមួយនឹងការឡើងប្រេងដូចគ្នាដែរ។
7. ការប្រើប្រាស់ម៉ាស៊ីនផ្លុំសក់ និង ម៉ាស៊ីនកៀប ៖ ពេលប្រើម៉ាស៊ីនផ្លុំសក់គួរតែប្រើកម្ដៅសមល្មម ជៀសវាងការប្រើប្រាស់ម៉ាស៊ីនដែលមានកម្ដៅខ្លាំងនិងញឹកញាប់ពេកអាចឲ្យសក់ងាយរងនឹងបញ្ហាបែកចុង និងជ្រុះសក់។
ជៀសវាងកំហុសទាំងនេះ សក់របស់អ្នកនឹងមានសុខុមាលភាពល្អ ។
