បបូរមាត់ដ៏ទាក់ទាញ

រង្វង់ផ្ទៃមុខទាំងមូល គឺត្រូវបានគេចោលភ្នែកចាប់អារម្មណ៍មុនដំបូងគេបង្អស់ មិត្តៗនារីជាច្រើនបានប្រើប្រាស់ក្បួនក្នុងការតុបតែងមុខទៅតាមចំណង់ចំណូលចិត្ត និងភាពស្រស់ស្អាតរៀងខ្លួន។ ការតុបតែងមុខ អាចអាស្រ័យទៅលើបុគ្គលិកលក្ខណៈ អត្តចរិត ស្តាយល៍ និងអ្វីដែលសាកសមនឹងខ្លួនយើង។

តើអ្នកដឹងទេ? បបូរមាត់គឺជាផ្នែកដ៏សំខាន់នៃផ្ទៃមុខរបស់អ្នក ប្រសិនបើអ្នកចេះលេងស្ទាយល៍បបូរមាត់ឱ្យបានសាកសម គឺមើលទៅពិតជាទាក់ទាញខ្លាំងបំផុត។ បបូរមាត់ក៏ចូលរួមជាចំណែកបំពេញនូវការផាត់មុខរបស់អ្នកឱ្យកាន់តែស៊ីសង្វាក់បន្ថែម ដើម្បីទទួលនូវភាពស្រស់ស្អាតគ្មានចន្លោះ។

ដើម្បីទទួលបានបបូរមាត់ដ៏ស្រស់ស្អាតទាក់ទាញ អ្នកត្រូវស្វែងយល់ច្បាស់អំពីការលាបក្រែមបបូរមាត់ និងជ្រើសរើសពណ៌ដែលស័ក្តិសមនឹងរាងនៃបបូរមាត់ ឬពណ៌នៃស្បែករបស់អ្នក។

ប្រាកដហើយ ដែលថាមិនមានពណ៌ក្រែម និងស្តាយល៍នៃការលាបបបូរមាត់ដែលល្អឥតខ្ចោះឡើយសម្រាប់មនុស្សម្នាក់ ប៉ុន្តែអ្នកអាចមើលគន្លឹះខ្លះខាងក្រោម រួចស្វែងយល់អំពីទម្រង់បបូរមាត់របស់អ្នកនិងរបៀបក្នុងការលាបក្រែមឱ្យបានត្រឹមត្រូវ ៖

បបូរមាត់លើក្រាស់

ប្រសិនបើអ្នកមានបបូរមាត់លើក្រាស់ អ្នកអាចទទួលបានបបូរមាត់ដ៏ស្រស់ស្អាតជាមួយនឹងគន្លឹះទាំង ៣ នេះ ៖

គូររឹមបបូរមាត់ដោយប្រើពណ៌រាងដិតផ្នែកខាងលើ និងសង្កត់ឱ្យដិតបន្ថែមផ្នែកខាងក្រោមនៃរឹមបបូរមាត់
លាបក្រែមដែលមានពណ៌ស្រស់នៅបបូរមាត់ផ្នែកខាងក្រោម និងពណ៌រាងស្អាប់នៅផ្នែកខាងលើ
ផ្តិតពណ៌លាបត្របកភ្នែកបន្តិចនៅត្រង់ផ្នែកកណ្តាលនៃផ្នែកខាងក្រោមបបូរមាត់

បបូរមាត់ក្រោមក្រាស់

បបូរមាត់ផ្នែកខាងក្រោមក្រាស់គឺពិតជាស្រស់ស្អាតនិងមានភាពទាក់ទាញបំផុត អ្នកអាចលេងស្ទាយល៍ក្រែមលាបបបូរមាត់តាមគន្លឹះទាំងនេះ ៖

គូររឹមបបូរមាត់ខាងលើ និងខាងក្រោមប៉ុន្តែគូរផ្នែកខាងលើឱ្យរាងក្រាស់បន្តិច
លាបពណ៌ក្រែបដែលអ្នកបានជ្រើសរើសរួច
ផ្តិតពណ៌លាបត្របកភ្នែកនៅត្រង់ផ្នែកកណ្តាលបៃបបូរមាត់ផ្នែកខាងលើរបស់អ្នក

បបូរមាត់តូច

ប្រសិនបើអ្នកមានបបូរមាត់តូច អ្នកអាចធ្វើឱ្យវាក្លាយជាបបូរមាត់ធំក្រាស់ស្អាតតាមរបៀប ៖

ប្រើប្រាស់ពណ៌ស្តើងស្រាលក្នុងការគូររឹមបបូរមាត់ រួចវាសឱ្យសព្វបបូរមាត់ដើម្បីមើលទៅដូចធម្មជាតិ
បន្ទាប់មក លាបពណ៌ក្រែមដែលអ្នកចូលចិត្ត។ ជ្រើសរើសពណ៌រាងស្រស់បន្តិចដើម្បីឱ្យផ្ទៃមុខអ្នកមើលទៅកាន់តែស្រស់ស្អាត

បបូរមាត់ស្តើង

អ្នកមិនចាំបាច់ធ្វើការកែបបូរមាត់តាមរយៈការកែសម្ជស្សឡើយ អ្នកគ្រាន់តែយល់ដឹងពីរបៀបលាបក្រែមបបូរមាត់ឱ្យត្រឹមត្រូវដូចខាងក្រោម ៖

គូររឹមបបូរមាត់ឱ្យធំ និងក្រាស់ជាងរឹមបបូរមាត់ទម្រង់ដើម
លាបពណ៌ក្រែមរាងដិតតាមរឹមបបូរមាត់ដែលបានគូស ហើយយកពណ៌រាងស្តើងលាបផ្នែកខាងលើនៃបបូរមាត់
វាសវាឱ្យសព្វដោយប្រើជក់

បបូរមាត់សំប៉ែត

អ្នកអាចធ្វើឱ្យបបូរមាត់របស់អ្នកមានរាងស្អាតនិងមើលទៅពេញស្អាត តាមវិធីខាងក្រោម ៖

គូររឹមបបូរមាត់ឱ្យរាងដិតខ្លាំងបន្តិចត្រង់ផ្នែកខាងលើ
លាបពណ៌ក្រែមដែលចូលចិត្តធ្នកចូលចិត្ត។ ពណ៌មួយណាក៏ស័ក្តិសមនឹងទម្រង់បបូរមាត់បែបនេះដែរ ដូច្នេះ អ្នកគួរជ្រើសរើសពណ៌ដែលសមនឹងស្បែករបស់អ្នក។

គន្លឹះខាងលើទាំងអស់នឹងជួយឱ្យអ្នកទទួលបានបបូរមាត់ដ៏ស្រស់ស្អាត។ អ្នកអាចធ្វើការសាកល្បងអនុវត្តបានដើម្បីទទួលបាននូបភាពស្រស់ស្អាតឥតខ្ចោះ។