ខ្មែរ
English
រមណីយដ្ឋានភ្នំសំពៅ ជារមណីយដ្ឋានមួយដែលទាក់ទាញភ្ញៀវទេសចរ ទៅ លេងកម្សាន្តមិនចេះជិន ណាយ ដោយសារតែនៅទីនោះ មានទេសភាពស្រស់ស្អាត ពោលគឺបានទៅកំសាន្តម្តងហើយ ចង់ទៅម្តងទៀត។ អ្វីដែលពិសេសជាងនេះទៅទៀតនោះគឺ តំបន់ទេសចរណ៍ភ្នំសំពៅនេះ ត្រូវបានរៀបចំ បំពាក់ ភ្លើងពណ៌កម្សាន្ត ពេលរាត្រី ឲ្យដូចជាផ្សាររាត្រី បែប ធម្មជាតិ ដើម្បីទាក់ទាំកំណើនភ្ញៀវទេសចរជាតិ និងអន្តរជាតិ។
ក្នុងទិសដៅដើម្បីទាក់ទាញកំណើនភ្ញៀវទេសចរ ក្នុង និក្រៅស្រុក ឲ្យមកទស្សនាក្នុងខេត្តបាត់ដំបងបន្ថែមទៀត ខាងមន្ទីខេត្តបាន និងកំពុងខិតខំកែច្នៃតំបន់ទេសចរណ៍ ភ្នំសំពៅប្រែក្លាយជារមណីយដ្ឋាន ឈានមុខគេក្នុងខេត្តបាត់ដំបង ក្នុងឆ្នាំ២០២៤ នេះ។ ដើម្បីឲ្យពិភពលោក បានស្គាល់កាន់តែច្រើននូវផលិតផល និង ម្ហូបអាហារ ដែលជាស្នាដៃកូនខ្មែរ ខាងមន្ទីរខិតខំកែច្នៃ បន្ថែមទៀតនៅតំបន់ ភ្នំសំពៅលូន ពីសក្ដានុពល ដែលមានស្រាប់នៅតំបន់នេះឲ្យក្លាយជា រមណីយដ្ឋានឈានមុខគេនៅក្នុងខេត្តបាត់ដំបង។ នេះជាការបញ្ជាក់ឲ្យដឹងពីលោក ហម អរុណ អនុប្រធានមន្ទីទេសចរន៍ខេត្តបាត់ដំបង។
ការកែច្នៃបន្ថែមនេះ មានសាងសង់ជា ទូបដាក់តាំង លក់ផលិតផលក្នុងស្រុក( ភូមិមួយ ផលិតផលមួយ) រួម និងម្ហូបអាហារឆ្ងាញៗយ៉ាងសម្បូរបែបផងដែរ។ ជាក់ស្តែងបច្ចុប្បន្ន កំពុងតែសាងសង់ និងមានរៀបចំបំពាក់ភ្លើងពណ៌ សម្រាប់ភ្ញៀវកម្សាន្ត ពេលរាត្រី ដែលមើលទៅដាក់ដូចជា ផ្សាររាត្រី ដ៏ទំនើបបែបធម្មជាតិមួយ ធ្វើឲ្យអារម្មណ៍ភ្ញៀវទេសចរស្រស់ស្រាយ។ មិនតែប៉ុណ្ណោះ ចំពោះការកែច្នៃបន្ថែមនេះ គឺត្រូវបានសម្ពោធដាក់អោយដំណើរជាផ្លូវការកាលពីថ្ងៃទី ១១-១២ ឆ្នាំ២០២៤ តទៅ។
ភ្នំសំពៅ ជាឈ្មោះភ្នំមួយស្ថិតក្នុងស្រុកបាណន់ ខេត្តបាត់ដំបង មានចម្ងាយ ១២ គីឡូម៉ែត្រពីទីរួមខេត្តបាត់ដំបង ត្រូវបានដាក់បញ្ចូលជារមណីយដ្ឋានវប្បធម៌ប្រវត្តិសាស្ត្រដ៏ពេញនិយម សម្រាប់បម្រើដល់វិស័យទេសចរណ៍ក្នុងខេត្តបាត់ដំបង។ ភ្នំនេះមានល្អាងរហូតដល់ ១២ ប្លែកពីគ្នាមានកម្ពស់ប្រមាណ ១០០ ម៉ែត្រ កាំជណ្ដើរឡើងចំនួន ១០៣០ កាំ មានទីតាំងស្ថិតនៅតាមដងផ្លូវជាតិលេខ ៥៧ (អតីតផ្លូវជាតិលេខ១០) ស្ថិតក្នុងឃុំភ្នំសំពៅ ស្រុកបាណន់ ខេត្តបាត់ដំបង។
