ត្រឹមដំណាច់ឆ្នាំ២០២៣ បាគង បានសម្រួលប្រតិបត្តិការទូទាត់ចំនួនជាង ២០០ លានប្រតិបត្តិការ

ជីវិតកាន់តែមានភាពងាយស្រួលជាមួយនឹងការរួមបញ្ចូលគ្នាតែមួយនៃការទូទាត់ប្រាក់តាមរយៈទូរស័ព្ទនឹងកម្មវិធីធនាគារ។ ប្រព័ន្ធបាគង បានកំណត់ឡើងវិញនូវការទូទាត់ប្រាក់តាមរយៈទូរសព័្ទ និងសេវាធនាគារ តាមរយៈការរួមបញ្ចូលគ្នានូវ e-wallets, ការទូទាត់ប្រាក់តាមទូរស័ព្ទ, សេវាធនាគារតាមរយៈអ៊ីនធឺណែត និងកម្មវិធីហិរញ្ញវត្ថុជាច្រើនជាមួយនឹង interface ដែលងាយស្រួលនៅក្នុងការប្រើប្រាស់សម្រាប់គណនីធនាគារណាមួយដែលអ្នកពេញចិត្ត។ សូមបញ្ឈប់នូវការចំណាយពេលវេលាក្នុងការផ្លាស់ប្តូររវាងកម្មវិធីជាច្រើននៅថ្ងៃនេះហើយរីករាយជាមួយនឹងភាពសាមញ្ញ ងាយស្រួល និងសុវត្ថិភាពជាមួយបាគង។

ធនាគារជាតិ​នៃ​កម្ពុជា​បាន​ដាក់​ឱ្យ​ដំណើរការ​ជា​ផ្លូវការ​ “​ប្រព័ន្ធ​បាគង​”​ កាលពីថ្ងៃទី ២៨ ខែតុលា ឆ្នាំ២០២០។ ប្រព័ន្ធ​បាគង​ប្រៀប​ដូច​ជា​ឆ្អឹងខ្នង​នៃ​ប្រព័ន្ធ​ទូទាត់​ ដែល​អាច​ឱ្យ​អតិថិជន​ធ្វើ​ប្រតិបត្តិការ​ភ្លាមៗ​ជា​អេ​ឡិច​ត្រូ​និក​ដូច​ជា​ ការ​ទូទាត់​ ផ្ទេរ​ប្រាក់​ ដាក់​ប្រាក់​ និង​ដក​ប្រាក់​ កាន់តែ​មាន​ភាព​ងាយស្រួល​ ឆាប់រហ័ស​ កាត់​បន្ថយ​ចំណាយ​ថ្លៃ​ប្រតិបត្តិការ​ និង​មាន​សុវត្ថិភាព​ខ្ពស់​។​

ទោះបីបងប្អូនអាជីវករមានភាពមមាញឹកក្នុងការលក់ដូរក៏ដោយ អោយតែមាន KHQR សម្រាប់ការទូទាត់ បងប្អូនលែងពិបាកក្នុងការពិនិត្យក្រដាសប្រាក់ ឬអាប់លុយ ព្រមទាំងមានភាពងាយស្រួលក្នុងការពិនិត្យមើលប្រតិបត្តិការចំណូល ចំណាយ។ ប្រើ KHQR ទឹកប្រាក់ចូលភ្លាមៗ រហ័ស ងាយស្រួល និង មានសុវត្ថិភាព! ជាមួយ KHQR លោកអ្នកអាចស្កេនទូទាត់បានជាមួយអាជីវករជាង ៣លានទីតាំងទូទាំងប្រទេសកម្ពុជា។

ជាក់ស្តែង គិតត្រឹមដំណាច់ឆ្នាំ២០២៣ ប្រព័ន្ធបាគងបានសម្រួលដល់ប្រតិបត្តិការទូទាត់ចំនួនជាង ២០០ លានប្រតិបត្តិការ ក្នុងនោះ ៦៨,៧៩ លានប្រតិបត្តិការជាប្រាក់រៀល និង ១៣២,១៤ លានប្រតិបត្តិការជាប្រាក់ដុល្លារអាមេរិក ខណៈទំហំប្រាក់ទូទាត់ជាប្រាក់រៀលមានជាង ៨០ ទ្រីលានរៀល និងជាប្រាក់ដុល្លារអាមេរិកជាង ៥៣ ពាន់លានដុល្លារអាមេរិក។ នេះបើយោងតាមរបាយការណ៍ប្រចាំឆ្នាំ២០២៣ របស់ធនាគារជាតិនៃកម្ពុជា។

​ស្របតាមការរីកចម្រើននៃបច្ចេកវិទ្យាហិរញ្ញវត្ថុ ធនាគារជាតិនៃកម្ពុជា បានចាប់ឱកាសអភិវឌ្ឍន៍ប្រព័ន្ធទូទាត់ជាលំដាប់ ដែលបានធ្វើឱ្យការទូទាត់កាន់តែងាយស្រួល សុវត្ថិភាព និងឆាប់រហ័ស ដោយបានដោះស្រាយឧបសគ្គក្នុងការទូទាត់ឆ្លងគ្រឹះស្ថាន និងការយកថ្លៃសេវាខ្ពស់។ ប្រសិទ្ធភាពនៃប្រព័ន្ធទូទាត់បានរួមចំណែកយ៉ាងសកម្មក្នុងការជំរុញការដោះដូរទំនិញ និងសេវាបរិយាបន្នហិរញ្ញវត្ថុ និងការលើកកម្ពស់ការប្រើប្រាស់ប្រាក់រៀល ដែលគាំទ្រដល់គោលអភិវឌ្ឍន៍សេដ្ឋកិច្ច និងសង្គមឌីជីថលនៅកម្ពុជា។

បច្ចុប្បន្ន ប្រព័ន្ធបាគង មានសមាជិកចំនួន ៥៧ សម្រាប់អោយអតិថិជនអាចផ្ទេរប្រាក់ពីមួយទៅមួយបានយ៉ាងងាយស្រួល ហើយកម្ពុជាក៏បានតភ្ជាប់ប្រព័ន្ធទូទាត់ជាមួយប្រទេស ថៃ វៀតណាម និងឡាវ ព្រមទាំងក្រុមហ៊ុនផ្តល់សេវាទូទាត់អន្តរជាតិមួយចំនួនជាមួយនឹងការតភ្ជាប់ជាមួយប្រទេសផ្សេងទៀតក្នុងតំបន់ដូចជា ចិន ឥណ្ឌា ជាដើម៕​