ទិវារត់ប្រណាំងម៉ារ៉ាតុងចក្រភពអង្គរ លើកទី១០

ទិវារត់ប្រណាំងម៉ារ៉ាតុងចក្រភពអង្គរលើកទី ១០ បានចាប់ផ្តើមជាផ្លូវការ នៅថ្ងៃទី៣១ ខែសីហា ដោយមានការចូលរួមពី អត្តពលិកជាតិ-អន្តរជាតិ ប្រមាណជាង ៤ ០០០នាក់។

អត្តពលិកជាតិ និងអន្តរជាតិសរុប ៤ ២២៤នាក់ ក្នុងនោះមានជនជាតិចិន ជប៉ុន បារាំង អង់គ្លេស និងអាមេរិកច្រើនជាងគេ ដែលបានចូលរួមក្នុងទិវារត់ប្រណាំងម៉ារ៉ាតុងចក្រភពអង្គរ រៀបចំនៅបរិវេណរមណីយដ្ឋានអង្គរ។ លោក ថោង ខុន ទេសរដ្ឋមន្ត្រី និងជាប្រធានគណៈកម្មាធិការជាតិអូឡាំពិកកម្ពុជា (NOCC) បានសម្តែងការស្វាគមន៍យ៉ាងកក់ក្តៅ ចំពោះអត្តពលិកជាតិ-អន្តរជាតិទាំងអស់ ដែលបានចូលរួមទិវារត់ប្រណាំងម៉ារ៉ាតុងចក្រភពអង្គរ លើកទី១០ នៅព្រឹកព្រលឹមថ្ងៃអាទិត្យនេះ។

លោក ថោង ខុន បានមានប្រសាសន៍ថា “តាមពិតទៅ បទឈប់បាញ់ បានអនុវត្តន៍ ចាប់ពីក្រោយម៉ោង ១២ យប់ នាថ្ងៃទី២៨ ខែកក្កដា ឆ្នាំ២០២៥។ រីឯថ្ងៃរត់ម៉ារ៉ាតុង ពីមុនយើង បានកំណត់ថា នៅថ្ងៃទី៣ សីហា ឆ្នាំ២០២៥ ។ ប៉ុន្តែដោយមានសំណូមពរពីអត្តពលិកជាតិរបស់យើងថា យើងគួរលើកពេលទៅថ្ងៃក្រោយសិន ដោយយើងមិនទាន់អារម្មណ៍ស្ងប់ល្អនៅឡើយ ទោះបីការប្រយុទ្ធគ្នា នៅព្រំដែនទើបត្រូវបានបញ្ឈប់ក៏ពិតមែន។ តែចំពោះអត្តពលិកអន្តរជាតិមួយចំនួន ប្រមាណជាង ៣៨០នាក់ ដោយពួកគាត់មានសំណូមពរថា ពួកគាត់បានធ្វើការកក់សំបុត្រយន្តហោះ និងសណ្ឋាគារនៅខេត្តសៀមរាបរួចរាល់ហើយ គណៈកម្មការរៀបចំក៏បានធ្វើការសម្របសម្រួលបច្ចេកទេសជូនពួកគាត់ ដើម្បីបានរត់កំសាន្តក្រៅផ្លូវការនៅតំបន់អង្គរនេះកាលពីថ្ងៃ៣ ខែសីហា ផងដែរ”។

ជាមួយគ្នានោះ លោក ថោង ខុន ក៏បានបញ្ជាក់បន្ថែមថា “អ្វីដែលពិសេសសម្រាប់ទិវារត់ប្រណាំងម៉ារ៉ាតុងចក្រភពអង្គរ លើកទី១០ ក្រៅពីចូលរួមជួយជម្រុញនូវវិស័យទេសចរណ៍ កំឡុងរដូវភ្លៀង ឬរដូវបៃតង (Green Season) និងសកម្មភាពសប្បុរសធម៌ គណៈកម្មការរៀបចំក៏បានផ្សារភ្ជាប់នូវប្រធានបទសំខាន់ៗមួយចំនួន ដូចជា រត់ដើម្បីសន្តិភាព សាមគ្គីភាព និងភាពសុខសាន្តរបស់ប្រជាពលរដ្ឋ, រត់ដើម្បីគាំទ្រ និងការពារបេតិកភណ្ឌរបស់មនុស្សជាតិ និងទី៣ រត់ដើម្បីជួយឧបត្ថម្ភគាំទ្រដល់វីរកងទ័ពជួរមុខ និងជនភៀសសឹកជាដើម” ។