ដំណឹងល្អ! អាជ្ញាធរជាតិអប្សរាសម្រេចបើកទូលាយរឿងថតរូបភាពនិងសម្លៀកបំពាក់ប្រពៃណីទាំងជាតិនិងអន្តរជាតិពុំតម្រូវឱ្យបង់ប្រាក់ទេ

អាជ្ញាធរជាតិអប្សរាបានប្រកាសជូនដំណឹងដល់សាធរណជនជាតិ និងអន្តរជាតិ ព្រមទាំងប្រតិបត្តិការនានាអំពីសេចក្តីសម្រេចថ្មី ដែលពាក់ព័ន្ធទៅនឹងសេវាសាធារណៈផ្លូវការក្នុងរមណីដ្ឋានអង្គរ អំពីផ្នែកការផ្តល់សេវាកម្ម ដែលពុំតម្រូវអោយបង់ប្រាក់ជាដាច់ខាតចំនួនពីរសំខាន់ៗ ៖

ទី១ ៖ មិនតម្រូវអោយបង់ប្រាក់ និងពុំចាំបាច់ដាក់ពាក្យស្នើសុំលើសកម្មភាព ផ្សព្វផ្សាយអំពីអរិយធម៌ វប្បធម៌ខ្មែរ លើបណ្តាញសង្គម ដែលមានដូចជា Facebook You Tube Tik Tok ។ល។ តាមរយៈឧបករណ៍ទូរសព្ទដៃ ប៉ុន្តែជៀសវាងដាច់ខាត ការថតរូបភាពបែប មិនសមរម្យ អាសអាភាស និងធ្វើសកម្មភាព ប៉ះពាល់ដល់តម្លៃ សិលធម៌ និងវប្បធម៌ នៅផ្នែកទាំងអស់នៃសេវាកម្ម ទូទៅទាំងនោះ។

ទី២ ៖ មិនតម្រូវអោយបង់ប្រាក់ និងពុំចាំបាច់ ដាក់ពាក្យស្នើសុំ លើសកម្មភាពថតរូបសន្លឹក ឬ វីដេអូ នៅក្នុងសម្រៀកបំពាក់ អាពាហ៍ពិពាហ៍ ដែលចងក្រងអនុស្សាវរីយ៍ ផ្ទាល់ខ្លួនទាំងជាតិ និងអន្តរជាតិ ដោយពុំប្រើប្រាស់ឧបករណ៍ ដ្រូន ឬ យន្តហោះ ខ្នាតតូចគ្មានមនុស្សបើកឡើយ ប៉ុន្តែអនុញ្ញាតត្រឹមជា សម្រៀកបំពាក់ដែលមានលក្ខណៈបែបប្រពៃណី ដែលត្រូវបានលើកទឹកចិត្តអោយប្រើប្រាស់ជាមួយនឹងសម្អាងការ ដែលទទួលស្គាល់ដោយក្រសួងវប្បធម៌ និងវិចិត្រសិល្បៈ។

ដូច្នេះ ទាំងពីរចំណុចនេះគឺជាការសម្រេចរបស់ អាជ្ញាធរជាតិអប្សរា ដែលស្ថិតក្រោមការជួយជ្រោមជ្រែងពីក្រសួងវប្បធម៌ និងវិចិត្រសិល្បៈ ដើម្បីបន្ថែមនៃសន្ទុះនៃការផ្សព្វផ្សាយដោយផ្ទាល់ និងប្រយោល ចំពោះប្រាង្គប្រសាទបុរាណខ្មែរ ផ្សព្វផ្សាយអំពីវប្បធម៌ អរិយធម៌ ប្រពៃណីខ្មែរ ដ៏សម្បូរបែប តាមរយៈអ្នកផលិតមាតិកា វីដេអូក្តី អ្នកផលិតវីដេអូជំនាញក្តី និងគ្រប់ប្រភេទរូបភាពដែលប្រើប្រាស់នូវឧបករណ៍អេឡិកត្រូនិកបែបសម័យទំនើប និងមានចរិកលក្ខណៈ សុទិដ្ឋិនិយមខ្ពស់ចំពោះគុណតម្លៃ វប្បធម៌ខ្មែរយើង។

យោងតាម នាយដ្ឋានព័ត៌មាន នៃទូរទស្សន៍ជាតិកម្ពុជា