ខ្មែរ
English
ការសិក្សានៅបរទេសអាចជាបទពិសោធន៍ដ៏គួរឱ្យរំភើប សិស្សានុសិស្សនឹងទទួលបានឱកាសរុករកវប្បធម៌ថ្មីៗ និងអនាគត់ដ៏ភ្លឺស្វាង។ ទោះជាយ៉ាងណាក៏ដោយ ការគ្រប់គ្រងហិរញ្ញវត្ថុឱ្យមានប្រសិទ្ធភាព គឺពិតជាសារៈសំខាន់ណាស់ក្នុងការធានាថា សិស្សនិសិត្សអាចរីករាយនឹងពេលវេលារបស់ពួកគេយ៉ាងពេញលេញដោយគ្មានភាពតានតឹងផ្នែកហិរញ្ញវត្ថុ។
ជាមួយនឹងភាពខុសគ្នានៃតម្លៃក្នុងរស់នៅតម្លៃខុសគ្នានៃការរស់នៅ និងថ្លៃសិក្សា ការគ្រប់គ្រងហិរញ្ញវត្ថុក្លាយជាជំនាញសំខាន់មួយសម្រាប់និស្សិតអន្តរជាតិ។ តោះស្វែងយល់ពីគន្លឹះខ្លះៗសម្រាប់ថវិកា ការសន្សំ និងការស្វែងរកអាហារូបករណ៍ដែលអាចជួយអ្នកក្នុងអំឡុងពេលសិក្សានៅបរទេស!
ការគ្រប់គ្រងមូលដ្ឋានគ្រឹះហិរញ្ញវត្ថុឱ្យបានត្រឹមត្រូវ គឺជាស្នូលដ៏សំខាន់នៃជីវិត ដែលអាចជួយឱ្យសិស្សានុសិស្សដែលកំពុងសិក្សានៅបរទេស រស់នៅក្នុងលក្ខខណ្ឌជីវិតមួយដ៏ល្អប្រសើរ ចៀសវាងការចាយវាយមិនគ្រប់គ្រាន់។
ការគ្រប់គ្រងមូលដ្ឋានគ្រឹះហិរញ្ញវត្ថុដែលត្រឹមត្រូវ គឺ កើតចេញពីការលាយបញ្ចូលនូវទម្លាប់នៃការអនុវត្តទៅលើការសន្សំសំចៃ និងការគ្រប់គ្រងចំណូលចំណាយឱ្យបានល្អ។ ដូច្នេះ ដើម្បីគ្រប់គ្រងហិរញ្ញវត្ថុពេលកំពុងសិក្សានៅបរទេស សិស្សានុសិស្សគួរតែបង្កើតក្បួនថវិកាលម្អិត តាមដានរាល់ការចំណាយផ្សេងៗ ដោយកាត់ត្រានៅក្នុងសៀវភៅបញ្ជី និងកំណត់អាទិភាពលើតម្រូវការចាបាច់ កាត់បន្ថយការចំណាយលើអ្វីដែលមិនចាំបាច់។
ជំហានដំបូងក្នុងការគ្រប់គ្រងហិរញ្ញវត្ថុ កំឡុងពេលសិក្សានៅបរទេស គឺចាប់ផ្តើមដោយរាយបញ្ជីការចំណាយ រួមមាន៖
• ថ្លៃសិក្សា ៖ ស្វែងយល់អំពីការចំណាយពាក់ព័ន្ធ និងកាលបរិច្ឆេទទូទាត់ណាមួយ។ ថ្លៃសិក្សាអាចប្រែប្រួលយ៉ាងខ្លាំងដោយផ្អែកលើស្ថាប័ន និងកម្មវិធីសិក្សា ដូច្នេះ សិស្សានុសិស្សត្រូវប្រាកដថា ខ្លួនបានគិតគូរអំពីការចំណាយបន្ថែមផ្សេងៗទៀត ចៀសវាងការចាយវាយខ្វះខាត។
• ការចំណាយលើការរស់នៅ ៖ សូមធ្វើបញ្ជី និងស្រាវជ្រាវអំពីថ្លៃស្នាក់នៅ គ្រឿងរបស់របរប្រើប្រាស់ ម្ហូបអាហារ និងការធ្វើដំណើរ ដើម្បីដឹងទិន្នន័យនៃការចំណាយឱ្យច្បាស់លាស់។ សិស្សានុសិស្សអាចពិចារណាលើការចែករំលែកកន្លែងស្នាក់នៅជាមួយមិត្តភក្តិ ឬក៏ស្នាក់នៅក្នុងអាគារស្នាក់នៅរបស់សិស្ស ដើម្បីកាត់បន្ថយការចំណាយ និងសន្សំសំចៃ។
• ការចំណាយផ្ទាល់ខ្លួន ៖ ថ្វីបើការកម្សាន្តនៅតំបន់ផ្សេងៗ ការធ្វើដំណើរ និងការទទួលទានអាហារនៅក្រៅ អាចផ្តល់បទពិសោធន៍ថ្មីៗ ប៉ុន្តែសូមកម្រិតឱ្យបានត្រឹមត្រូវ ព្រោះកាលណាសិស្សានុសិស្សឧស្សាហ៍អនុវត្តរឿងទាំងអស់នោះ ថ្លៃចំណាយក៏នឹងកើនទៅតាមហ្នឹងដូចគ្នា។
សិស្សានុសិស្សក៏អាចសន្សំសំចៃប្រាក់ដោយជ្រើសរើសលំនៅដ្ឋានដែលមានតម្លៃសមរម្យ បង្កើតទម្លាប់ចម្អិនអាហារនៅផ្ទះដោយខ្លួនឯង និងប្រើប្រាស់កាតបញ្ចុះតម្លៃសម្រាប់សិស្សលើមធ្យោបាយធ្វើដំណើរ និងសកម្មភាពផ្សេងៗទៀត។
