បាយឆ្នាំងដី ឬបាយក្អម “Claypot Rice” ជាមុខម្ហូបប្រពៃណីជនជាតិចិនមានរសជាតិឆ្ងាញ់!

បាយឆ្នាំងដី ឬ Claypot ជួនកាលត្រូវគេហៅថា “បាយឆា” គឺជាម្ហូបអាហារពេលល្ងាចបែបប្រពៃណីរបស់ជនជាតិចិនដែលទទួលបានការពេញនិយមបរិភោគយ៉ាងខ្លាំងនៅតំបន់ ខេត្តក្វាងទុងភាគខាងត្បូងនៃប្រទេសចិន។

ក្រោយមកគេក៏បានសង្កេតឃើញថា សហគមន៍ចិននៅប្រទេសម៉ាឡេស៊ី ប្រទេសឥណ្ឌូនេស៊ី ប្រទេសសិង្ហបុរី និយមរិភោគជាអាហារដ៏មានឱជារសឆ្ងាញ់ពិសាផងដែរ។

មានមុខម្ហូបជាច្រើនដែលប្រជាជនចិននិយមចូលចិត្ត ប៉ុន្តែបាយឆ្នាំងដី ឬ Claypot គឺជាអាហារសំខាន់ និងឆ្ងាញ់បំផុតនៅគ្រប់រដូវកាល។ វាជាប្រភេទអាហារមួយដែលមានការដាក់បញ្ចូលគ្រឿងផ្សំជាច្រើនដូចជា បាយស សាច់ បន្លែ និងគ្រឿងទឹកជ្រលក់នៅខាងក្នុងឆ្នាំងដី ដែលធ្វើឱ្យក្លិនឈ្ងុយរួមផ្សំជាមួយទឹកស៊ីវអ៊ីវ – គ្រឿងធ្វើម្ហូបដ៏សំខាន់របស់ជនជាតិចិន នៅទីក្រុងហុងកុង។

ចំពោះប្រភេទសាច់ផ្ទាប់នៅខាងលើបាយ អ្នកអាចជ្រើសជាប្រភេទ សាច់មាន់ សាច់ជ្រូក សាច់ក្រក សាច់ត្រី ពងទា និងបន្ថែមប្រភេទបន្លែបៃតង ដើម្បីឱ្យរសជាតិកាន់តែដិតឆ្ងាញ់ជាប់មាត់។