តាមមន្ត្រី៖ CBC មិនមានកន្លែងណាបញ្ជាក់​ថា អតិថិជនណាមួយ ខូចប្រវត្តិកម្ចីនោះទេ

“បង់សងយឺតយ៉ាវ ប្រយ័ត្នខូច CBC” គឺជាពាក្យដែលមន្ត្រីឥណទានច្រើនប្រើទៅលើប្រជាពលរដ្ឋដែលជាអតិថិជនទទួល​កម្ចីរបស់ខ្លួន ប៉ុន្តែតាមមន្ត្រីជំនាញ បានបញ្ជាក់​អោយដឹង​ថា ជាបច្ចេកទេស គឺ​មិនមាន​ការកត់ត្រាថា អតិថិជនណាមួយ ខូចប្រវត្តិសងត្រឡប់ចំពោះកម្ចីរបស់ខ្លួន​នោះទេ។

CBC មកពីពាក្យ “Credit Bureau Cambodia” ជា​ស្ថាប័នឯកជនសុទ្ធសាធដែលមានភាគទុនិក២ជាមួយបរទេស ក្នុង​នោះសមាគមមីក្រូហិរញ្ញវត្ថុ និងសមាគមធនាគារកម្ពុជា ជាភាគទុនិក កាន់កាប់ភាគហ៊ុន​ ៥១% និង Credit Bureau Asia Holdings ដែលមានភាគទុនិកសិង្ហបុរី និងសហរដ្ឋអាមេរិកកាន់កាប់ ៤៩%។

 

តាម​លោក ខុម ច័ន្ទតារា នាយកប្រតិបត្តិការ​ នៃក្រុមហ៊ុន ក្រេឌីតប្យូរ៉ូកម្ពុជា បាន​ឲ្យដឹង​ថា ស្ថាប័នធ្វើការជាមួយដៃគូក្នុងស្រុកចំនួន ១៩៥ លើ​ការកត់ត្រា​ព័ត៌មានរបស់​អតិថិជនពាក់ព័ន្ធ​នឹង​កម្ចី សម្រាប់ជាឯកសារយោងសម្រាប់មន្ត្រីឥណទាន ឬធនាគារ និងមីក្រូហិរញ្ញវត្ថុ សម្រាប់ការពិចារណាលើកម្ចីរបស់អតិថិជន។

 

របាយការ​ណ៍​នេះ គឺកត់ត្រា​ប្រវត្តិកម្ចី និងការ​សងត្រឡប់មកវិញរបស់អតិថិជន តាំង​ល្អ និង​មិនល្អ តែ CBC មិនមែនជា​អ្នក​សម្រេច​ថា គួរ​តែអោយកម្ចីទៅអតិថិជន ឬអត់នោះទេ និង​ក៏នឹងមិនបញ្ជាក់​ថា អតិថិជនរូបណា ខូច ឬមិនខូច CBC ដែរ ។ លោក ខុម ច័ន្ទតារា ថ្លែងថា “នៅក្នុង CBC អត់មានកន្លែងណាមួយកត់ត្រា​ថា អតិថិជនរូបណា ខូច ឬមិនខូច CBC ផង គឺ​អត់មានផង គឺ​មាន​តែ​កត់ត្រាព័ត៌មានល្អ និងមិនល្អរបស់អតិថិជនប៉ុណ្ណោះ”។

 

លោកបាន​ពន្យល់​ថា CBC កត់ត្រាព័ត៌មានល្អរបស់អតិថិជន គឺ​​សំដៅលើការបង់សងទៀងទាត់។ ដោយ​ឡែក​ព័ត៌មានមិនល្អ គឺ​សំដៅលើ​ការ​បង់​យឺតយ៉ាវ ដោយក្នុងនោះ​យឺតជាង ៩០ ថ្ងៃ រាប់ថា​ជា​ព័ត៌មានមិនល្អ ហើយព័ត៌មាននេះនឹងត្រូវឈប់បង្ហាញជាស្វ័យប្រវត្តិ​ពេលកន្លងហួស ២​ឆ្នាំ។

 

ដូច្នេះហើយ CBC មិន​មានបញ្ជាក់ថា អតិថិជនរូបណា ខូច ឬមិនខូច CBC នោះ​ឡើយ។

 

