ឈុតរាជនីអង្គរបរមវិស្ណុលោក ច្នៃម៉ូដដោយ លោក អូលីវ៉ា គង់ ឆ្លុះបញ្ចាំងពីភាពស្រស់ស្អាតនៃវប្បធម៌ខ្មែរ

ប្រិយមិត្តឡេឌីស៍គ្រប់រូប ច្បាស់ជាបានជ្រាបរួចមកហើយនូវស្នាដៃដ៏ពិសេសជាច្រើនក្នុងការច្នៃម៉ូដសម្លៀកបំពាក់ របស់លោក អូ លីវ៉ាគង់ – Oliva Kong ដែលបានដាក់បង្ហាញនៅលើកឆាកអរន្តជាតិជារឿយៗ ទទួលបានការស្ងើចសរសើរយ៉ាងខ្លាំងពីសំណាក់មហាជន ហើយថ្មីៗនេះ លោកបានបញ្ចេញនូវស្នាដៃច្នៃ “ឈុតរាជនីអង្គរបរមវិស្ណុលោក” ដែលជាឈុតរ៉ូបបែបសហសម័យដ៏អស្ចារ្យឆ្លុះបញ្ចាំងអំពីរូបរាងនៃវត្ថុអច្ឆរិយៈគ្មានពីរលើពិភពលោក គឺ ប្រាសាទអង្គរវត្ត។

ការរចនាឈុតនេះឡើងពិតជាមានភាពទាក់ទាញយ៉ាងខ្លាំង ដោយនៅលើស្មានៃរ៉ូបមានកំពូលស្រួចពីរផុសឡើងតាមលំនាំប្រាសាទអង្គរវត្ត និងតួខ្លួននៃរ៉ូបតំណាងនាគ រីឯផ្នែកខាងក្រោមគឺ យកលំនាំតាមកាំជណ្តើរឡើងទៅកាន់កំពូលបាកាននៃប្រាសាទអង្គរវត្ត ហាក់ប្រៀបដូចជាជណ្តើរឡើងទៅកាន់ឋានសួគ៌បរមលោកជាទីឋានស្ងប់សុខ។

បន្ថែមពីនេះ លោក អូ លីវ៉ាគង់ ក៏បានច្នៃ Pattern នៃរ៉ូប រូបកលិ្កន (ខ្លួនមនុស្សក្បាលសេះ) ជាអវតាចុងក្រោយរបស់ព្រះវិស្ហុ ដកស្រង់ចេញពីប្រាសាទបន្ទាយស្រី លាយឡំជាមួយក្បាច់ភ្ញីវល្លិ៍ និងភ្ញីទេស ដកស្រង់ចេញពីចំលាក់ប្រាសាទអង្គរវត្ត។

អ្វីដែលគួរឱ្យចាប់អារម្មណ៍បន្ថែមទៀតនោះ ឈុតរាជនីអង្គរបរមវិស្ណុ ត្រូវបានគ្រងដោយកំពូលតារាចម្រៀងសម្លេងផ្អែម មាស សុខសោភា បង្កការចាប់អារម្មណ៍ផ្ទួនៗពីសំណាក់ហ្វេនលាន់មាត់ស្ញើចសរសើរគ្រប់រូប ដោយឈុតនេះទាំងស្អាត និងមានអត្ថន័យ ដោយបានធ្វើឱ្យថានាងពិតជាសាកសមឥតខ្ចោះនៅក្នុងម៉ូដរ៉ូបនេះ។

គួរបញ្ជាក់ផងដែរ លោក អូលីវ៉ា គង់ – Oliva Kong គឺជាគ្រូបង្ហាត់ដើរម៉ូត អ្នកជាអ្នកច្នៃម៉ូតសម្លៀកបំពាក់ម្ពុជាដ៏ល្បីឈ្មោះមួយរូប… ឈុតដែលចេញមកពីស្នាដៃរបស់លោកសុទ្ធសឹងតែប្រកបដោយភាពច្នៃប្រឌិតខ្ពស់ និងបង្កប់ភាពស្រស់ស្អាតយ៉ាងខ្លាំង។