តើមានរោគសញ្ញាអ្វីខ្លះ ដែលអាចកើតឡើងចំពោះស្រ្តីជិតអស់វដ្តរដូវ?

ការអស់វដ្តរដូវ គឺជាការបញ្ឈប់ទាំងស្រុងនូវការធ្លាក់ឈាមរដូវដែលស្ត្រីតែងមានជារៀងរាល់ខែ ដោយស្ត្រីអស់(ពង)មេជីវិតរលីង ពីអូវែររបស់ខ្លួន។ ការអស់វដ្តរដូវជាដំណាក់កាលដ៏លំបាកមួយនៃជីវិតស្ត្រី ! ជាធម្មតា ចំពោះស្ត្រីស្ទើរគ្រប់រូបទាំងអស់ ការអស់រដូវមិនមែនបញ្ចេញការផ្លាស់ប្តូរភ្លាមភ្លែតនោះទេ នៅក្នុងខែនេះស្រ្តីមានរដូវ ហើយនៅវេលាថ្ងៃស្អែកឡើងស្រ្តីអស់រដូវភ្លាមនោះភ្លាមទេ… មុននឹងចាប់អស់រដូវ ស្ត្រីអាចមានជួបប្រទះនូវអាការៈ ក៏ដូចជារោគសញ្ញាជាច្រើន រួមមាន៖

• វដ្តរដូវមិនទៀង

ស្រ្តីចាប់ផ្តើមមករដូវមិនទៀង និងខុសកាលកំណត់ ដែលចន្លោះវដ្តរដូវអាចមានរយៈពេលខ្លី ឬវែងពេក និងមានចំនួនបរិមាណឈាមរដូវតិច ឬច្រើន មានពេលខ្លះអាចឈានដល់ការរំលងខែផងដែរ។

• មានបញ្ហាទ្វាមាស

នៅពេលកម្រិតអ័រម៉ូន ”អឺស្ត្រូសែន” ថយចុះ ជាលិកាទ្វាមាសអាចបាត់បង់រំអិល ដែលអាចបណ្តាលឱ្យស្ងួតទ្វារមាស ក្រហាយទ្វារមាស រមាស់ទ្វារមាស ធ្វើឱ្យឈឺចាប់ពេលរួមភេទ។

• អារម្មណ៍ឆាប់ប្រែប្រួល

អ្នកទទួលអារម្មណ៍ឆាប់ខឹង មួរម៉ៅ ភ្លាមៗដោយមិនអាចទប់បាន ឬអាចជាការបង្កទៅជាហានិភ័យខ្ពស់នៃជំងឺធ្លាក់ទឹកចិត្តផងដែរ ព្រោះវាបាន រំខានដល់ដំណេក និងអារម្មណ៍របស់អ្នកយ៉ាងខ្លាំង។

• ការបង្កកំណើតមានការថយចុះ

នៅពេលដំណើរការបញ្ចេញអូវុលចាប់ផ្តើមមិនទៀងទាត់ ឬអស់ លទ្ធភាពក្នុងការមានផ្ទៃពោះក៏មានការថយចុះផងដែរ។

• កម្រិតជាតិកូឡេស្តេរ៉ូលប្រែប្រួល

ការថយចុះកម្រិតអឺស្ត្រូសែន អាចធ្វើឱ្យមានការប្រែប្រួលកម្រិតជាតិកូឡេស្តេរ៉ូល បង្កើនកូឡេស្តេរ៉ូលមិនល្អ (LDL) និងបន្ថយកម្រិតកូឡេស្តេរ៉ូលល្អ (HDL) ដែលរួមចំណែកបង្កើនហានិភ័យនៃជំងឺបេះដូង។

• ពិបាកក្នុងការគេង

អ្នកអាចមានភាយចំហាយក្តៅៗលើមុខ ក ថ្ពាល់ បណ្តាលឱ្យបែកញើសខុសធម្មតា អំឡុងនៃការត្រៀមអស់វដ្តរដូវ ដែលធ្វើឱ្យអ្នកពិបាកក្នុងការគេងនៅពេលយប់។