ប៊ី សុធារី តំណាង​​ឱ្យខេត្តកំពង់ឆ្នាំង ក្លាយជាម្ចាស់ជ័យលាភី គ្រងម្កុដបរវកញ្ញាឯក Miss Grand Cambodia 2024

កម្មវិធីប្រឡងបវរកញ្ញាឯកកម្ពុជា Miss Grand Cambodia 2024 បានរកឃើញម្ចាស់ម្កុដហើយ ដោយព្រឹត្តិការណ៍ដ៏ធំនេះបានប្រព្រឹត្តិទៅកាលពីរាត្រីថ្ងៃទី 12 ខែកក្កដា ឆ្នាំ 2024​ នៅសាលមហោស្រពកោះពេជ្រ រាជធានីភ្នំពេញ ក្រោមវត្តមានអ្នកចូលរួមទស្សនាយ៉ាងច្រើនកុះករ។

កញ្ញា ប៊ី សុធារី Miss Grand តំណាងឱ្យខេត្តកំពង់ឆ្នាំង បានក្លាយជាម្ចាស់ជ័យលាភី គ្រងម្កុដជាបវរកញ្ញាឯក Miss Grand Cambodia 2024។ នៅប៉ុន្មានម៉ោងមុនការប្រកួតវគ្គផ្តាច់ព្រ័ត្រឈានចូលមកដល់ ប៊ី សុធារី បាននិយាយថា “5 ខែមុន ខ្ញុំបានក្លាយជាម្ចាស់ជ័យលាភី Miss Grand កំពង់ឆ្នាំង 2024 ហើយបានបន្តដំណើររបស់ខ្ញុំដើម្បីឈានទៅគ្រងម្កុដ Miss Grand Cambodia 2024។ ហើយពេលនេះ វគ្គផ្តាច់ព្រ័ត្របានឈានចូលមកដល់។ ខ្ញុំមិនដឹងថានឹងមានអ្វីកើតឡើងនៅរាត្រីនេះទេ ប៉ុន្តែខ្ញុំច្បាស់ប្រាកដថា នឹងខិតខំបញ្ចេញឱ្យអស់ពីសមត្ថភាព ដើម្បីក្លាយខ្លួនជាម្ចាស់ម្កុដ បវរកញ្ញាឯកកម្ពុជា”។

ដូចអ្វីដែលរំពឹងទុក សមត្ថភាព និង សម្រស់ស្រស់សោភារបស់ ប៊ី សុធារី បានធ្វើឱ្យ​កញ្ញា ក្លាយខ្លួនជាម្ចាស់ជ័យលាភីនៃកម្មវិធីប្រកួតបវរកញ្ញាឯកដ៏ធំ Miss Grand Cambodia ​2024។ បន្ទាប់ពីបានគ្រងជាម្ចាស់ម្កុដថ្មីនេះហើយ ប៊ី សុធារី នឹងតំណាងឱ្យកម្ពុជា ទៅចូលរួមប្រកួតកម្មវិធី Miss Grand International លំដាប់ពិភពលោក នាពេលខាងមុខនេះ។

គួរបញ្ជាក់ថា បវរកញ្ញាជាប់ជ័យលាភីរង 1st Runner Up បានទៅលើ Miss Grand មកពីស្វាយរៀង និង 2nd Runner Up មកពីសៀមរាប ហើយ 3rd Runner Up មកពីរតនៈគិរី រួមទាំង 4th Runner Up បានទៅលើ Miss Grand មកពីបាត់ដំបង៕