ត្រឹមរយៈពេល ៦ខែ ផ្លូវរថភ្លើងល្បឿនលឿន មានអ្នកដំណើររហូតដល់ ២,៥៦ លាននាក់

ក្រុមហ៊ុន PT Kereta Cepat Indonesia-China (KCIC) ដែលជាក្រុមហ៊ុនបណ្តាក់ទុនរួមគ្នារវាងរដ្ឋឥណ្ឌូណេស៊ី និងចិន បានឱ្យដឹងថា ផ្លូវរថភ្លើងល្បឿនលឿន ចាការតា-បានឌុង (Jakarta-Bandung) បានកំណត់ប្រតិបត្តិការរយៈពេល ៦ខែរបស់ខ្លួនកាលពីថ្ងៃពុធ ជាមួយនឹងការដឹកជញ្ជូនអ្នកដំណើរសរុបចំនួន ២.៥៦ លាននាក់។

យោងតាមយោងតាមការបញ្ជាក់របស់ ក្រុមហ៊ុន KCIC ចាប់តាំងពីប្រតិបត្តិការពាណិជ្ជកម្មផ្លូវការរបស់ខ្លួននៅពាក់កណ្តាលខែតុលាឆ្នាំមុន ផ្លូវរថភ្លើងបានដំណើរការរថភ្លើងសរុបចំនួន ៧.០៥០ ជើង ជាមួយនឹងចម្ងាយផ្លូវជាង ១,២៦ លានគីឡូម៉ែត្រ។

នាពេលបច្ចុប្បន្ន ការធ្វើដំណើរតាមរថភ្លើងប្រចាំថ្ងៃរបស់ផ្លូវរថភ្លើងត្រូវបានកើនឡើងពី ១៤ ទៅ ៥២ ជើង ហើយចំនួនកៅអីអ្នកដំណើរបានកើនឡើងពី ៨,៤០០ ដល់ជាង ៣១,០០០។ ចំនួនអ្នកដំណើរខ្ពស់បំផុតដែលត្រូវបានបញ្ជូនក្នុងមួយថ្ងៃគឺ ២១,៥៣៧ នាក់ ខណៈអត្រាកាន់កាប់កៅអីប្រចាំថ្ងៃខ្ពស់បំផុតត្រូវបានកត់ត្រានៅ ​ ៩៩,៦%។

ក្រុមហ៊ុន KCIC បាននិយាយថា ខ្លួនបានទាក់ទាញយ៉ាងពេញលេញនូវបទពិសោធន៍ដ៏សម្បូរបែបរបស់ប្រទេសចិនក្នុងរថភ្លើងល្បឿនលឿន ដើម្បីអនុវត្តការគ្រប់គ្រងប្រតិបត្តិការ និងថែទាំ ឆ្លើយតបបានត្រឹមត្រូវចំពោះលក្ខខណ្ឌអាកាសធាតុខ្លាំង ដូចជាភ្លៀងធ្លាក់ខ្លាំង និងព្យុះទីហ្វុង ក្នុងកិច្ចខិតខំប្រឹងប្រែងដើម្បីធានាបាននូវប្រតិបត្តិការរលូននៃផ្លូវដែក និងសុវត្ថិភាពអ្នកដំណើរ។

លើសពីនេះ ដើម្បីបំពេញតម្រូវការរបស់អ្នកដំណើរឱ្យកាន់តែប្រសើរឡើង គោលការណ៍ថ្លៃឈ្នួលថាមវន្តត្រូវបានណែនាំ កាលវិភាគប្រតិបត្តិការត្រូវបានធ្វើឱ្យប្រសើរ ហើយគ្រឿងបរិក្ខារនៅស្ថានីយ៍រថភ្លើងត្រូវបានកែលម្អ។

យោងតាមទិន្នន័យផ្លូវការបានឱ្យដឹងថា ផ្លូវរថភ្លើងល្បឿនលឿន ដែលជាប្រភេទផ្លូវដែកដំបូងគេនៅក្នុងប្រទេសឥណ្ឌូនេស៊ី និងអាស៊ីអាគ្នេយ៍ បានឈានដល់សញ្ញានៃការដឹកជញ្ជូនអ្នកដំណើរចំនួន ២ លាននាក់នៅដើមខែមីនា។

​លោក សេពតាន ហារ៉ូ សេតូ (Septian Hario Seto) អនុរដ្ឋមន្ត្រីនៃក្រសួងសម្របសម្រួលកិច្ចការសមុទ្រ និងការវិនិយោគរបស់ប្រទេសឥណ្ឌូនេស៊ី បាននិយាយថា ផ្លូវដែកបានផ្លាស់ប្តូរការធ្វើដំណើររវាងទីក្រុងចាការតា និងក្រុងបានឌុង ដោយផ្លាស់ប្តូរវាពីផ្លូវហាយវេទៅផ្លូវដែក។

លោក សេតូ (Seto) បានលើកឡើងថា “ខ្ញុំមានទំនុកចិត្តថានៅពេលអនាគត គំរូនៃការចល័តរបស់យើងនឹងវិវត្តពីការដឹកជញ្ជូនបុគ្គលទៅវិធីសាស្រ្តដែលផ្តោតលើការដឹកជញ្ជូនច្រើន” ។

ជាមួយនឹងល្បឿនរចនា ៣៥០ គីឡូម៉ែត្រក្នុងមួយម៉ោង ផ្លូវរថភ្លើងល្បឿនលឿន ១៤២,៣គីឡូម៉ែត្រ បានកាត់បន្ថយការធ្វើដំណើររវាងរដ្ឋធានីចាការតារបស់ប្រទេសឥណ្ឌូនេស៊ីទៅកាន់ទីក្រុងបានឌុង(Bandung) ក្នុងខេត្ត ចាវ៉ាភាគខាងលិច (West Java) ពីរយៈពេលជាង ៣ ម៉ោងទៅប្រហែល ៤០ នាទីប៉ុណ្ណោះ៕ Source: (China Daily)