នៅលើកំពូលភ្នំ មានវត្តមួយ ឈ្មោះថា វត្តគិរីរម្យ និងមានល្អាង រូងភ្នំជាច្រើន សរុបទាំងអស់ចំនួន ១២ រួមមាន ៖ ១. ល្អាងផ្កាស្លា ២. ល្អាងគក់ទ្រូង ៣. ល្អាងខ្យល់ ៤. ល្អាង តែងខ្លួន ៥. ល្អាងល្ខោន ៦. ល្អាងជ្រៃ ៧. ល្អាងពេជ្រ ៨. ល្អាងខ្វែង ៩. ល្អាងប្រេង ១០. ល្អាងស្ថានីយ ឬល្អាងធំ ១១. ល្អាងក្បាលខ្មោច ១២. ល្អាងប្រចៀវ ប៉ុន្តែល្អាងដែលភ្ញៀវនិយមចូលទស្សនាមាន តែល្អាងផ្កាស្លា និងល្អាងល្ខោន។
នៅក្បែរភ្នំសំពៅមានចម្កោមភ្នំសំខាន់ៗ មួយចំនួនទៀត ដែលមានជាប់ទាក់ទងនឹងរឿង ព្រេងនិទានខ្មែរ គឺរឿងព្រះបាទរាជកុល នាងរំសាយសក់។ ភ្នំទាំងនោះមាន ភ្នំក្តោង ភ្នំក្រពើ ភ្នំអណ្តើក ភ្នំទ្រុងមាន់ ទ្រុងទា ភ្នំនាងរំសាយសក់ ភ្នំតាគ្រាម និងភ្នំសងក្បាល់ ។ អ្វីដែលពិសេសជាងនេះទៅទៀត ភ្នំសំពៅ មិនត្រឹមតែ ជារមណីយដ្ឋានធម្មជាតិ ដ៍មានប្រជាប្រិយភាពប៉ុណ្ណោះទេ ប៉ុន្តែវាជាកន្លែងកម្សាន្តមួយ ដ៍ទាក់ទាញ ក្នុងចំណោម រមណីយដ្ឋានជាច្រើនក្នុងខេត្តបាត់ដំបង ។
ទស្សនីយភាពហ្វូងសត្វប្រជៀវរាប់លានក្បាល ដែលហោះ ចេញពីល្អាង ។ អ្នកស្រុកតែងតែហៅហ្វូងប្រជៀវទាំងនោះថា “កងទ័ពប្រជៀវដ៍ក្លាហាន” ពីព្រោះការហោះហើរ របស់ហ្វូងសត្វប្រជៀវទាំងនោះ ប្រៀបបានទៅនឹងចរន្តទឹកហូរលើផ្ទៃអាកាស ។ ជារៀងរាល់ថ្ងៃ នៅមុនពេល សូរិយារៀបអស្តង្គត់ នៅចន្លោះម៉ោង ៥៖៣០ នាទី ដល់ម៉ោង ៦៖ ១៥ នាទីល្ងាច គឺជាពេលវេលាដ៍ជាក់លាក់ ដែល ហ្វូងសត្វប្រជៀវចាប់ផ្តើមហោះហើរបណ្តែតខ្លួនចេញពីរូង ខ្មៅដាស់ពេញមេឃ និងតម្រង់ជួរគ្នាចេញពីរូង ធ្វើអោយមានការចាប់អារម្មណ៍យ៉ាងខ្លាំង ពីភ្ញៀវជាតិ និងអន្តរជាតិ មកពីគ្រប់ទិសទី មកទស្សនាកម្សាន្តអារម្មណ៍ នៅរមណីយដ្ឋានភ្នំសំពៅ។
ភ្ញៀវទេសចរជាតិ និងអន្តរជាតិ រាប់រយនាក់ក្នុងមួយថ្ងៃៗ ដែលនាំគ្នាអង្គុយរង់ចាំ ទស្សនាហ្វូងសត្វប្រជៀវរាប់លានក្បាលហើរចេញពីល្អាង សុទ្ធតែបានបង្ហាញពីទឹកមុខរីករាយចំពោះទិដ្ឋភាពដ៍ អស្ចារ្យនេះ ។ ម្យ៉ាងវិញទៀតហ្វូងសត្វប្រជៀវទាំងអស់នោះត្រូវបានការពារ និងអភិរក្សយ៉ាងតឹងរឹង ដោយអាជ្ញាធរមូលដ្ឋាន ផងដែរ ៕
