ទម្លាប់ធ្វើរឿងទាំងនេះជាញឹកញយ អ្នកនឹងឆាប់ចាស់មុនអាយុ

មានទម្លាប់ខ្លះៗដែលអ្នកកំពុងធ្វើវាប្រចាំថ្ងៃ ដោយមិនបានដឹងថាសកម្មភាពទាំងនោះអាចជះឥទ្ធិពលធ្វើឱ្យអ្នកឆាប់ចាស់មុនអាយុ។

សញ្ញាទូទៅបំផុតនៃភាពចាស់មុនអាយុតែងបង្ហាញនៅលើស្បែករបស់អ្នក ដោយវាកើតមានស្នាមជ្រីវជ្រួញ ស្បែកស្ងួត មុខបាក់ និងចាស់ ឬអាចបាត់បង់ពណ៌ស្បែក។ វាមិនត្រឹមតែប៉ះពាល់ដល់សុខភាពស្បែកមួយមុខនោះទេ ទម្លាប់មិនល្អទាំងនោះក៏បង្កជាជម្ងឺរ៉ាំរៃដល់សុខភាពរាងកាយផងដែរ ដូច្នេះសូមប្រាកដថាអ្នករស់នៅប្រកបដោយទម្លាប់ល្អដែលនាំមកនូវផាសុកភាពល្អដល់ជីវិត អាចជួយការពារភាពចាស់មុនវ័យ។

ខាងក្រោមនេះជាទម្លាប់ប្រចាំថ្ងៃ ដែលធ្វើឱ្យស្បែករបស់អ្នកឆាប់វិវត្តន៍ទៅរកភាពចាស់យ៉ាងលឿន ៖

របបអាហារមិនល្អ

ការទទួលទានរបបអាហារមិនល្អអាចជះឥទ្ធោពលយ៉ាងខ្លាំងដល់សុខភាពរាងកាយ និងសុខភាពស្បែក។ ការសិក្សាមួយចំនួនបង្ហាញថា របបអាហារដែលមានជាតិស្ករខ្ពស់ ព្រោះម៉ូលេគុលស្ករអាចបំផ្លាញ Collagen ក្នុងស្បែកលឿនទ្វេដង និងបណ្តាលឱ្យអ្នកវិវត្តទៅកាន់ភាពចាស់មុនអាយុ។ ដូច្នេះ សូមជ្រើសយកការទទួលទានរបបអាហារល្អដែលសម្បូរទៅដោយសារធាតុចិញ្ចឹមចាំបាច់ ដូចជាផ្លែឈើ និងបន្លែជាដើម។

សេពគ្រឿងស្រវឹង

ទទួលទានស្រា អាចធ្វើឱ្យអ្នកមានអាការខ្សោះជាតិទឹកខ្លាំងក្នុងខ្លួន ព្រោះប្រភេទសុរាទាំងអស់មានផ្ទុកជាតិអាល់កុលខ្ពស់ ម្យ៉ាងវាបានពង្រីកសរសៃវ៉ែនបណ្តាលឱ្យមានការកើនឡើងលំហូរឈាមនៅជិតផ្ទៃនៃស្បែក ដែលនាំឱ្យស្បែកឡើងក្រហម… ហើយការខ្សោះជាតិទឹកក៏នឹងបំផ្លាញកោសិកាស្បែកយ៉ាងឆាប់រហ័សផងដែរ។

ទទួលទានដំណេកមិនគ្រប់គ្រាន់

ការទទួលទានដំណេកមិនគ្រប់គ្រាន់អាចបង្កើនល្បឿននៃការវិវត្តន៍ទៅរកភាពចាស់មុនវ័យ ព្រោះថាមុខងាររបាំងស្បែករបស់អ្នកត្រូវបានថយចុះ ដែលជាហេតុបណ្តាលឱ្យមានស្នាមជ្រាវជ្រួញ និងស្នាមអុចខ្មៅ។

ការជក់បារី

នៅក្នុងបារីមានផ្ទុកសារធាតុ “នីកូទីន” ដែលវាគឺជាជាតិពុល ហើយជាតិពុលនេះនឹងធ្វើការផ្លាស់ប្តូរកោសិកានៅក្នុងខ្លួនរបស់អ្នក ដោយបំបែកស្រទាប់កូឡាជែន និងសរសៃយឺតក្នុងស្បែក បង្កទៅជាបញ្ហាស្បែកជ្រីវជ្រួញ ស្បែកយារធ្លាក់ ឡើងមុន និងស្នាមអុចៗពាសពេញផ្ទៃមុខ។ លើសពីនេះ ការជក់បារី ក៏បានកាត់បន្ថយបរិមាណវីតាមីន C ក្នុងស្បែក ដែលធ្វើឱ្យស្បែកឆាប់ចាស់ផងដែរ។