ប្រទេសកម្ពុជាជាប់ចំណាត់ថ្នាក់លេខ​ ៥ ជា “ប្រទេសមានភាពរួសរាយ និងរាក់ទាក់បំផុត”

ប្រទេសកម្ពុជា ត្រូវបានទទួលស្គាល់ថាជាប្រទេសដែលមានភាពរួសរាយ និងរាក់ទាក់បំផុត ជាប់ចំណាត់ថ្នាក់ទី ៥ នៅទូទាំងពិភពលោក។

បើយោងតាមរបាយការណ៍របស់ទស្សនាវដ្តីទេសចរណ៍ Condé Nast Traveler 2025 Readers’ Choice Awards បានបង្ហាញថា ឈ្មោះប្រទេសដែលមានភាពរួសរាយរាក់ទាក់បំផុតទាំង១០ នៅលើពិភពលោក កម្ពុជាបានឈរនៅលេខរៀងទី ៥ ខណៈវៀតណាមស្ថិតនៅលេខរៀងទី ៦។

លោក Condé Nast Traveler បានមានប្រសាសន៍ថា “ក្នុងនាមជាប្រទេសមួយ ដែលគោរពប្រណិបត្តិ ពុទ្ធសាសនាតាំងពីបុរាណកាល ប្រជាជនខ្មែរបានប្រកាន់យកនូវគោលគំនិតនៃសេចក្តី “មេត្តាធម៌” ដែលនេះមានន័យយ៉ាងពេញលេញ ប្រែថា “សេចក្តីស្រឡាញ់ដោយគ្មានលក្ខខណ្ឌ”។

លោកបានបន្តលើកឡើងថា ៖ “រាជធានីភ្នំពេញ គឺជាទីក្រុងដ៏អស្ចារ្យមួយ ដែលពោរពេញទៅដោយមនុស្សម្នាអ៊ូអរយ៉ាងច្រើនកុះករ នៅតាមដងវិថីមាត់ទន្លេ។ រីឯខេត្តសៀមរាប សម្បូរទៅដោយប្រាង្គប្រាសាទបុរាណ ជាពិសេសប្រាសាទអង្គរវត្តដ៏អច្ឆរិយៈ ដែលល្បីល្បាញថាជាបូជនីយដ្ឋានសាសនាដ៏ធំបំផុតរបស់ពិភពលោក។ នៅពេលដែលខ្ញុំធ្វើដំណើរទៅកាន់ទីតំបន់ជនបទ ខ្ញុំទទួលបានអារម្មណ៍នៃការរស់នៅក្នុងផ្ទះបែបខ្មែរ ដែលបង្ហាញអំពីវប្បធម៌ដ៏សម្បូរបែបនៃភូមិតម្បាញសូត្រ និងកសិដ្ឋានសាធារណៈ”។

សូមបញ្ជាក់ជូនថា Condé Nast Traveler គឺជាទស្សនាវដ្តីទេសចរណ៍របស់ចក្រភពអង់គ្លេស បោះពុម្ពផ្សាយដោយ លោក Condé Nast សម្រាប់ផ្តល់ជូនអ្នកដែលចំណាប់អារម្មណ៍ក្នុងការធ្វើដំណើរដោយផ្តោតលើបទពិសោធន៍ជាក់ស្តែង និងពិតប្រាកដ។