បច្ចឹមវ័យ និងការសម្រាន្តមិនលក់

ការគេង គឺជាផ្នែកមួយដ៏សំខាន់នៃសុខុមាលភាពទូទៅ។ ចាប់ពីពេលដែលឈានចូលមជ្ឈឹមវ័យរហូតដល់បច្ចឹមវ័យ គុណភាពនៃការគេងរបស់អ្នកក៏ថយចុះដែរ ការណ៍នេះបណ្តាលមកពីកត្តាជាច្រើន រួមមាន ស្ថានភាព សុខភាព ការផ្លាស់ប្តូររបៀបរស់នៅ ឬជាដំណើរការវិវត្តភាពចាស់តាមធម្មជាតិ។

សម្រាប់អ្នកមានវ័យចាប់ពី ៦៥ឆ្នាំឡើងទៅ តម្រូវឱ្យគេងក្នុងរយៈពេលពី ៧ ទៅ ៨ ម៉ោងក្នុងមួយយប់។ ផ្ទុយទៅវិញ ពួកគាត់តែងតែជួបប្រទះបញ្ហានៃការគេង មានដូចជា ពិបាកក្នុងការគេងស្កប់ស្កល់ រសាប់រសល់ សម្រាន្តមិនលក់ ឧស្សាហ៍ភ្ញាក់ពាក់កណ្តាលដំណេក ងងុយមុនម៉ោង ឬភ្ញាក់លឿនពេក ។ល។ ទាំងនេះក៏ដោយសារតែមានកត្តារួមផ្សំដូចជាការប្រែប្រួលនៃអ័រម៉ូនមេឡាតូនីន ដែលជាអរម៉ូនគ្រប់គ្រងការគេងមានការធ្លាក់អន់ថយទៅតាមច្បាប់ធម្មជាតិ ស្របនឹងសកម្មភាពនៃការរស់នៅប្រចាំថ្ងៃ ដូចជា ការជក់បារី សេពគ្រឿងស្រវឹង និងទទួលទានជាតិកាហ្វេអ៊ីនច្រើនផង ទើបក្លាយទៅជាអង្គនាំឲ្យពួកគាត់មានវិបត្តិដំណេក។

ម្យ៉ាងវិញទៀត ពពួកថ្នាំវេជ្ជសាស្រ្តមួយចំនួន ដូចជាថ្នាំប្រឆាំងនឹងជំងឺធ្លាក់ទឹកចិត្ត និងថ្នាំ Beta-Blockers ក៏ជះឥទ្ធិពលដល់ដំណេកផងដែរ។

ក្រៅពីនោះ ប្រសិនបើអ្នកមានជំងឺរ៉ាំរ៉ៃប្រចាំកាយមួយចំនួន ក៏អាចធ្វើឲ្យប៉ះពាល់ដល់ដំណេកផងដែរ ក្នុងនោះរួមមាន៖

• ជំងឺវង្វេង
• ជំងឺសរសៃឈាមបេះដូង
• ជំងឺស្ទះសួតរ៉ារ៉ៃ
• ជំងឺសរសៃប្រសាទ
• ជំងឺច្រាលអាស៊ីតក្រពះ (GERD)
• ខ្សោយតម្រងនោម
• ការដាច់សរសៃឈាមខួរក្បាល
• ការថប់បារម្ភ គិតច្រើន ខ្វល់ខ្វាយច្រើន ឬអាចមានជំងឺបាក់ទឹកចិត្ត
• ជំងឺផ្លូវដង្ហើម
លើសពីនេះអ្នកជំងឺកន្រ្តាក់ជើងមិនឈប់ឈរ [Restless Legs Syndrome (RLS)] និង អ្នកជំងឺកន្ត្រាក់សាច់ដុំ Periodic Limb Movement Disorder (PLMD) ក៏អាចពិបាកដំណេកដែរ ដោយសារតែអាការៈកន្ទ្រាក់សាច់ដុំ និងផ្លាស់ទីដោយគ្មានមូលហេតុ។

នេះជាគន្លឹះទាំង៩ អាចជួយសម្រួល ដល់បញ្ហាដំណេករបស់បច្ចឹមវ័យបាន ៖

1. រក្សាកាលវិភាគចូលដំណេកឱ្យបានទៀងទាត់ និងត្រូវអនុវត្តជាប្រចាំឲ្យក្លាយជាទម្លាប់
2. បើងងុយ ត្រូវសម្រាន្ត ជៀសវាងព្យាយាមប្រឆាំងភាពងោកងុយ លើសពី ២០នាទី។
3. ជៀសវាងការសម្រាន្តថ្ងៃ… ប្រសិនបើងងុយខ្លាំង គួរតែសម្រាន្តមិនឲ្យលើសពី ១៥នាទី
4. ធ្វើលំហាត់ប្រាណឲ្យបានទៀងទាត់
5. ជៀសវាងភេសជ្ជៈដែលមានជាតិកាហ្វេអ៊ីនច្រើនហួសហេតុ
6. កុំបរិភោគអាហារច្រើនមុនចូលសម្រាន្ត គួរទុកចន្លោះយ៉ាងហោចណាស់ ៤ម៉ោង
7. កម្រិតការជក់បារី និងភេសជ្ជៈមានជាតិអាល់កុល
8. ព្យាយាមសម្រាកដោយ ងូតទឹកក្តៅឧណ្ហៗ និងធ្វើសមាធិ និងអានសៀវភៅ ១ទៅ២ម៉ោងមុនពេលចូលសម្រាន្ត
9. កុំប្រើប្រាស់ថ្នាំងងុយគេងដោយគ្មានវេជ្ជបញ្ជា