ពាក្យថាខូច “CBC” គឺជា​ពាក្យដែលគេលឺជាញឹកញាប់ ក្នុងកិច្ចការផ្ដល់កម្ចី និងទទួលសំណងរវាងប្រជាពលរដ្ឋដែលជាអតិថិជន និងស្ថាប័នធនាគារ ដែលសង្កត់ធ្ងន់លើប្រវត្តិនៃការទូទាត់សងរបស់អតិថិជនយឺតយ៉ាវ។

 

ភាគច្រើន ជាពាក្យចេញពីមាត់មន្ត្រីឥណទាន ដែលមានន័យជំរុញ ក៏ដូច​ជា​គំរាម​អតិថិជនអោយប្រញាប់រកប្រាក់មកបង់ ករណី​ពួកគេ​បង្ហាញពីតម្រុយនៃការមិនមានប្រាក់បង់សងតាមពេលវេលាដែលធនាគារ ឬមីក្រូហិរញ្ញវត្ថុបានកំណត់។

 

បញ្ហា​នេះ លោក ខុម ច័ន្ទតារា ប្រាប់​ថា លោក​ក៏បានដឹងលឺដូច​គ្នា ហើយ​លោក​ក៏មាន​ការ​ហួសចិត្តដែរ និង​ថា CBC ក៏​ព្យាយាម​ផ្សព្វផ្សាយ​ពីព័ត៌មាននេះដូចគ្នា។ ជាក់ស្ដែង កាលពីចុងសប្ដាហ៍​មុន ស្ថាប័ននេះ បាន​បើកវគ្គបណ្ដុះបណ្ដាលអ្នកសារព័ត៌មាន​មួយ មានអ្នកសារព័ត៌មានចំនួន ២៩រូបមកពី ២៧ស្ថាប័នបានចូលរួម។

លោក ពុយ គា ប្រធានក្លឹបអ្នកកាសែតកម្ពុជា ហៅកាត់ថា ក.អ​.ក បាន​លើកឡើង ដោយទទទួលស្គាល់​ថា អ្នកកាសែតកម្ពុជា ក្នុងនោះសូម្បីតែរូបលោកផ្ទាល់ នៅខ្វះចំណេះដឹងអំពីសេដ្ឋកិច្ច និងហិរញ្ញវត្ថុ ឬក៏អាច​និយាយម្យ៉ាងទៀត​ថា កម្ពុជានៅខ្វះអ្នកកាសែតជំនាញខាងធនាគារ និងហិរញ្ញវត្ថ។

 

ដូច្នេះ វគ្គបណ្ដុះបណ្ដាល​នេះ គឺ​ពិតជាមានសារៈសំខាន់ណាស់សម្រាប់បង​ប្អូន​សារព័ត៌មាន សម្រាប់ពង្រឹងបន្ថែមសមត្ថភាព​រាយការណ៍អំពីវិស័យនេះទៅកាន់សាធារណជន។ លោក ពុយ គា បាន​ថ្លែងអំណរគុណដល់ CBC  ដែលបានសហការជាមួយក្លឹបអ្នកកាសែត​សម្រាប់​វគ្គបណ្ដុះបណ្ដាល​នេះ ដោយ​គិតមកត្រឹមពេល​នេះ មាន​អ្នក​សារព័ត៌មាន ៤ក្រុមហើយ ដែលមកទទួល​យក​ការ​បណ្ដុះបណ្ដាល។

ក៏ដូចគ្នា​នឹង​លោក ពុយ គា​ ដែរ លោក អឿ សុធារ័ត្ន ប្រធាននាយកប្រតិបត្តិ CBC ក៏ថ្លែងអំណរគុណដល់អ្នកសារព័ត៌មានទាំងអស់ដែលបានមកចូល​រួម ក្នុងនោះលោកលើកឡើង​ថា អ្នកសារព័ត៌មានជាបុគ្គលដ៏សំខាន់ ដែលមាននាទី​ផ្សព្វផ្សាយព័ត៌មាននេះបន្តទៅសាធារណជន។

 

ដូច្នេះហើយ ឆ្លងកាត់វគ្គបណ្ដុះបណ្ដាល​នេះ លោក​សង្ឃឹម​ថា អ្នកសារព័ត៌មាន នឹងចូលរួម​ផ្សព្វផ្សាយអោយប្រជាពលរដ្ឋកាន់តែមានចំណេះដឹងពាក់ព័ន្ធ​នឹង​ធនាគារ និងហិរញ្ញវត្ថុ កាន់តែទូលំទូលាយ៕