ទីបំផុត មហោស្រពភាពយន្តទីក្រុងកាន រកឃើញម្ចាស់ពាន ផលិតរឿងល្អបំផុតដាច់គេ ហើយ!

ខ្សែភាពយន្តរឿង Anora របស់ផលិតករជនជាតិអាមេរិក លោក Sean Baker បានឈ្នះពាន Palme d’Or នៅក្នុងព្រឹត្តិការណ៍មហោស្រពភាពយន្តទីក្រុងកាន Cannes Film Festival លើកទី ៧៧។ Sean Baker ជាផលិតករអាមេរិកដំបូងគេដែលបានឈ្នះពាន Palme d’Or គិតចាប់តាំងពីផលិតករ Terrence Malick បានឈ្នះពាននេះនៅក្នុងឆ្នាំ ២០១១ ដោយភាពយន្តរឿង “The Tree of Life”។

Anora ជាភាពយន្តដែលសាច់រឿង និយាយអំពីសេចក្តីស្នេហារវាង បុរសអ្នកមាន ជាកូនប្រុសរបស់អ្នកមានអំណាចក្នុងជួររដ្ឋាភិបាលរុស្សី និង នារីបម្រើសេវាកម្សាន្ត ក្នុងក្លឹបរាត្រី។ តួអង្គប្រុសសម្តែងដោយ Mark Eydelshteyn ចំណែកតួស្រីសម្តែងដោយ Make Madison។ ក្នុងនាមជាផលិតករ លោក Sean Baker បានប្រកាសឧទ្ទិសពាន ដែលបានឈ្នះនៅក្នុងមហោស្រពទីក្រុងកាន ទៅកាន់ស្រ្តីទាំងអស់ដែលធ្វើការជាអ្នកផ្តល់សេវាកម្សាន្ត នៅក្នុងអតីតកាល បច្ចុប្បន្ន និងនាពេលអនាគត។

នេះជារឿងទី ៣ របស់ផលិតករ Sean Baker យកមកចាក់បញ្ចាំង នៅ Cannes Film Festival ដោយលោកធ្លាប់បាននាំយកភាពយន្ត ២ រឿងរួចមកហើយ គឺរឿង “The Florida Project” និង រឿង “Red Rocket”។ ផលិតកររឿង Anora រូបនេះ បានទទួលពាន Palme d’Or ដោយផ្ទាល់ដៃពីលោក Francis Ford Coppola ដែលធ្លាប់បានឈ្នះពាននេះ ២ សម័យកាល។ ព្រឹត្តិការណ៍ មហោស្រពភាពយន្តទីក្រុងកាន បានទាក់ទាញចំណាប់អារម្មណ៍ពីមហាជននៅជុំវិញពិភពលោក បន្ទាប់ពីបានចាប់ផ្តើមកម្មវិធី នៅថ្ងៃទី ១៤ រហូតដល់ថ្ងៃទី ២៥ ខែឧសភា ឆ្នាំ២០២៤៕