ប្រណីតភាពរបស់សូត្រមាសខ្មែរ ឆ្លុះបញ្ចាំងពីមរតកសិល្បៈរបស់កម្ពុជា

ប្រទេសកម្ពុជា – ផលិតផលសម្រេចយ៉ាងប្រណីតនៃសិប្បកម្មតម្បាញមួយប្រភេទ គឺ “សូត្រខ្មែរ” បានបង្ហាញអំពីអត្តសញ្ញាតិជាតិ ដែលផ្សារភ្ជាប់ទៅនឹងវប្បធម៌ ប្រពៃណី និងឆ្លុះបញ្ចាំងឱ្យឃើញនូវអរិយធម៌ខ្មែរដ៏អច្ឆរិយៈ។

សូត្រខ្មែរមានការពេញនិយមតាំងពីសម័យបុរាណ រហូតមកដល់សម័យបច្ចុប្បន្ន ហើយ ផលិតផលសូត្រខ្មែរក៏ត្រូវបានបរទេសទទួលស្គាល់លើបទដ្ឋានគុណភាពលើឆាកអន្តរជាតិផងដែរ។

សព្វថ្ងៃនេះ ផលិតផលសូត្រខ្មែរ និងស្នាដៃដ៏ឯកល្អរបស់សិប្បករក្នុងស្រុកដែលបានផលិតសូត្រទាំងអស់បានពង្រីកនូវសក្តានុពលទីផ្សារសិប្បកម្មយតម្បាញបែបប្រពៃណី ជាពិសេស គឺ សូត្រមាសខ្មែរ នៃ Golden Silk Pheach។

សូត្រដ៏ប្រណីតមួយនេះ ផលិតពីដង្កូវនាងមាស ដែលពីមុនសូត្រប្រភេទនេះត្រូវបានប្រើប្រាស់តែនៅក្នុងខ្សែរាជវង្សតែប៉ុណ្ណោះ ដោយមានការសម្រិតសម្រាំងយកតែសរសៃសូត្រល្អ និងតម្បាញបង្កប់ក្បូរក្បាច់រចនាមានគុណភាពខ្ពស់បំផុត។

ភាពស៊ីសង្វាក់គ្នានៃធម្មជាតិ វប្បធម៌ និងការអភិវឌ្ឍន៍សង្គមប្រកបដោយសុខដុមរមនា បានអនុញ្ញាតឱ្យសិប្បកម្មតម្បាញសូត្រមាសខ្មែរមានការផ្តល់ជូនពិភពលោកនូវផលិតផល ដែលនាំមកនូវភាពសម្បូរបែបនៃធម្មជាតិ និងប្រពៃណីដូនតាដ៏អច្ឆរិយៈនៃព្រះរាជាណាចក្រកម្ពុជា។

មិនត្រឹមតែជាការបង្ហាញអំពីបច្ចេកទេសនៃការផលិតបន្សល់ទុកពីបុព្វបុរសដូនតានោះទេ សូត្រខ្មែរចាត់ទុកជាវិធីសាស្រ្តល្អមួយក្នុងការបញ្ជូននូវចំណេះដឹងពីជំនាន់មួយទៅជំនាន់មួយទៀត ហើយសិប្បករដែលផលិតក្រណាត់ទាំងនេះ បានបង្កប់នូវថាមពលច្នៃប្រឌិតរបស់ប្រជាជនខ្មែរយ៉ាងពេញលេញ។