ថ្លែងដោយឯកអគ្គរដ្ឋទូតសាធារណរដ្ឋប្រជាមានិតចិនប្រចាំនៅកម្ពុជា ៖ កម្ពុជានឹងក្លាយជាគោលដៅទេសចរណ៍ដែលមានសន្ទុះអភិវឌ្ឍខ្លាំងនៅតំបន់អាស៊ី

យោងតាមសំណេរ នៅលើទំព័រហ្វេសប៊ុកផ្លូវការរបស់លោកឯកឧត្តម វ៉ាង វិនប៊ីន ក្រុមហ៊ុនវិភាគទិន្នន័យអាកាសចរណ៍ Cirium បានព្យាករថា កម្ពុជានឹងទទួលបានជើងហោះហើរចំនួន 31 579 ជើងក្នុងឆ្នាំ 2025 ពោលកើនឡើង 14.2% បើធៀបនឹងឆ្នាំ 2024។ យ៉ាងណាមិញ កម្ពុជាក៏រំពឹងនឹងមានកំណើនចំនួនកៅអីសម្រាប់អ្នកដំណើរដែលអាចប្រើបាន (Available Passenger Seats) ប្រមាណ 5,2 លានកន្លែង។ តាមរយៈការព្យាករនេះ លោក វ៉ាង វិនប៊ីន ប្រមើលឃើញពីការរីកចម្រើនរបស់កម្ពុជា ដែលនឹងក្លាយជាគោលដៅមួយក្នុងចំណោមគោលដៅទេសចរណ៍ផ្សេងទៀតប្រកបដោយសន្ទុះនៃការអភិវឌ្ឍន៍ខ្លាំងនៅតំបន់អាស៊ី។

ដើម្បីទាក់ទាញភ្ញៀវទេសចរ និងអ្នកវិនិយោគបរទេសឱ្យមកទស្សនា និងសម្លឹងមើលឱកាសរកស៊ីនៅក្នុងប្រទេស រដ្ឋាភិបាលកម្ពុជាបានផ្តួចផ្តើមឱ្យមានការភ្ជាប់ជើងហោះហើរដោយត្រង់ពីបណ្តាប្រទេសមួយចំនួន ដូចយ៉ាងពីប្រទេសចិន ដោយកាលពីខែកក្កដា ឆ្នាំ 2025 កម្ពុជាបានទទួលជើងហោះហើរត្រង់ដំបូងពីទីក្រុង សិនជិន ប្រទេសចិន ដែលចុះចតក្នុងខេត្តសៀមរាប។

ជាងនេះទៀត កាលពីថ្ងៃទី14 ខែកញ្ញា ក្រសួងទេសចរណ៍កម្ពុជាបានបញ្ជាក់ថា ក្រុមហ៊ុនអាកាសចរណ៍ ETIHAD របស់រដ្ឋធានីអាប៊ុយដាប៊ីនឹងភ្ជាប់ជើងហោះហើរត្រង់មកកាន់កម្ពុជាចាប់ពីថ្ងៃទី3 ខែតុលា ឆ្នាំ 2025។ ចំណែកឯជើងហោះហើរត្រង់ពីទីក្រុងអ៊ីស្តង់ប៊ុល ប្រទេសតួកគីក៏នឹងចាប់ផ្តើមពីថ្ងៃទី10 ខែធ្នូ ឆ្នាំ2025។