នៅ ដាណា តារាស្រីពហុជំនាញ ទឹកដមសំនៀងច្រៀងក៏ពិរោះ ទេពកោសល្យសម្តែងកុន ក៏បុិនប្រសព្វ

តារាស្រី ពហុជំនាញ នៅ ដាណា កំពុងទទួលបានការគាំទ្រពីសំណាក់ទស្សនិកជន ដោយសារតែទំដមសំឡេងដ៏ក្រអួនក្រអៅរបស់នាង។ ដាណា មិនត្រឹមតែជាតារាចម្រៀងប៉ុណ្ណោះទេ ប៉ុន្តែនាងក៏ជាតារាសម្តែងដ៏បុិនប្រសព្វមួយរូបផងដែរ។

សព្វថ្ងៃ ដាណា កំពុងរវល់ជាប់ជាមួយនឹងការងារសិល្បៈ ស្ទើរតែរកពេលវេលាទំនេរពុំបាន។ “រវល់ស្ទើររាល់ថ្ងៃបង ដោយសារតែមានការច្រៀងនៅភោជនីយដ្ឋានលំដាប់ 5ថ្ងៃក្នុងមួយអាទិត្យទៅហើយ ដោយក្នុងនោះខ្ញុំក៏ជួយសម្រមសម្រួលការងារផ្ទៃក្នុងរបស់ក្រុមតន្រ្តីនៅភោជនីយដ្ឋាន 1ផងដែរ។ នៅមានថតរឿងទៀត ហើយទំនេរពីការច្រៀងនិងថត ខ្ញុំក៏ចុះជួយជាមួយនឹងការងារសមាគមសិល្បករខ្មែរ”។ នេះបើតាមអ្វី ដែល នៅ ដាណា បានថ្លែងប្រាប់មកកាន់ទស្សនាវដ្តី ឡេឌីស៍។

ក្រៅពីអាជីពជាអ្នកចម្រៀង តារាស្រីសម្បុរស្រអែមរូបនេះ ក៏ជាតារាភាពយន្ត ធ្លាប់សម្តែងនៅក្នុងរឿងភាគទូរទស្សន៍ និង រឿងកុនជាច្រើនផងដែរ។ កាលពីពេលថ្មីៗនេះ នាង បានចូលរួមសម្តែងនៅក្នុងខ្សែភាពយន្តមួយរបស់ផលិតកម្ម LD គឺរឿង “បណ្តាសារនាងរាត្រី”។ ដាណា បានឱ្យដឹងថា “តួខ្ញុំ នៅក្នុងរឿងបណ្តាសារនាងរាត្រី ឈ្មោះ “នីតា” ពេលតួខ្ញុំនៅក្មេង មានពាក់ព័ន្ធច្រើនជាមួយកន្លែងកុមារកំព្រាហ្នឹង ក្មេងៗផ្សេងត្រូវគេសម្លាប់អស់នៅសល់តែខ្ញុំ ចឹងទើបគេមកសួរខ្ញុំចង់ដឹងពីរឿងរ៉ាវអស់ទាំងនោះ តែពេលខ្ញុំនៅតូចនោះខ្ញុំត្រូវបណ្តាសារក៏ពិការភ្នែកបាត់ទៅហើយ”។

នៅពេលនិយាយទៅដល់ឧបសគ្គនៅក្នុងការសម្តែងភាពយន្តខ្នាតធំមួយនេះ ដាណា បញ្ជាក់យ៉ាងដូច្នោះថា “បើគិតពីប្លង់ដែលមានខ្ញុំថតគឺពិបាកតិចតួចទេ ប៉ុន្តែអីដែលពិបាកនោះខ្ញុំត្រូវសម្តែងទាំងបិទភ្នែកព្រោះតែភ្នែកខ្ញុំពិការ ហើយក៏មានការ make up effect ដំបៅមាត់ទៀត។ ការ make up នោះរឹបតឹងមាត់ខ្លាំងដើម្បីធ្វើយ៉ាងណាឱ្យមើលទៅដូចរបួសពិត ចឹងពេលខ្ញុំហាមាត់ខ្លាំងវាឈឺ ញាំបាយផឹកទឹក ខ្ញុំត្រូវហាមាត់តិចៗទេ។ ចុងក្រោយនៅតែមានរបួសរលាត់ឈាមក្បែរមាត់តិចៗមែនទែននៅពេលដែលបក make up effect ចេញ”។ យ៉ាងណាមិញ តារាស្រីរូបនេះ បន្តថា បើប្រៀបធៀបតួអង្គផ្សេងក្នុងភាពយន្តនេះ និងភាពយន្តមុនៗដែលនាងថត គឺពិបាកជាងប្លង់ដែលខ្ញុំថតនេះឆ្ងាយ ប៉ុន្តែនាងថាមិនអីទេ ព្រោះប្លង់កាន់តែពិបាក នាងកាន់តែចូលចិត្ត។

គួរបញ្ជាក់ថា កន្លងមក តារាស្រី នៅ ដាណា ធ្លាប់បានសម្តែងនៅក្នុងរឿងភាគទូរទស្សន៍ ដែលមានដូចជារឿង ទណ្ឌកម្មស្នេហ៍ (TV5) អ្នកម៉ាក់វ័យក្មេង (PNN) មន្តស្នេហ៍ឧត្តមសេនីយ៍ (TV5) រសស្នេហ៍ផ្លែល្វា (TV5) លោកប្តី 365 ថ្ងៃ (PNN) និស្ស័យស្នេហ៍បេះដូង4 (CTN) នាងកែវមុខសេះ (CTN) និង រឿងស្នេហា Cover (PNN)។ ចំណែកភាពយន្តវិញកុន ដាណា ធ្លាប់បានសម្តែងដូចជារឿង នាឡិកាដាស់វិញ្ញាណ, ពពិលខ្មៅ, សាកសព7ថ្ងៃ និងចុងក្រោយនេះគឺរឿង បណ្តាសារនាងរាត្រី៕