ឆ្ពោះទៅកាន់ទឹកដីអច្ឆរិយៈ ខេត្តសៀមរាប Gumball 3000 នឹងបង្ហាញខ្លួននៅ ប្រាសាទអង្គរវត្ត

ក្បួនរថយន្តទំនើបនៃកម្មវិធី Gumball 3000 ធ្វើការចាកចេញពីរាជធានីភ្នំពេញទាំងព្រឹកព្រលឹមថ្ងៃទី 16 ដើម្បីឆ្ពោះទៅកាន់ខេត្តសៀមរាប តាមរយៈផ្លូវជាតិលេខ៦A រួចនឹងមានព្រឹត្តិការណ៍ទទួលទានភោជនីយអាហារថ្ងៃត្រង់នៅស្ទឹងព្រៃប្រស់ (Prey Pros Rest Area) ហើយនឹងបន្តដំណើរជាក្រុមបន្តបណ្តាក់គ្នាទៅខេត្តសៀមរាបយ៉ាងស្រស់ស្អាតបំផុត។

ទៅដល់ខេត្តសៀមរាបនាពេលរសៀល ស្ថាបនិក Gumball 3000 លោក Maximillion Cooper នឹងជិះរថយន្តគយគន់ទេសភាពវង់តូចនិងវង់ធំ ចូលទៅទស្សនាប្រាសាទអង្គរវត្ត ទស្សនាទេសភាពថ្ងៃលិចនៃប្រាសាទប្រែរូប។ ក្រៅពីនេះ ក៏មានការតាំងបង្ហាញរថយន្ត Sport Cars, Super Cars & Luxury Cars នៅមុខសួនច្បារព្រះរាជដំណាក់ក្រុងសៀមរាប ព្រមទាំងនៅតាមបណ្ដោយផ្លូវស្របនឹងទីស្នាក់ព្រះអង្គចេកព្រះអង្គចមផងដែរ។

នារាត្រីថ្ងៃទី 16 នេះផងដែរ ក៏នឹងមានវេទិកាធុរកិច្ចរវាងស្ថាបនិក Gumball 3000 ជាមួយនឹងវិស័យឯកជនក្នុងស្រុក ព្រមទាំងចូលរួមរាត្រីស្រមោលស ដើម្បីទស្សនាការសម្ដែងនូវរបាំប្រពៃណីខ្មែរ បូកបញ្ចូលទាំងផ្ទាំងទស្សនីយភាពដ៏អស្ចារ្យជាច្រើនទៀតនៅមុខប្រាសាទបាយ័ន្ត។

រីឯនៅថ្ងៃទី 17 នឹងមានការតាំងបង្ហាញរថយន្តរបស់ស្ថាបនិក Gumball ព្រមទាំងរថយន្តទំនើបទាំងក្រៅ និងក្នុងស្រុកជាំច្រើនទៀតដូចជា Sport Car, Super Car, Luxury Car ដើម្បីបំបែកកំណត់ត្រា Guinness World Records នៅមុខតំបន់ប្រសាទអង្គរវត្តដែលជាសម្បត្តិបិតិកភណ្ឌពិភពលោកដ៏ល្បីល្បាញក្នុងតំបន់អាស៊ី។

វគ្គផ្តាច់ព្រ័ត្រធំនឹងប្រព្រឹត្តនៅប្រាសាទអង្គរវត្ត ដោយបានត្រៀមខ្លួនរួចជាស្រេចជាមួយសម្រស់ដ៏ស្រស់ត្រកាល រងចាំការតាំងពិពណ៌រថយន្តទំនើបៗគ្រប់គ្រឿងនៅក្នុងកម្មវិធី Gumball 3000… នេះហាក់ប្រៀបបានដូចជាឋានសួគ៌លើដីដ៏អច្ឆរិយៈមួយ ដោយវប្បធម៌បែបបុរាណ ច្របាច់បញ្ចូលជាមួយទំនើបសកម្ម បង្កើតបានជាទស្សនីយភាពល្អឥតខ្ចោះដែលមិនធ្លាប់មានពីមុនមក។